Hariho indirimbo yahimbiye Perezida Kagame na Madamu! Byinshi kuri Album Muyango agiye kumurika-AMAFOTO&VIDEO

Niyo Album ya mbere agiye kumurika yakoze ari wenyine adafatanyije n’itorero ‘Imitari’ bakoranye mu bihe bitandukanye cyane cyane mu bitaramo i Burayi. 

Ni Album idasanzwe mu rugendo rw’uyu mubyeyi, kuko azayimurika ashyigikiwe n’abarimo umuhungu we Inki, mu gitaramo kizabera muri Kigali Conference and Exhibition Village ahazwi nka Camp Kigali, ku Cyumweru tariki 24 Ukuboza 2023.

Ni igitaramo kandi azahuriramo n’umuhanzikazi Nirere Shanel wamenyekanye nka Miss Shanel, Itorero Inganzo Ngari ryamamaye mu guteza imbere umuco Nyarwanda, Imitari bakoranye igihe kinini n’abandi.

Album ye yakozweho n'aba-Producer batandukanye, cyane cyane Producer Pastor P wayikozeho ku kigero cya 85%. Yumvikanaho cyane ibicurangisho bya Kinyarwanda nk’Inanga n’ibindi.

Iriho indirimbo 12 zirimo nka ‘Karame Uwangabiye’ yahimbiye Perezida Kagame yasubiyemo yifashishije abahanzi icyenda barimo Massamba Intore, Jules Sentore, Nirere Shanel, Juno Kizigenza, Yvang Ngenzi, Mani Martin, Yvan Muzik, Bukuri ndetse na Isonga Family.

Hariho kandi indirimbo yahimbiye Umufasha w’Umukuru w’Igihugu yise ‘Umwiza w’u Rwanda’, ‘Ibirumbo’, ‘Indahiro’, ‘Teka Ikobe’, ‘Nyirabashana’, ‘Mwiza wanjye’ yakoranye na Nirere Shanel, ‘Sibira’ yahuriyemo n’itsinda rya Angel na Pamela, ‘Cyo ni mumurebe’, ‘Iyizire Ibuhoro’, ‘Izihirwe’ na Yva Ngenzi ndetse na Batamuriza.

Mu kiganiro cyihariye na InyaRwanda, Muyango yavuze ko bitageze ku gihe kingana n’umwaka mu gutegura indirimbo 12 zose zigize Album ye; kuko hari indirimbo yagiye yongeramo yari yarakoze mu bihe bitandukanye.

Yavuze ati “Nta n'umwaka! Indirimbo zimwe [Ziriho] ni indirimbo zagiye zibaho sinzishyire kuri album [zabanje] ngo zisohoke, izindi ni izo nagiye nkura mu mateka yanjye mu bwana nk'indirimbo 'Ibirumbo' abantu badashobora gutekereza kuba nayibuka, yewe nabo twabikoranye sinzi ko abakiriho banabyibuka."

Imvano y’indirimbo yahimbiye Perezida Paul Kagame

Muyango yavuze ko iyi ndirimbo ifite imvano ikomeye kugeza ku kuba yarabashije kuyihimba, bikagera nubwo ayishyira hanze.

Yavuze ko yitegereje aho Perezida Kagame yakuye u Rwanda n'aho arugejeje, umutima umubwira kumutegurira impano yihariye yo kumugenera

Muyango yavuze ko buri wese agira impano yumva yatanga, kuri we impano y'iyi ndirimbo ayifata nk'ishimwe afite ku Mukuru w'Igihugu.

Akomeza ati "Mbishoboye buri kwezi hajya hasohoka indirimbo [Ivuga kuri Perezida Kagame] cyangwa buri cyumweru. Nawe buri munsi aba afite ibyo yaduhaye..."

Yavuze ko afite indirimbo ebyiri yahimbiye Perezida Kagame zirimo 'Karame Uwangabiye' iri kuri iyi album, kandi ko yayihimbye ubwo yabaga mu mahanga.

Muyango asobanura ko iyi ndirimbo yakunzwe mu buryo bukomeye, kugeza ubwo mu minsi ishize abahanzi icyenda bamwegereye bamusaba ko yabemerera bakayisubiramo.

Ati "Ibyo rero kuri njye, si uko nabona uko mbabwira uko mba numva binshimishije. Gukora ikintu nk'icyo, abantu bakagikunda, ku buryo yumva yagisubiramo, ntabwo njyewe byandakaza."

Muyango yavuze ko ibihangano bye buri wese ashobora kubisubiramo, mu gihe yaba yabikunze cyangwa se bamufashije mu rugendo rwe rw'umuziki.

Muyango yigeze kubwira InyaRwanda, ko igitero cya nyuma cy’indirimbo ‘Karame Uwangabiye’ yahimbiye Perezida Kagame yacyanditse atari kumwe na bagenzi be babanaga mu Itorero ‘Muyango n’Imitari’.

Ati ‘‘Umunsi nandika iriya ndirimbo kiriya gitero nicyo cyayigize iyo iriyo. Igitero cyaje twarangije indirimbo, sinzi ukuntu nasigaye muri studio nsubira mu bitero numva hari ikindi kije. Abaririmbyi baragarutse bumvise kiriya gitero baravuga bati iriya ndirimbo yari ipfuye ubusa.’’

Uko yageze ku ndirimbo yahimbiye Madamu Jeannette Kagame

Muyango yabwiye InyaRwanda ko indirimbo yahimbiye Umufasha w’Umukuru w’Igihugu imaze ‘igihe’, kuko yayimutuye ubwo yizihizaga isabukuru y’amavuko.

Yavuze ko ubwo yayishyiraga hanze ‘bwa mbere’ hari abayimenye n’abandi batayimenya, yanzura kuyishyira kuri Album kugirango izagere kure. Ati “Ni indirimbo namuhimbiye ku munsi w’amavuko, imaze igihe, imaze imyaka.”

Akomeza ati “Ariko ejo bundi ndavuga nti ibyiza uwayishyira kuri Album ngiye gukora igasohoka n’izindi abantu bakanayimenya, kuko hari abantu batayizi, pe!

Uyu munyamuziki wamamaye mu ndirimbo zirimo ‘Sabizeze’, asubiza ko atagowe no kwandika iyi ndirimbo, kuko ibyo yaririmbye ari ubuzima bwa Madamu Jeannette Kagame.

Ati “Hari indirimbo zitavunana! Iyo uvuga umuntu uzi, ni bintu uzi n’ibikorwa bye uzi, ntabwo uvunika. Si Karame Uwangabiye, navuga ngo naravunitse se? Kandi mvuga ibikorwa bye, ntegeranyije, ni cyo kintu nakoze…. Ibikorwa by’umuntu aba yakoze, biba ari ibye. Ntabwo ari njye wabimukoreye, mba mvuga ibikorwa bye.”

Muri iyi ndirimbo, Muyango Jean Marie asingiza Madamu Jeannette Kagame mu ‘byubahiro bye no mu bikorwa bye’. Iyi ndirimbo mu buryo bw’amajwi yatunganyijwe na Robert Pro bigizwemo uruhare na Kanan Connections.

Muyango ni umwe mu bahanzi b’abahanga cyane bubakiye umuziki wabo kuri gakondo. Afite ibihangano binyura benshi byamamaye kumurusha kuko kenshi iyo muganira akubwira ko hari igihe ajya mu birori bakaririmba indirimbo ze batarabutswe ko ahari.

Mu mabyiruka ye akubwira byinshi. Ariko yitsa cyane ku kuba atarabashije kuba mu Rwanda igihe kinini cy’ubuto bwe.

Muyango yahungiye mu Burundi mu 1961; yahageze akiri umwana, aranahakurira. Aha ni ho inganzo ye yatangiye kuyigaragariza mu matorero atandukanye.

Mu 1986-1987 ni bwo Muyango yategewe indege n’Itorero ry’Abakobwa babaga mu Bubiligi ‘Imitari’, yerekeza ku Mugabane w’u Burayi kubafasha gukora indirimbo zabo.

Itorero Imitari ryatangiye gushaka gukora indirimbo zabo, nyuma y’igihe ribyina iz’abahanzi b’Abanyarwanda babaga mu buhungiro. Akigera mu Bubiligi ni bwo bihuje, birangira yinjiye mu Itorero Muyango n’Imitari.

Ku ikubitiro bakoranye indirimbo zinyuranye zasohotse kuri casette ya mbere bakoze mu 1989-1990. Zirimo “Manyinya”, “Mwiriwe neza”, “Mpore” n’izindi. Ibihangano byabo ntibyacurangwaga mu Rwanda kuko bafatwaga nk’abarwanya Leta yariho.

Ku batazi ‘Imitari’, ni itorero ry’abakobwa b’abanyarwanda bishyize hamwe bagera kuri 12, ryatangiriye mu Bubiligi mu mwaka wa 1979. Bamwe bari batuye mu Bubiligi abandi bagenda bahabasanga baje kuhiga.

Muyango we ni Intore yatojwe na se umubyara Rwigenza na sekuru Butera bazwi cyane mu ngamba Inyanza mu Rukari.

Mu 1989 babonye igihembo cyitwa “Lauréat du Prix Découvertes de la Radio France Internationale” kubera indirimbo “Nzavuga yaje".

Mu nshuti z’u Rwanda Muyango yatoje itorero yise ‘Ibirezi’ ryari rigizwe n’abakobwa b’Ababiligi ndetse mu mwaka wa 2002 yabazanye gukorera ibitaramo bitandukanye mu Rwanda muri FESPAD (Festival Panafricain de la Danse). Kuri ubu Muyango ni Umutoza mukuru w’itorero rw’igihugu Urukerereza.

Album ya Muyango iriho indirimbo 12, zirimo ‘Karame Uwangabiye’ yahimbiye Perezida Kagame na ‘Umwiza w’u Rwanda’ yahimbiye Madamu Jeannette Kagame

Muyango yatangaje ko yorohewe  no gukora indirimbo zivuga kuri Perezida Kagame na Madamu

Muyango yavuze ko  album ye ya kane idasanzwe mu buzima bwe, kuko ari iya mbere yikoranye atari kumwe n’Imitari

Muyango ari kumwe n’umujyanama we Didier Kananura [Uri ibumoso] washinze Label ya Kanan Connections

Umushyushyarugamba (MC) mu bitaramo binyuranye, Eric Shab wayoboye ikiganiro Muyango yagiranye n’itangazamakuru

Nahima Serge, Umuyobozi wa Inganzo Ngari [Uri iburyo] yavuze ko bishimiye kuzahurira ku rubyiniro n’umuhanzi w’ikitegererezo kuri bo

KANDA HANO WUMVE INDIRIMBO ‘UMWIZA W’U RWANDA’ MUYANGO YAHIMBIYE MADAMU JEANNETTE KAGAME

">

HANO WUMVE ALBUM YA KANE YA MUYANGO JEAN MARIE

">

KANDA HANO WUMVE INDIRIMBO 'KARAME UWANGABIYE', IYO BASUBIYEMO NTIRASOHOKA

">

">AGIYE KUMURIKA ALBUM

">