Kirikou na Double Jay bimaze agahinda bakorana indirimbo na Chriss Eazy

Aba bahanzi bamaze iminsi mu Rwanda aho bari bitabiriye igitaramo cyo kumurika Album ‘Suwejo’ cy’umuhanzi akaba n’umunyamakuru Yago cyabereye muri Kigali Conference and Exhibition Village ahazwi nka Camp Kigali, ku wa 23 Ukuboza 2023.

Bagaragaje ko batishimiye ibyababayeho muri kiriya gitaramo. Ni nyuma y’uko Dj Phil Peter acuranze indirimbo ya Yago ubwo Double Jay yari ku rubyiniro bigatuma avaho adasoje kuririmba.

Kirikou wari ukubutse mu bitaramo mu Burayi,ubwo nawe yari kuri ‘Stage’ Phil Peter yavuye ku rubyiniro by’igihe gito atamucurangiye.

Ubwo Kirikou yabonaga ko Phil Peter atari ku rubyiniro, yavuze ko ibyo Dj amukoreye atari byiza mu gihe ari imbere y’abafana. Ati “Dj ibyo ukoze si byiza.”-Muri ako kanya, Phil Peter yahise agaruka ku rubyiniro, akomeza kumucurangira.

Ibi byatumye Phil Peter yibasirwa cyane ku mbuga nkoranyambaga, ibitangazamakuru byo mu Burundi byandika bigaragaza ko abahanzi b’iwabo basuzuguwe.

Aba bahanzi nabo bifashishije imbuga nkoranyambaga zabo, bagaragaje ko batishimiye ibyo Dj Phil Peter yabakoreye.

Umwe mu bahanzi bari guhurira ku rubyiniro muri iki gitaramo, harimo na Chriss Eazy utarabashije kuboneka ku mpamvu yasobanuye mu itangazo yageneye abanyamakuru.

Nubwo atabashije kuririmba muri iki gitaramo, uyu muhanzi yabwiye InyaRwanda ko yagize igitekerezo cyo guhuriza mu ndirimbo na Double Jay na Kirikou mu rwego rwo ‘kugaragaza ko nta kibazo abahanzi b’i Kigali bafitanye n’abo mu Burundi’.

Yavuze ko iyi ndirimbo yakozwe mu buryo bw'amajwi na Producer Kiiiz muri Country Records, kandi bayitezeho gukundwa ashingiye ku kuntu bayikoze.

Uyu muhanzi atangaje ikorwa ry’iyi ndirimbo, mu gihe ari kwitegura kujya gutaramira mu Burundi, mu gitaramo giherekeza umwaka kizaba ku wa 31 Ukuboza 2023 kuri Source du Nil.

Chriss Eazy wamamaye mu ndirimbo zirimo ‘Amashu’ amaze igihe ataramira mu Burundi akahacana umucyo, ndetse anafitanye indirmbo na Kirikou bise ‘Lala’.

Chriss Eazy yatangaje ko yatangiye umushinga w’indirimbo na Double Jay na Kirikou Akilli

Double Jay yagaragaje ko atishimiye uburyo yavuye ku rubyiniro mu gitaramo cya Yago 

Kirikou Akilli yababajwe n’uburyo Phil Peter atamucurangiye indirimbo mu minota ya mbere

Ni ku nshuro ya kabiri, Kirikou agiye gukorana indirimbo na Chriss Eazy nyuma ya ‘Lala’

KANDA HANO UREBE AMASHUSHO Y’INDIRIMBO ‘LALA’ YA CHRISS EAZY

">

KANDA HANO UREBE AMASHUSHO Y’INDIRIMBO 'NCOKOZA' YA DOUBLE JAY