Taylor Swift yinjiye mu bahanzikazi batunze Miliyari y'Amadolari

Taylor Swift wahiriwe n'umwaka wa 2023 wanawutangiye afite umutungo wa miliyoni 600 z'amadolari, kuri ubu yamaze kuba umu-miliyarideli nyuma yaho umutungo we utumbagiye abikesha ibitaramo bizenguruka Isi bya 'Eras Tour' aherutsemo hamwe na filime yabikozeho yitwa 'The Eras Tour Movie'.

Nk'uko byatangajwe n'ikinyamakuru Forbes Magazine kabuhariwe mu gutangaza imitungo y'ibyamamare, yatangaje ko magingo aya Taylor Swift yatangiye 2023 na miliyoni 600 z'amadolari, kuri ubu yamaze kugira umutungo wa miliyari 1.1 z'amadolari ($1.1 Billion).

Taylor Swift yamaze kwinjira mu bahanzikazi b'abaherwe ku Isi batunze Miliyari y'Amadolari

Uyu mutungo we ngo wiyongereye cyane bitewe n'amafaranga menshi yinjije mu bitaramo bya Eras Tour yakoreye mu bihugu by'Iburayi na Amerika akinjiza miliyoni 360 z'amadolari kuva yabitangira mu Kamena ya 2023. Taylor Swift kandi yinjije miliyoni 30 mu gihe gito gishize asohoye filime ishingiye kuri ibi bitaramo yakoze byasize inkuru. 

Yongeye kwinjiza miliyoni 10 z'amadolari nyuma yaho agurishije inzu yarafite mu mujyi wa New York. Aya mafaranga yose yinjije angana na miliyoni 400 z'amadolari asanga miliyoni 600 yarasanzwe afite.

Gutumbagira ku mutungo wa Taylor Swift arabikesha ibitaramo bizenguruka Isi aherutsemo yise 'The Eras World Tour' na filime ibishingiyeho

Taylor Swift w'imyaka 34 y'amavuko wabaye umunya-miliyari, byatumye aza ku mwanya wa 9 mu bahanzi bakize ku Isi mu gihe ari ku mwanya wa 34 mu bagore 100 bakize muri Leta Zunze Ubumwe z'Amerika. Forbes Magazine yatangaje ko umwihariko uyu muhanzikazi afite ari uko aya mafaranga yayakuye mu muziki, bitandukanye na Jay Z na Rihanna bafite kompanyi ku ruhande zibinjiriza akayabo.