Kigali ntiyatanzwe! Injira mu bihe 10 bidasanzwe byaranze imideli mu 2023 - AMAFOTO

U Rwanda, ni igihugu gikataje mu iterambere kandi kigenda kibigaragaza mu nzego zitandukanye uko bwije n’uko bukeye. Muri uyu mwaka, igisata cy’imyidagaduro muri rusange cyaranzwe n’ibihe byinshi bidasanzwe mu mateka y’u Rwanda.

Muri uyu mwaka kandi, ababarizwa mu ruganda rw’imideli bakoze ijoro n’amanywa bitewe n’ibikorwa byinshi byawubayemo bigatuma akazi kiyongera.

Dore ibihe bidasanzwe 10 byaranze imideli mpuzamahanga mu 2023 InyaRwanda yaguhitiyemo uyu munsi:

1.     Imyambarire ya Miss Universe 2023

Kuva Mitchel Ihueze yagera muri EL Salvador mu marushanwa ya Miss Universe 2023, yagaragaje itandukaniro mu myambaro ye yihariye yo muri Nigeria. Amarushanwa ageze ku musozo, uyu mukobwa yashyize imyambarire ye ku rundi rwego maze ahuza ibintu by'ibanze byarangaga abamikazi 3 bazwi cyane bagize uruhare rukomeye mu ruganda rw’imideli muri Nigeria.

Yahuje kandi imyambaro y’abakozi b'umwamikazi Moremi na mask y’umwamikazi Idia, mask yateje impaka mu gitaramo cya Rema yakoreye kuri 02 Arena, hamwe n'igitambaro cya Amina, Umwamikazi wa Zazzau.

2.     Imyambarire ya Rihanna muri Super Bowl 2023

Atwite, umuhanzikazi Rihanna yatambutse ku rubyiniro mu myambaro myiza itukura, mu birori bya Super Bowl 2023. 

Kubera ukuntu iyi mbambarire yakunzwe n’anatari bake, nayo ntishobora kwibagirana mu byaranze imideli muri uyu mwaka.

3.     Doja Cat muri Schiaparelli's Paris Fashion Week show

Umuraperikazi yihariye ibirori byo gusoza icyumweru cyahariwe imideli i Paris, ubwo yahasesekaraga yisize irange ry’umutuku umubiri we wose kuva ku mutwe kugera ku birenge.

4. Imyambarire idasanzwe ya Gigi Hadid muri Jacquemus

Kimwe mu bihe bitazibagirana mu Isi y’imyambarire muri uyu mwaka ni uku kwamamaza kwa Jacquemus kwamamaye aho Gigi Hadid yakorewe imyambaro kugira ngo agaragare neza cyane mu rwego rwo kwitegura kwerekana imideli yabo 'ChouChou' muri Kamena.

5.     Imyambarire ya Beyoncé muri Renaissance Tour

Uretse imyambarire ihanitse ya Taylor Swift muri ‘Eras Tour,’ umuhanzikazi Beyoncé nawe yaciye impaka yambara imyambaro yihariye mu bitaramo yise ‘Renaissance Tour.’

6.     Rawdah Mohamed mu iserukiramuco rya sinema rya Cannes

Umunyamideli wavukiye muri Somalia,Rawdah Mohamed yatambutse ku itapi itukura mu mwambaro umeze nk’uwabageni ariko na none wihariye, mu iserukiramuco rya sinema rya Cannes ryabaye muri uyu mwaka.

7. Imigaragarire ya Margot Robbie muri filime ya ‘Barbie’

Imyambire n’imigaragarire ya Margot Robbie mu itangizwa rya filime yakunzwe cyane muri uyu mwaka yiswe ‘Barbie,’nayo iri mu bidasanzwe byaranze imideli mu 2023.

8. Imyambarire idasanzwe y’abitabiriye Met Gala 2023

Mu byamamare byatambutse mu myambarire idasanzwe ku itapi itukura harimo, Rihanna n’umugabo we A$AP Rocky, Camilla Morrone, Anne Hathaway, Anok Yai, Michaela Coel n’abandi.

9. Imyambarire y’ibyamamare byitabiriye itangwa ry’ibihembo bya VMAS 2023

Bimwe mu bihembo bya muzika bikomeye ku Isi, byitabirwa n’ibyamamare bitandukanye. Mu birori by’uyu mwaka, ibyamamare byari byambaye mu buryo  butangaje harimo umuraperikazi Nicki Minaj, Selena Gomez, Shakira, Doja Cat, Megan Thee Stallion, Cardi B, Demi Lovato, Selena Gomez, Ashanti, Nicky Hilton n’abandi benshi.

10. Imyambaro ya ‘Made in Rwanda’ muri Trace Awards 2023

Ibori bidasanzwe biherutse kubera i Kigali mu Rwanda byatangiwemo ibihembo bya Trace, byasize byerekanye ko urwego rw’imideli mu Rwanda rumaze kugera ku yindi ntera. Muri ibi birori byamaze iminsi ibiri, ndetse n’ibindi birori mpuzamahanga byabereye mu Rwanda muri uyu mwaka, haba anayarwanda n’abanyamahanga bose bagiye bagaragara bambaye imyambaro yakorewe mu Rwanda kandi myiza mu buryo bwihariye.