Alto yatandukanye na Label yamufashaga mu muziki

Ku wa 27 Werurwe 2021, ni bwo Alto yasinye amasezerano y’imikoranire n’iyi Label, icyo gihe mu muhango wabereye kuri Saint Famille Hotel yari kumwe n’umuhanzi Yampano binjiranye muri iyi Label, ariko we aracyabarizwamo.

Bitewe n’uko umuyobozi w’iyi Label atari mu Rwanda, yari ahagarariwe na Muyoboke Alex wabaye umujyanama w’abahanzi banyuranye, kandi aharanira iterambere ry’umuziki w’u Rwanda mu gihe cy’imyaka irenga 18 ishize ari mu muziki.

Alto yabwiye InyaRwanda ko hari ibyabanjirije irangira ry’amasezerano ye muri iyi Label byatumye atangira kwikorana muri iki gihe nk’umuhanzi wigenga.

Yavuze ko yishimira imyaka igera kuri itatu yari ishize ari muri iyi Label ‘kuko yashyize itafari rikomeye ku muziki wanjye’. Ati “Bamfashije byinshi, kandi ibikorwa byanjye byagiye bigiye hanze ni umusaruro w’imikoranire ya twembi."

Akomeza ati “Amasezerano yageze ku iherezo, biri no mu mpamvu zatumye ntagaragara cyane mu muziki mu minsi ishize nk’uko byari bimeze cyane. Ariko nishimira urugendo rwanjye muri Label ya “TB Music ", kandi mfite icyizere cyo gukomeza gukora ibirenze."

Alto atangaje ibi mu gihe yashyize hanze amashusho y’indirimbo ye nshya yise ‘Together’, yabaye intangiriro ye nk’umuhanzi wigenga.  Ati “Indirimbo ‘Together’ igaruka ku rukundo abakundana babamo mu buzima bwa buri munsi."

Label ya ‘TB Music Entertainment’ umuhanzi Alto yabarizwagamo yashinzwe na Ruzindana James usanzwe ubarizwa muri Leta Zunze Ubumwe za Amerika.

Yinjiye muri iyi Label nyuma y’uko asoje amasezerano ye muri Label ya ‘Ladies Empire’ y’umuraperikazi Oda Paccy.

Uyu musore asezeye muri TB Music nyuma yo gukora indirimbo zirimo “Byambera ", “Wankomye " yakoranye na Uncle Austin, “Tariki ", “Agasenda " yakoranye na Social Mula na “Molisa " n’izindi.

Alto yatangaje ko yatandukanye na Label ya ‘TB Music’ nyuma y’imyaka itatu yari ishize ayibarizwamo

Alto yavuze ko yishimira umusanzu TB Music yagize ku muziki we

Alto yavuze ko agiye gushyira imbaraga mu muziki we nyuma yo gutandukana na Label ye

Alto yavuze ko indirimbo ye ‘Together’ ariyo ya mbere yakoze nyuma yo kuva muri Label 

KANDA HANO UREBE AMASHUSHO Y’INDIRIMBO ‘TOGETHER’ YA ALTO

">