Umukinnyi ukomoka muri Uganda, Joakim Ojera wakinaga ikipe ya Rayon Sports, yerekeje mu ikipe ikina shampiyona y'icyiciro cya mbere mu Misiri ya Al Mokawloon Al Arab SC.
Kuri uyu wa Gatandatu ni bwo aya makuru yagiye hanze ndetse n'ikipe ye Murera yakinagamo iza kubyemeza imushimira binyuze ku mbuga nkoranyambaga zayo.
Joakim Ojera ukina anyuze ku mpande yatanzweho agera kuri miliyoni 20 z'amafaranga y'u Rwanda nk'uko amakuru abivuga ndetse ari kwitegura guhita ayerekezamo dore ko atazanagaragara ku mukino Rayon Sports ifitanye na Police FC mu gikombe cy'Intwari kuri iki Cyumweru.
Uyu mukinnyi yageze muri Rayon Sports mu kwezi kwa mbere ku mwaka ushize wa 2023 avuye mu ikipe yiwabo yo muri Uganda ya URA FC nk'intizanyo y'amezi 6.
Nyuma yaje kwitwara neza bituma mu mpeshyi ahita asinyishwa amasezerano y'umwaka umwe (1) kuri miliyoni 25 zari zatanzwe n'abafana ba Rayon Sports.
Ikipe ya Al Mokawloon Al Arab SC isanzwe ikina icyiciro cya mbere cyo mu Misiri kuri ubu ikaba iri ku mwanya wa 16. Yashinzwe mu 1973 ikaba yakirira kuri sitade yitwa Osman Ahmed Osman Stadium ifite ubushobozi bwo kwakira abantu ibihumbi 35 aho iherereye mu murwa mukuru i Cairo.
Joakim Ojera yerekeje mu Misiri
Eng
RSS 
TANGA IGITECYEREZO