The Ben, Alliah Cool na Muyoboke mu begukanye ibihembo byatangiwe muri Kenya

Byatangiwe mu Mujyi wa Nairobi mu gihugu cya Kenya mu ijoro ryo kuri iki Cyumweru tariki 14 Mata 2024. Ni nyuma y’uko bahatanye mu cyiciro cy’amatora (Vote) yabereye kuri Internet, hanyuma Akanama Nkemurampaka k’iri rushanwa ka kemeza urutonde rwa nyuma rw’abatsinze.

Ibirori byo gutanga ibi bihembo byabereye mu nyubako ya Nairobi Street Kitchen, byatangiye ahagana saa munani z’amanywa, aho ababyitabiriye banyuze ku itapi itukura (Red Carpet), bisozwa n’umuhango wo gushyikiriza ibihembo abahize abandi (Gala Event) byatangiye ahagana saa moya z’umugoroba.

Abategura ibi bihembo bavuze ko babitanze bagendeye ku majwi angana na 50% y’abatoye binyuze kuri Internet. Isimbi Alliance ‘Alliah Cool’ yegukanye igikombe mu cyiciro cy’umukinnyi mwiza wa filime mu Karere k’Afurika y’Iburasirazuba ‘East Africa Film Star East Africa’.

Alliah Cool yahigitse abarimo Kate Actress wo muri Kenya, Jacob Stephene JB wo muri Tanzania ndetse na Nabwiso Mathew wo muri Uganda.’

Ni mu gihe Muyoboke Alex wabaye umujyanama w’abahanzi banyuranye yegukanye igikombe cy’umujyanama mwiza muri EAC ‘Best Artist Manager East Africa’. Yahigitse Chiki Kuruka wo muri Kenya, Babu Tale wo muri Tanzania ndetse na Nzeyimana Ismail wo mu Burundi.

Umuhanzi Mugisha Bejamin [The Ben] yegukanye igikombe cy’indirimbo ifite amashusho meza ‘Best Music Video of the year East Africa’ abicyesha indirimbo yise ‘Ni Forever’. 

Iyi ndirimbo yayihimbiye umugore we Uwicyeza Pamella, yarakunzwe cyane mu gihe gito ahanini bitewe n’inkuru yayo no kuba uyu muhanzi yari akumbuwe kuko yari amaze igihe adashyira hanze indirimbo. Igikombe cya The Ben cyakiriwe na Muyoboke Alex wari muri Kenya.

Mbere y’uko umuhango wo gutanga ibi bihembo urangira, ababitegura bavuze ko bongeyemo icyiciro cy’umunyamakurukazi mu rwego rwo kubashyigikira. Batangaje ko hatsinze Claudia Naisabwa wo muri Kenya ndetse na Azeezah Hashim wo muri Kenya.

Producer Jean Pierre Irakoze [Kozze] wo muri Country Records yegukanye igikombe cya Producer wahize abandi mu batunganya amajwi y’indirimbo ‘Best Audio Producer East Africa’’ ni mu gihe studio ya Country Records ya Noopja yegukanye igikombe cya Studio nziza ‘Best Music Studio East Africa.'

Umuhanzi w’umunyarwanda Marchal Ujeku wamenyekanye cyane mu njyana gakondo yo ku nkombo yatashye yegukanye ibikombe bibiri mu byatanzwe.

Yegukanye igikombe cya ‘Best Culture Music- East Africa’ abicyesha indirimbo ye ‘Ntakazimba’ ndetse yegukana n’igikombe cya ‘Most Supportive/Best Real Estate Company Award’ abicyesha kompanyi yashinze yise ‘Marchal Real Estate’.

Ibi bihembo ‘East Africa Arts Entertainment Awards (EAEA)’ bigamije gushyigikira urugendo rw’iterambere rw’abahanzi bakorera umuziki ku mugabane wa Afurika, by’umwihariko mu Karere k’Afurika y’Iburasirazuba.

Mu 2022, Meddy yabaye umuhanzi rukumbi wegukanye igikombe muri ibi bihembo. Icyo gihe yegukanye igihembo cy’umuhanzi w'umwaka wo mu Rwanda wahize abandi [People's Choice artist of the year- Rwanda].

Umuhanzikazi w'umugore w’umwaka wahize bagenzi be mu 2022 (People's Choice Best Female Artist 2022) yabaye Nandy. Yahigitse Butera Knowless.

Mu 2023, Bruce Melodie yegukanye igihembo mu cyiciro 'People's Choice Best Rwandan Sound' abicyesha indirimbo ye yise 'Akinyuma'

Ni mu gihe Dj Brianne yegukanye igikombe mu cyiciro cy'umugore ukora umwuga wo kuvanga imiziki 'Peoples' Choice Female Deejay of the Year'

Bien-Aime wo mu itsinda rya Sauti Sol yegukanye igikombe cy'umwanditsi w'indirimbo w'umwaka [People's Choice Songwriter of the year].

Ni mu gihe Butera Knowless na Nel Ngabo begukanye igikombe cy'indirimbo ihuriweho 'People's Choice Collaboration Single of the year' babicyesha indirimbo 'Mahwi' bakoranye.

Diamond yihariye ibihembo! Yegukanye igikombe cy'umuhanzi w'umwaka [Artist of the year], icy'indirimbo ifite amashusho meza abikesha 'Yatapita', yabaye kandi umuhanzi w'umugabo w'umwaka wo muri EAC. Yari ahatanye mu byiciro 11.

Umukinnyi wa filime Amb. Isimbi Alliance yegukanye igikombe cy’umukinnyi wa filime uhiga abandi muri EAC

Indirimbo ‘Ni Forever’ yahesheje igikombe The Ben muri Kenya nyuma y’amezi atatu igiye hanze

Muyoboke Alex yakira igikombe cy’umujyanama uhiga abandi mu Karere k’Afurika y’Iburasirazuba. Uyu mugabo yafashije abahanzi benshi bakomeye barimo nka Tom Close, Davis D, Charly&Nina, Urbano Boys n’abandi benshi

Marchal Ujeku yegukanye ibikombe bibiri mu byatanzwe muri East Africa Entertainment Awards . Yavuze ko abikesha umuhate n’imbaraga yashyize mu muziki wubakiye ku buzima bwo ku Nkombo