Ibyo wamenya kuri William Lecerf w'imyaka 22 wegukanye agace ka Kane ka Tour du Rwanda 2024

Umubiligi William Junior Lecerf asanzwe ari umukinnyi wa Soudal Quick-Step Devo Team. Yahize bagenzi be yegukana aka gace kane kasorejwe i Rabavu, iwabo w’uruganda rweganga ibinyobwa bisembuye n’ibidasembuye rwa Bralirwa, rukora ibinyobwa birimo Amstel.

Agace ka Kane ka Tour du Rwanda kakinwe ku ntera y'ibilometero 93, ariko Pepijn Reinderink yakomeje kwambara umwambaro w'umuhondo (Yellow Jersey).

William Lecerf niwe wegukanye agace ka Kane ka Tour Du Rwanda kasorejwe i Rubavu

Mu nyandiko yanyujije ku rubuga rw’ikipe ye mu Ukuboza 2023, William wegukanye agace ka kane, yavuze ko kwitabira Tour du Rwanda ya 2023 aho yabaye uwa Gatatu byafunguye urugendo rw’inzozi ze, kandi byari ibihe byiza adashobora kwibagirwa.

Yavuze ko bwari ubwa mbere ageze mu Rwanda (Yahageze muri Mutarama 2023) ariko ‘narahakunze cyane’. Akomeza ati “Kandi abafana bari bishimye cyane. Baje ari benshi cyane, yaba aho twatangiriraga ndetse n’aho twasorezaga. Sinzigera ntibagirwa ririya siganwa, kandi nizeye ko nzakomeza kuhajya.”

Lecerf wishimiye intsinze ye yavuze ko yageze bwa mbere mu Rwanda mu 2023 akaba yarahakunze cyane

Uyu musore yavuze ko kuba yaramaze iminsi ibiri yambaye umwambaro w’Umuhondo (Yellow Jersey) ari ibintu adashobora kwibagirwa; kandi ni ibintu avuga ko yagezeho afashijwe n’ikipe ye kugeza ubwo yegukanaga umwanya wa Gatatu muri Tour du Rwanda ya 2023.

Ni muntu ki William Junior Lecerf wegukanye agace ka Kane muri Tour Du Rwanda uri no mubari kwitwara neza mu ikipe ya Soudal Quick-Step Devo Team?

William Junior Lecerf ni umubiligi w'imyaka 22 y'amavuko wavukiye mu mujyi wa Halle mu 2002. Areshya na metero 1.70 akaba anafite ibiro 54. Uyu musore ukiri muto ari mu bakinnyi bari kwitwara neza muri Tour Du Rwanda 2024, ndetse anafite agahigo ko kuba yarabaye uwa Gatatu muri Tour Du Rwanda 2023 ndetse nubu aracyagaragaza ishyaka ryo kuza muba mbere uyu mwaka.

Uyu musore muri Tour Du Rwanda 2023 yaje ku mwanya wa Gatatu

Kuba agaragaza ubuhanga mu irushanwa ry'amagare, ni ibintu biri gutangaza abatari bacye dore ko William Lecerf akiri muto nyamara amaze imyaka myinshi akora uyu mwuga. Ikinyamakuru Direct Velo cyo mu Bubiligi cyatangaje ko uyu musore yatangiye kwitoza afite imyaka 15 y'amavuko.

Mbere y'uko William Lecerf atangira kwitabira isiganwa ry'amagare bya kinyamwuga, yabanje kunyura mu makipe atandukanye arimo nka 'Zannata Cycling Team' mu 2019, 'Acrog-Balen BC Junior' yabayemo mu 2020 naho mu mu 2022 yabarizwaga mu ikipe ya CC Etupes.

Kuva mu 2023 William Lecerf yasinye amasezerano y'imyaka ine (4) yo gukinira ikipe ya Soudal-Quick-Step Devo Team ari nayo yaserukiye muri Tour Du Rwanda 2024. Bivuze ko iyi kipe itamwongeje amasezerano yazayisezeramo mu mwaka wa 2026.

William Lecerf aheruts kuba uwa Gatanu mu marushanwa y'amagare muri Saudi Arabia

Ikinyamakuru Global Cycling Network, cyatangaje ko William Junior Lecerf ari mu batwazi b'amagare bahabwa icyizere mu Bubuligi kuva mu 2018 yagaragara bwa mbere muri aya marushanwa. Mbere y'uko aza muri Tour Du Rwanda uyu mwaka, yarakubutse mu gihugu cya Saudi Arabia aho naho yitwaye neza.

Kuva ku itari 30 Mutarama 2024 kugeza ku itariki 3 Gashyantare 2024, William Lecerf hamwe n'ikipe ye Soudal-Quick-Step Devo Team bari bitabiriye amarushanwa ya 'AIULa Tour' yaberaga mu gihugu cya Saudi Arabia, aho William yaje ku mwanya wa 5.

Yegukana umwanya wa 5 yagize ati: ''Nitoje igihe kugira ngo ngere aha, kubona mbasha kuza kuri uyu mwanya ni inzozi zanjye ziri kuba impamo binyereka ko no kuza ku mwanya wa mbere bishoboka cyane'. Yanashimiye kandi bagenzi be barimo Remco Evenepoel wamufashije muri iri rushanwa.

Ku myaka 21 ahagaze neza mu batazwi b'amagare mu Bubiligi, ibintu yatangiye kwitoza afite imyaka 15 gusa

Hanze yo gutwara igare bya kinyamwuga, William Lecerf akunda gukora izindi siporo zirimo nko kurira imisozi miremire (Climbing) nk'uko akunze kubisangiza abantu 3,402 bamukurikira kuri Instagram. Uyu musore kandi udakunze kwerekana ubuzima bwe busanzwe, mu mafoto akoresha ku mbuga nkoranyambaga akunze kugaragaza ari kumwe n'imbwa ze.