Urutonde rwa 'Couples' 10 z'ibyamamare zikize ku Isi mu 2024-AMAFOTO

Nk'uko bisanzwe buri mwaka Forbes Magazine igenda itangaza imitungo y'ibyamamare mu byiciro bitandukanye, harimo n'ikiciro cya 'Couples' 10 zitunze agatubutse ku Isi. Izi Couples ariko ntibivuze ko arizo zikize cyane ku Isi ahubwo nizo zikize mu gisata cy'imyidagaduro.

Dore urutonde rwa 'Couples' 10 mu myidagaduro zikize ku Isi mu 2024:

1. Jay Z na Beyonce

Uru rutonde ruyobowe na Jay-Z n’umugore we Beyonce, babikesha akayabo k’Amadorali Miliyari 7.1 ($7.1 Billion)  binjije uko ari bombi. Umubare munini w’aya mafaranga, Beyonce n’umugabo we Jay-Z bayakuye mu muziki kurusha ibindi bikorwa bagiye basaruramo amafaranga. Aba bombi bamuritse Albums ndetse binjiza amafaranga atari make mu bitaramo bakoze bazenguruka ibihugu bitandukanye. Byongeye aba bombi banafite ibindi bikorwa by'ubucuruzi bibinjiriza agatubutse.

2. Salma Hayek na Francois Pinault

Icyamamarekazi muri Sinema, Salma Hayek ukomoka muri Mexico hamwe n'umugabo we w'Umufaransa w'umuherwe Francois Pinault nibo bari ku mwanya wa kabiri. Aba bombi barushinze mu 1995 bafite umutungo wa Miliyari 6 z'Amadolari. Aya bayinjije binyuze mu bikorwa bya Salma Hayek byo gukina filime, hamwe no muri kompanyi y'umugabo we yitwa Kering.

3. Oprah Winfrey na Stedman Graham

Umwe mu bagore bakomeye bamamaye kuri Televiziyo, mu kwandika ibitabo n'ishoramari, Oprah Winfrey, unasanzwe ari ku rutonde rw'abiraburakazi bakize ku Isi. We n'umugabo we Stedman Graham bamaranye imyaka irenga 30 bafite umutungo wa Miliyari 3.51 z'Amadolari.

4.Rihanna na A$AP Rocky

Icyamamarekazi mu muziki, Rihanna, usigaye yarayobotse ubucuruzi bwanamuhiriye, niwe muhanzikazi wa mbere ukize ku Isi na Miliyari 1.4 z'Amadolari, mu gihe umukunzi we Rocky bamaze kubyarana abana babiri afite umutungo wa Miliyoni 25 z'amadolari. Bombi umutungo wabo ungana na Miliyari 1.425 z'Amadolari ya Amerika.

5. Jennifer Lopez na Ben Affleck

Umuhanzikazi Jennifer Lopez n'umugabo we Ben Affleck uri mu bakinnyi ba filime bakomeye i Hollywood, nabo bari muri 'Couples' zikize ku Isi. Umutungo w'aba bombi ungana na Miliyoni 500 z'amadolari bombi bakuye mu bikorwa bya filime dore ko Jennifer Lopez amaze igihe mu gukina filime kurusha gusohora ibihangano bimwinjiriza.

6.David na Victoria Beckham

Victoria Beckham na David Beckham baje kuri  uyu mwanya. Aba bongereza b'ibyamamare binjije Miliyoni 450 z’Amadorali binyuze mu bikorwa byabo dore ko David acyinjiza agatubutse akura mu mupira w'amaguru, mu gihe umugore we Victoria abona amafaranga menshi binyuze mu nzu ye y'imideli.

7. Will Smith na Jada Pinkett Smith

Urugo rw'ibyamamare 2 muri sinema, Will na Jada Smith bari mu ngo zikunzwe kugarukwaho cyane mu itangazamakuru, nibo bari ku mwanya wa 7 n'umutungo wa Miliyoni 380 z'Amadolari ya Amerika. Bombi bakura agatubutse mu gukina filime ndetse na kompanyi yabo izitunganya yitwa 'Westbrook Production Company' nayo iri mu bituma binjiza amafaranga menshi.

8. Ryan Reynolds na Blake Lively

Abandi bashakanye basanzwe bakina filime ni Ryan Reynolds na Blake Lively, aba bombi bari mu bakunzwe muri Sinema ndetse banazwiho kuba bari mu bazikina bishyurwa amafaranga menshi. Bombi umutungo wabo urabarirwa muri Miliyoni 360 z'Amadolari.

9. Justin Bieber na Hailey Baldwin

Icyamamare mu muziki, Justin Bieber n'umugore Hailey Baldwin w'umunyamideli, uretse kuba bari mu ngo z'ibyamamare zivugwa cyane, bari no muzihagaze neza mu mutungo. Kuri ubu aba bombi bafite akayabo ka Miliyoni 320 z'Amadolari.

10. Kourtney Kardashian Baker na Travis Baker

Urugo ruza ku mwanya wa cumi (10) ni urwa Kourten Kardashian Baker usanzwe ari umunyamideli ubifatanya n'ubushabitsi hamwe n'umugabo we Travis Baker uzwi mu muziki wanamamaye mu itsinda rya 'Blink-182'. Aba bombi baherutse no kwibaruka imfura yabo, bafite umutungo wa Miliyoni 95 z'Amadolari.