Abirabura 8 b'ibyamamare bakize cyane ku Isi mu 2024-AMAFOTO

Kuwa Kabiri w'iki cyumweru Fores Magazine kabuhariwe mu gutangaza uko ubukungu bw'ibyamamare buhagaze n'uko bugenda buhindagurika. Yasohoye intonde ebyiri harimo urutonde rw'ibyamamare bikize cyane ku Isi, n'urutonde rw'abirabura b'ibyamamare bikize ku Isi mu 2024.

Kuri uru rutonde rw'abirabura 8 batunze amafaranga menshi ku Isi, rwahuriweho n'abasanzwe bafite amazina akomeye mu myidagaduro ndetse bari basanzwe bazwiho ko bakize, gusa icyahindutse ni uburyo bakurikirana bitewe n'umutungo bafite.

Umuraperi w'icyamamare Jay Z wari umaze imyaka 3 ayoboye ibyamamare bikize, kuri ubu yasimbuwe na Michael Jordan ndetse na Oprah Winfrey amuza imbere. Abashya biyongereye kuri uru rutonde barimo Magic Johnson na Lebron James.

Dore abirabura 8 b'ibyamamare bakize cyane ku Isi mu 2024:

1. Michael Jordan

Umunyabigwi mu mukino wa Basketball, Michael Jordan, uzwi kuri numero ya 23, wagiye unyura mu makipe menshi arimo 'Chicago Bulls', niwe uyoboye ibyamamare by'abirabura bikize cyane ku Isi. 

Uyu mugabo w'imyaka 61 afite umutungo wa Miliyari 3.2 z'Amadolari. Amafaranga menshi aherutse kuyinjiza ubwo yagurishaga ikipe ye ya Basketball yitwa Charlotte Hornets kuri Miliyari 3 mu 2023, mu gihe iyi kipe yayiguze mu 2010 kuri miliyoni 175 z'amadolari.

2. Oprah Winfrey

Icyamamarekazi kuri Televiziyo, Oprah Winfrey, umwanditsi w'ibitabo akaba anafite kompanyi OWP itunganya filime ni we ufite agahigo ko kuba yarabaye umwiraburakazi wa mbere watunze Miliyari y'amadolari mu 2003. Magingo aya Oprah Winfrey w'imyaka 70 atunze Miliyari 2.8 z'Amadolari.

3. Jay Z

Icyamamare mu muziki Shawn Carter, wamamaye nka Jay Z, ni umwe mu bahanzi bagannye ubucuruzi n'ishoramari bikabahira. Afite kompanyi ikora ibinyobwa bya 'Champagne' bizwi nka 'Armand de Brignac', afite indi ikora ibinyobwa bya 'Cognac' byitwa 'D'Usse'.

Afite kandi  inzu y'umuziki ya 'Roc Nation' ndetse Jay Z ni nawe ufite imigabane myinshi muri kompanyi y'ubutwazi ya 'Uber'. Kugeza ubu afite Miliyari 2.5 z'Amadolari. Uyu mutungo wa Jay Z ni uwe utavanze nuwa Beyonce umugore we.

4. Tyler Perry

Bamuhaye akabyiniriro ka 'King of Black Hollywood', Tyler Perry kabuhariwe mu gutunganya filime, kuzandika no kuzikina, akaba anafite sitidiyo nini ikinirwamo filime yubatse mu mujyi wa 'Atlanta'. Uyu mugabo uzwiho kwandika filime ziteye agahinda, kuri ubu atunze Miliyari 1.4 z'Amadolari.

5. Rihanna

Icyamamarekazi mu muziki, Rihanna, yateye intambwe nk'iya Jay Z wamwinjije mu muziki maze agana inzira y'ubucuruzi buramuhira. Afite kompanyi ikora ibikoresho by'ubwiza yitwa 'Fenty Beauty', n'indi ikora imyenda y'imbere y'abagore yitwa 'Savage X Fenty' biri kumwinjiriza agatubutse. Kuri ubu Rihanna atunze Miliyari 1.4 z'Amadolari.

6. Tiger Woods

Kizigenza mu mukino wa 'Golf', Tiger Woods, akaba ari nawe mwirabura wa mbere ufite ibikombe byinshi muri uyu mukino anafite kandi kompanyi ikora imyenda yitwa 'Sun Day Red' igira uruhare mu kumwinjiriza. Tiger Woods w'imyaka 48 afite Miliyari 1.3 z'Amadolari.

7. LeBron James

Icyamamare mu mukino wa Basketball, LeBron James, ukinira ikipe ya 'Los Angeles Lakers', niwe waciye agahigo ko gutunga Miliyari y'Amadolari agikina, mu gihe bagenzi be Michael Jordan na Magic Johnson, bayatunze baramaze guhagarika gukina. Magingo aya LeBron James w'imyaka 39 ufite imigabane mu ikipe ya Liverpool, atunze Miliyari 1.2 z'Amadolari.

8. Magic Johnson

Umunyabigwi muri Basketball, Magic Johnson, wabiciye bigacika mu ikipe ya 'Los Angeles Lakers', asanzwe afite ikipe yo muri NFL yitwa 'Washington Commanders' ndetse anafite kompanyi y'ubwishingizi yitwa 'EquiTrust' biri mu byimwinjiriza agatubutse. Magic Johnson w'imyaka 64 afite Miliyari 1.1 z'Amadolari.