‘Couple’ 10 z’ibyamamare zigezweho mu Karere mu rukundo-AMAFOTO

Kugeza ubu hari ‘Couple’ ziri guca ibintu harimo izimaranye iminsi n'izirimo kwiyubaka wanakwitegaho amakuru yihariye muri uku kwezi kwahariwe abakundana by’umwihariko ku munsi wa Saint Valentin.

InyaRwanda yabegeranirije zimwe muri 'Couples' zikomeje kugarukwaho cyane mu Karere ka Afrika y'Uburasirazuba mu bihugu birimo Tanzania, Kenya na Uganda, ibihugu ubona ko n’imyidagaduro ishingiyeho mu Karere.

1.  Harmonize na Poshy QueenRajab Abdul Kahali [Harmonize] ari mu munyenga w’urukundo na Jacqueline Obed [Poshy Queen] ufite nyina w’umunyarwandakazi na se w’umunya-Tanzania.

Inkuru y’urukundo rwabo ikaba yaraje nyuma yuko uyu muhanzi yari amaze iminsi avugwa mu nkuru n’abarimo Yolo The Queen, Bijou Dabijou na Laika bose bafite inkomoko mu Rwanda.

Mbere yabo yari ari mu munyenga w’urukundo na Frida Kajala bakanyujijeho mu byiciro bibiri ariko bikaza kurangira batandukanye.

Uyu muhanzi kandi yabanyeho nk’umugabo n’umugore na Sarah Micherotti wo muri Italy aza no gukundanaho na Briana Jai ikizungerezi cyo muri Australia.

2.  Diamond Platnumz na ZuchuInkuru y’urukundo ya Nasibu Abdul Juma Issack [Diamond Platnumz] na Zuhura Othman Soud [Zuchu] basanzwe bafitanye imikoranire

Inkuru y’urukundo rwabo yatangiye bamwe bayibonamo ubucuruzi ndetse hari n'abakiyibona batyo, nyamara aba mu bihe bitandukanye baba basangiza ababakurikira ibihe byiza bagiranye.

Usanga basomana bya hato na hato, ubundi bakagirana ibihe byiza yaba mu biruhuko by’isabuku y’amavuko no mu birori bitandukanye bafatanye ikiganza mu kindi.

3.  Zari Hassan na Shakib Lutaaya

    Zarinah Hassan umushabitsi wabigize umwuga utunze za Miliyari zitagira ingano akaba umubyeyi w’abana batanu ku myaka ye irenga ibinyacumi bine, amaze gukundana n’abasore n’abagabo batari bacye.

Kuri ubu uyu mugore ari mu rukundo na Shakib Lutaaya arusha ikinyacumi cy’imyaka, ibintu abantu bamwe batashimye, nyamara we agakomeza kugaragaza ko urukundo rwerecyera aho rushaka.

Shakib na Zari babana nk’umugabo n’umugore kuko basezeranye imbere y’Imana. Mu bihe bitandukanye mu kazi kibanda mu gutegura ibirori no kwamamaza uyu mugore ajyamo yaba muri Africa no hanze yayo bakunda kuba bari kumwe.

4.  Hamisa Mobetto na Kevin SowaxHamisa Hassan Mobetto umushabitsi wamamaye mu marushanwa y’ubwiza akaba yarashoye mu birebana n’imideli ari mu munyenga w’urukundo n’umushoramari ukomoka muri Togo, Kevin Ahyi-Sena [Kevin Sowax].

Urukundo rwabo rwaje nyuma yuko Hamisa yari amaze igihe avugwa mu nkuru z’urukundo na Rick Ross, ibintu yakomezaga guhakana nyamara amashusho bari kumwe n’amagambo y’urukundo y’umuraperi agakomeza kugaragaza ibitandukanye.

Ku myaka ya 29, Hamisa afite abana 2, umukobwa Fantasy Majizzo yabyaranye na Francis Ciza n’umuhungu Deedalayan Abdul Naseeb yabyaranye na Diamond.

5.  Marioo na Paula Kajala

Omary Ally Mwanga [Marioo] uri mu bahanzi bihagazeho muri Tanzania, ari mu munyenga w’urukundo na Paula Kajala w’imyaka micye nyamara wamaze kubaka izina.

Uyu mukobwa wakundanye n’ibyamamare bitandukanye nka Rayvanny, kuri ubu we n’umukunzi we Marioo baritegura kwibaruka imfura yabo.

6.  Bahati na Diana Bahati

Kevin Kioko [Bahati] ari mu baramyi bafite imyitwarire igezweho aho gukorana cyangwa kwitwara nk’abahanzi basanzwe ari ibintu yihariye.

Urukundo rwe na Diana Marua [Diana Bahati] rutigisa imbuga kubera udushya bombi bahorana nk'aho mu minsi iheruka uyu mugore yatunguye umugabo we amwambika impeta.

Yasobanuye ko iyo mpeta ari iyo kumushimira ko adahwema kuba uw’ingenzi kuri we no kumukorera udushya tudasanzwe dutuma ahora yumva bagumana.

7.  Bien-Aime Baraza na Chiki Kuruka

Bien-Aime Baraza ari mu banyamuziki beza Africa ifite bishimangirwa n’umumaro ukomeye yagize mu kubaho no kwiyubaka kwa Sauti Sol.

Byose yabifashijwemo na Chiki Kuruka umugore we akanamuba hafi mu bikorwa bya buri munsi nk’umujyanama wihariye.

Ubuzima babanamo n’amagambo bakunda gusangira aryohereye babinyujije ku mbuga nkoranyambaga, bituma bagaruka kenshi mu bitangazamakuru by’ingeri zose mu Karere.

8.  Rema Namakula na Dr Hamza SebunyaRema Namakula ari mu bahanzikazi bihagazeho akaba yarakanyujijeho mu rukundo na Eddy Kenzo banabanyeho ariko baza gutandukana bamaze kubyarana umwana w’umukobwa.

Muri 2019 uyu mugore yasezeranye na Dr Hamza bafitanye umwana w’umukobwa. Bakunze gusangira ubuzima ari nako baterana imitoma y’urudaca by’umwihariko mu bihe by’iminsi mikuru irimo iy’isabukuru.

9.  Teta Sandra na Weasel

Teta Sandra ari mu bari n’abategarugori bihagazeho mu myidagaduro y’Akarere by’umwihariko ya Uganda n’u Rwanda bishingiye ku marushanwa y’ubwiza yanyuzemo n’ubuhanga bwe mu gutegura ibirori n’ibitaramo.

Bitari ibyo gusa kuba ari umugore wa Dougla Mayanja [Weasel] biri mu byarushijeho gutuma izina rye rizamuka cyane. Inkuru y’urukundo rw'aba bombi yagiye inazamo ibihe by’ibibazo byanatumye na Leta zibyinjiramo, iri mu zihariye.

Muri iyi minis aba bombi bari mu bihe byabo byiza aho baba basangiza ababakurikira amafoto bishimye ku minsi mikuru no mu bindi bikorwa.

10.              Rickman Manrick na Sheilla Gashumba

Sheillah Gashumba mu myaka itari micye amaze mu ruganda rw’imyidagaduro, yagiye akundana n’abagabo n’abasore batandukanye barimo umushoramari Onyango Gareth.

Umuhanzi Yung Mullo uri mu bashinze imizi mu njyana ya Reggae yigeze kwigarurira umutima wa Sheilla, yigeze kandi kujya mu rukundo n’umuhanzi Toniks, umuvanzi w’umuziki kabuhariwe Baby Love n’umuhanzi Baby Love.

Kuri ubu ari mu rukundo n’umuhanzi Ebengo Naliwanika [Rickman Manrick] bamaze imyaka itari micye bakundana, bakaba bakunze gusohokana mu bice birimo Dubai n'ahandi.