Somalia:Umusirikare yahitanye bagenzi be barimo gusenga

Ku wa Gatandatu  tariki ya 10 Gashyantare 2024, Umusirikare wa Leta ya Somalia yarashe bagenzi yicamo abagera kuri batanu. Ayo mahano yayakoreye i Mogadishu mu murwa Mukuru wa Somalia ubwo bagenzi be barimo n'abasirikare batoza Ingabo z'icyo gihugu barimo gusenga.

Abasirikare yarashe  barimo aba Leta ya Somalia ndetse n'abasanzwe bafasha iki gihugu mu myitozo ya gisirikare  kugira ngo cyunguke ubumenyi n'ubushobozi bwo guhangana n'ibitero by'iterabwoba.

Nubwo abakozi b'ibitaro byo mu murwa Mukuru wa Somalia babwiye Reuters ko abo basirikare bishwe n'umusirikare mugenzi wabo ,Minisiteri y'Ingabo muri Leta Zunze Ubumwe z'Abarabu yo yatangaje ko abasirikare bayo batatu n'umwe wa Bahrain baguye mu gitero cy'abakora iterabwoba muri Somalia mu gihe  barimo gukoresha imyitozo abasirikare ba Leta  y'icyo gihugu.

Amakuru avuga ko abandi basirikare ba Leta Zunze Ubumwe z'Abarabu nabo bakomerekejwe nayo masasu yarashwe n'umusirikare wari umaze igihe gito atorezwa mu kigo cya gisirikare cyitwa Gordon kigenzurwa n'Ingabo za Leta Zunze Ubumwe z'Abarabu.

Amakuru avuga ko uwo musirikare winjiye mu Gisirikare cya Leta ya Somalia avuye mu mutwe w'intagondwa wa Al Shabaab yahengereye bagenzi be barimo gusenga abamishaho urufaya rw'amasasu.

Umutwe wa Al Qaeda ukorana bya hafi na Al Shabaab wigambye icyo gitero utangaza ko cyahitanye abasirikare 17.

Uwo musirikare warashe bagenzi be nawe yapfuye arashwe nyuma y'uko yari amaze kwica abasirikare batatu ba Leta Zunze Ubumwe z'Abarabu,umwe wa Leta ya Somalia ndetse n'umunya-Bahrain.

Ivomo: Reuters