Abahanzi bakomeye bamaze gutaramana n’abana bafashwa na Sherrie

Mu buryo ubona ko buteguye neza, Sherrie Silver akomeje kugaragaza ko impano z’abana bato zifashishijwe zishobora kugira icyo zivamo.

Ibi bikaba bikomeje kwigaragaza cyane muri gahunda yatangiye yo guhuza abo afasha n’abahanzi bakomeye mu muziki nyarwanda.

Aho urubyiruko afasha ruba rwarateguye imbyino n’indirimbo z’abahanzi bagenderera umuryango ayoboye, abahanzi babasuye bakagira umwanya wo kuririmbana nabo.

Haba kandi n’umwanya wo kubaza ibibazo ku babifite byibanda ahanini ku buryo bashobora nabo guteza imbere impano zabo bashingiye ku bisubizo bahabwa.

Kugeza ubu abahanzi bamaze gutaramana n’aba bana nk'uko bigaragara ku mbuga nkoranyamba za Sherrie Silver byumwihariko kurwa YouTube akurikirwaho n’abarenga ibihumbi 654.

The Ben ni we wabimburiye abandi mu gihe cy’ukwezi amashusho ari kuri YouTube amaze kurebwa inshuro ibihumbi 298.

Abandi barimo Bruce Melodie, Chriss Eazy, Element, Kevin Kade na Danny Nanone ukaba ubona ko ari igikorwa cyiza kizatanga umusaruro gitanga kuko guhererekana ubumenyi mu bisekuru by’ubuhanzi ari akabando kahazaza habwo.

Incamake y’Ubuzima bwa Sherrie Silver

Sherrie Silver yabonye izuba mu 1994 kuri Nyina, Florence Silver na Se wazize Jenoside yakorewe Abatutsi.

Silver n’umubyeyi yari asigaranye bimukiye mu Bwongereza afite imyaka 5.

Yize ibirebana n’ubuhanzi bushingiye ku kinamico, aba umwe mu bashinze itsinda ry’ababyinnyi afite imyaka 11. Yaje kwerekana ubuhanga afite imbere ya Perezida Kagame.

Uyu mubyinnyi akaba yarasoje Kaminuza mu birena n’Ubucuruzi n’Iyamamazabikorwa.Yaciye agahigo ayobora imbyino z’indirimbo ya Childish Gambino yise This Is America yabaye ikimenyabose ikanegukana igihembo muri MTV Video Music Awards 2018.

Silver afitanye imikoranire n’Umuryango w’Ababibumbye binyuze mu Kigega Mpuzamahanga mu Iterambere ry’Ubuhinzi ibi byanatumye mu mwaka wa 2019 agira amahirwe yo guhura na Papa Francis.

Yagiye agaragara mu bikorwa bitandukanye birimo n’ibitataramo bikomye yaba mu Rwanda no hanze yarwo, yanubakiwe ikibumbano rwagati muri London kubera ubuhanga bwe mu mibyinire.

Mu 2023 yagaragaye mu mashusho yakwirakwiye ahantu henshi byumwihariko muri Afurika yigisha kubyina Umuyobozi Mukuru w’Ishami ry’Umuryango w’Ababibumbye ryita ku buzima, Tedros Adhanom Ghebreyesus.

Byinshi ku muryango ufasha abana yatangije

Uyu muryango ugamije gufasha no kwigisha urubyiruko mu buryo bugamije kububaka ku bw’ejo hazaza habo heza.

Ukaba wubakiye ku mahame n’imyizerere ya Silver ko abana bose bakwiye kubona iby’ibanze mu buzima kandi n’uburezi buboneye.

Muri ubwo buryo uyu muryango ugenda ukora uko ashoboye ugafasha abana kubona amafaranga y’ishuri n’ibindi nkenerwa hibandwa kubaturuka mu miryango ikishakisha.

Muri gahunda bafite kandi harimo kuzamura impano z’abahanzi bakiri bato muri iyi minsi ukaba ubona ko ari nayo gahunda bashyizemo imbaraga mu buryo ubona buteguritse uhereye mu kubyina no kuririmba.

Uyu mubyinnyi wabigize umwuga akanaba umuhanga mu byerekeranye n’ubuhanzi yizera ko ubuhanzi bushobora kuba inzira yakomora ibikomere byatewe cyangwa biterwa n’intambara n’ubukene.

Amasomo abandi bashoboye bakwiye kwigiraho

Kuzamura abenyempano yaba mu mideli, umuziki, ubukorikori, ubugeni, kubyina n’ibindi.

Kurema ibishya bidasanzwe mu Rwanda mu rwego rwo gukomeza gufasha abanyempano batari bake bahari.Abahanzi bakomeje kujya gutaramana n'abana bafashwa na Sherrie Silver bakanagira umwanya w'ibiganiro