Abarimo Prosper Nkomezi na Fred Mugisha bagaragaje ibyafasha umugabo ukijijwe kwiteza imbere

Iyi ni ingingo yaganiriwe binyuze mu ihuriro ry’abasore n’abagabo ryiswe King’s Men Conference ryabereye muri Kigali Convention Centre ku mugoroba wo ku wa Gatandatu tariki 23 Werurwe 2023.

Ni umugoroba watangiwemo ibitekerezo byafasha abasore cyangwa abakiri bato kwiyubaka mu buryo bw’ubukungu ndetse n’ubwa Gikirisitu bakavamo abagabo babereye u Rwanda n’umuryango muri rusange.

Prosper Nkomezi ni umwe mu baganirije abasore n’abagabo bitabiriye uyu muhuro. Uyu muhanzi wamamaye mu ndirimbo zirimo ‘Nzayivuga’ yagarutse ku bibazo abahanzi baririmba Gospel bahura nabyo ndetse asaba abashaka kuza muri uyu murimo kubanza kwitegura.

Ati “Ikibazo tugihura na cyo ni ukudashyigikirwa na bamwe mu ba Pasiteri n’abandi ariko iyo uzi icyo wateguriwe, uzi uwaguhamagaye urakomeza. Icyo nasaba urubyiruko ni uko iyo wamenye ko ari igihe cya nyacyo cyo gukora cyangwa gutangira umuhamagaro, uzabikore udashize amaso ku bantu uyashyize kuwaguhamagaye ibintu bizagenda neza.”

Akomeza ati “Hari igihe umuntu abyuka akavuga ngo ndashaka kuririmba nka runaka kandi mu by’ukuri iyo mpano ntayo ufite, ufite indi utarasobanukirwa ariko niba wiyumvamo iyo mpano byereke Imana, nanjye namaze igihe nandika indirimbo nkaziha abandi numvaga ko igihe cyanjye cyo kuririmba kitaragera.”

Pastor Jackson Mugisha umushumba wa Spirit Revival Temple akaba n’umushabitsi mu bijyanye n’ingendo n’ubihinzi avuga ko umukirisito ahura n’imbogamizi nyinshi mu mirimo isanzwe ndetse asubiza abibwira ko agomba kubeshya iyo ari ‘Business’ kugira ngo abone inyungu.

Ati “Imbogamizi ntizibura ariko ubasha kuzicamo bitewe n’uko wateguwe mbere y’uko winjira muri iyo mirimo nk’abantu dushingiye mu myemerere ikintu dukwiriye gushyiramo imbaraga ni ugutegurwa mbere y’uko tugira icyo dukora, mbere y’uko Dawidi aba umwami yabanje guca mu ishyamba.”

“Utegurwa mu mutwe ukiga neza kubyo ugiye gukora, amafaranga ubonye utarigeze uyategura aragucika, benshi mu bagabo bahora bibaza ngo ni iyihe Business nakora nkiteza imbere ariko banza urebe ngo ndi muntu ki? Ni iyihe mitekerereze igiye gutwara business.”

Pastor Jackson Mugisha ibikorwa afite yabanje kwiyubaka no gukora imirimo itandukanye harimo n’ibigo bya Leta yakuyemo inkunga imufasha gushinga ‘Business’ ze kugiti cye.

Jackson Mugisha yagarutse ku bimufasha guhuza umurimo w'Imana n’imirimo isanzwe akomoza ku batekereza ko muri ‘Business’ habamo amanyanga n’uburiganya bukorwa kugira ngo umucuruzi yunguke.

Yavuze ko igituma iyo mirimo igora benshi ari uko bayifata nk’imirimo atarimo Imana. Ati “Hari abantu batekereza ko utakira udatenitse, icyo nabwira ni uko ibintu bitarimo umugisha w’Imana ntibikora, wowe ukeneye imbaraga z’Imana kuruta uko watangira gutekereza ku kwirwanirira ukora ibyo bidakwiye, ku Mana ugaragaza imirimo yawe nayo igashyiraho imigisha yayo, ntabwo rero yayishyira ku bintu bitekinitse oya.”

Fred Mugisha rwiyemezamirimo mu bijyanye na Real Estate akaba umukozi w'Imana n’umwanditsi w’ibitabo yanditse icyitwa "Mapping of Choices", yasabye abakiri bato guhera ku bito bafite kuko aribyo bibategurira abo bazababo mu gihe kizaza.

Ati “Icyatumye nandika ni uko nunguka byinshi iyo ndi gusoma, umuntu abona n’umwanya wo kubitekerezaho neza, ubwanditsi ni ikintu kiramba kandi kikagera kure cyane, kuva nkiri muto nakundaga kwandika akantu kose numvise nkakandika nawe wabitangira ubu, utangira wandika ibikurimo, bigera aho bivamo indi nyandiko ikomeye.”

Ev Niwe Paulin wamamaye ku mazina ya NPC muri muzika mu njyana ya Hip Hop nyuma akaza gukizwa yifashishije inzira yatumye yakira agakiza mu gukangura urubyiruko rukeneye kwakira agakiza ariko rukizitirwa n’isura rufite muri sosiyete kubera ubusinzi.

Yasabye uwumva wese akeneye gukizwa kuza uko ari akinjira mu rusengero niyo yaba ari umusinzi kuko igihe kigera Imana ikamusanga agakizwa.

Yitanzeho urugero avuga ko nawe rimwe narimwe yagira ajya mu rusengero avuye mu kabari igihe kigeze areka ya miziki ye ya kera arakizwa ndetse atangira kwigisha ijambo ry’Imana.

King’s Men Conference ni ihuriro rihuriza hamwe abasore n’abagabo bakungurana ibitekerezo byabafasha kwiteza imbere bagakora ariko batavuye mu nzira y’agakiza.

Prosper Nkomezi witegura gukora igitaramo cye tariki 12 Gicurasi 2024, ni umwe mu baganirije abasore n'abagabo bitabiriye umuhuro wiswe 'King's Men Conference' 

EV Niwe Paulin wamamaye nka NPC mu njyana ya HipHop nyuma akaza gukizwa yifashishije inzira yatumye yakira agakiza mu gukangurira urubyiruko rukeneye kwakira agakiza ariko rukizitirwa n'isura rufite muri rubanda

Pastor Jackson Mugisha akaba n'umushabitsi, yavuze ko umukristo ahura n'imbogamizi nyinshi mu mirimo isanzwe, ariko byose bikemurwa no kuba yarabanje gutegurwa mbere yo gukora iyo mirimo 

Umwanditsi w'ibitabo Fred Mugisha yasabye abakiri bato guhera ku bito bafite kuko ari byo bibategurira abo bazaba bo mu gihe kizaza 

Abakiri bato bahawe umwanya wo kubaza ibibazo ku ngingo batumvise neza muri uyu mugoroba wafashije benshi kongera ubusabane n'Imana 

KANDA HANO UREBE INDIRIMBO PROSPER NKOMEZI YAKORANYE NA JAMES NA DANIELLA