Ice Spice na Doja Cat mu bazaririmba mu iserukiramuco rya Coachella 2024

Iserukiramuco rya muzika n’ubuhanzi rya Coachella ryagarutse muri Empire Polo Club muri Indio, Calfornia, aho rizaba riba muri ‘weekend’ ebyiri kuva 12 - 14 Mata na 19 Mata - 21 Mata 2024.

Kuri uyu wa Kabiri tariki 16 Mutarama 2024, ni bwo hatangajwe urutonde rw’abanyamuziki bazasusurutsa imbaga y’abazitabira iserukiramuco rya muzika n’ubuhanzi rya Coachella.

Mu baje mu myanya ya mbere ku rutonde, harimo Tyler, the Creator, Doja Cat, Lana Del Rey, itsinda ry’abanyamuziki rya No Doubt n’abandi.

Ku minsi ibiri yo kuwa Gatanu, ni ukuvuga tariki 12 na 19 Mata 2024, biteganijwe ko abarimo Lil Uzi Vert, Justice, Bizarrap, Deftones, ATEEZ, Everything Always, Peggy Gou, Young Miko, Sabrina Carpenter, Lana Del Rey waherukaga kuririmba muri ibi birori  mu 2014 n'abandi aribo bazahurira ku rubyiniro.

Ni mu gihe ku ya Gatandatu ibiri (tariki 13 na 20 Mata), abazitabira bazasusurutswa n’abarimo Ice Spice, Tyler (the Creator), Blur, Gesaffelstein, Sublime, Jungle, Dom Dolla, Bleachers, Grimes, Jon Batiste n’abandi.

Iminsi ibiri yo ku Cyumweru tariki 14 na 21 Mata, izayoborwa na Doja Cat afatanyije na J Balvin, Jhené Aiko, Khruangbin, Carin León, John Summit, Lil Yachty, DJ Snake, LUDMILLA, The Rose n’abandi.

Itsinda rya No Doubt na ryo riri kuri uru rutonde, rigiye kongera guhura nyuma y’imyaka isaga icyenda.

Amatike yo guhera ku madolari 499 yo kwinjira muri iri serukiramuco yo muri weekend zombi yashize muri Kamena 2023.

Nk'uko ikinyamakuru Variety kibitangaza, ngo Dua Lipa na Shakira nabo bagombaga kugaragara muri iri serukamuco, ariko Dua Lipa aza kwikura ku rutonde ku bw'impamvu z'igihe, mu gihe abategura ibirori bahise bemeza Shakira.

Iri serukamuco rya muzika, ni rimwe mu maserukiramuco manini muri Amerika y'Amajyaruguru.

Coachella, ni iserukamuco ngarukamwaka ry'umuziki n'ubuhanzi ribera muri Empire Polo Club muri Indio muri Leta ya Calfornia, mu kibaya cya Coachella mu butayu bwa Colorado. 

Ryatangijwe bwa mbere na Paul Tollett na Rick Van Santen mu 1999. Kuri ubu, ritegurwa na Goldenvoice, ishami rya AEG Presents.

Doja Cat, Tyler The Creator, na Lana Del Rey mu bazataramira abazitabira iserukiramuco rya Coachella 2024

Iserukiramuco rya Coachella ryagarutse