Josh Ishimwe n’itorero Intayoberana mu bategerejwe mu iserukiramuco ‘Iteka African Cultural’

Rigiye kuba ku nshuro ya kabiri, kandi ritegurwa n’umuryango Iteka Youth Organization ukorera mu Rwanda ku nsanganyamatsiko igira iti “Art, a Tool for Humanity.”

Rifite intego yo kugaragaza impano no kumenyekanisha umuco nyafurika, kugaragaza uruhare rw’umuco mu kongera kubaka no gusigasira ubumwe.

Muri rusange rirangwa n’ibikorwa birimo imbyino, ubugeni, imyambarire, ikinamico n’ibindi binyuranye bifasha abaryitabira gususuruka.

Bigaragara ko kuri iyi nshuro rizaririmbamo abahanzi barimo Josh ishimwe, Michael Makembe, Itorero Himbaza Club, Itorero Intayoberana, Chorale Christus Regnat, Abeza b’Akaranga, Umuti Arts n’abandi banyuranye bazatangazwa mu minsi iri imbere.

Iri serukiramuco ry’imbyino n’umuco rizatangira tangira tariki 24 Mutarama 2024 kugeza tariki 27 Mutarama 2024; bivuze ko rizamara iminsi ine.

Rizabera kuri Institut français du Rwanda ku Kimihurura, Campus Remera (KIE) ndetse no muri Kigali Conference and Exhibition Village ahazwi nka Camp Kigali.

Kuri Institut français hazabera gahunda yiswe ‘School Intercultural Talents’ aho ibigo by’amashuri bizahatana mu marushanwa ashamikiye ku muco n’ubugeni. Hazanabera imurikagurisha ry'ibikorwa binyuranye.

Bazaganira ku burenganzira bw’umwana no kwirinda ikoreshwa ry’ibiyobyabwenge mu rubyiruko.

Umuyobozi wa Iteka African Cultural Festival, Niyonzima Yannick yabwiye InyaRwanda ko bongeye gutegura iri serukiramuco bashingiye ku kuntu inshuro ya mbere yagenze.

Yagize ati “Ibyo twishimira ni byinshi ni nayo mpamvu twagize imbaraga zo kongera gutegura iri serukiramuco ku nshuro ya kabiri ndetse tukazanakomeza buri mwaka. Kuba yarabaye ubwabyo turabyishimira kuko zari inzozi twari dufite zabaye impano.”

Akomeza ati “Twageze ku ntego twari twihaye yo guhuriza hamwe abahanzi n’abantu batandukanye bo muri Afurika bafite impano zitandukanye ku bijyanye n’umuco no guhana ibitekerezo ku kuntu umuco wagira uruhare mu iterambere rirambye rya afurika.”

Niyonzima Yannick yanavuze ko ku nshuro ya mbere abitabiriye iri serukiramuco, babonye uburyo imico y’ibihugu ikungahaye, kandi bongera guhura no gusabana, banabona impano nshya mu muziki.

Ati “Abantu bayitabiriye ku nshuro ya mbere bagize ibyishimo bongera kandi gukunda umuco nyafurika, banabonye impano nyinshi zihishe badakunze kubona haba mu mideli, imbyino mu muziki n’ibindi.”

Yavuze ko ibi byose byabagejeje ku ntego bari bihaye yo ‘guhuriza hamwe abantu bafite imico itandukanye’.

Akomeza ati “Aribyo bituganisha ku bumwe n’iterambere bakabona ko Afurika ifite ubutunzi bwinshi tugomba gusigasira kandi tukabubyaza umusaruro mu gukemura ibibazo biduhanze harimo ubukene ku isonga.”

Kwinjira ni ibihumbi 5000 Frw kandi amatike araboneka ku rubuga rwa www.rgtickets.com, aho iri serukiramuco rizasozwa n'igitaramo gikomeye kizabera muri Camp Kigali.

Iri serukiramuco rizaba kuva tariki 24-27 Mutarama 2023 ribera ahantu hanyuranye

Josh Ishimwe uherutse gusohora indirimbo zirimo 'Nzohaguruka Ndirimbe ategerejwe muri iri serukiramuco ry'imbyino n'umuco 

Itorero Intayoberana riherutse gukora igitaramo cy'abo bwite bategerejwe mu iserukiramuco 'Iteka African Cultural' 

Umunyamuziki Michael Makembe wigaragaje mu myaka ibiri ishize nyuma yo kunyura muri ArtRwanda-Ubuhanzi ategerejwe muri iri serukiramuco 

Himbaza Club yamenyekanye cyane kuvuza ingoma ndundi itegerejwe muri iri serukiramuco