Adele ku isonga mu bahanzi 10 bagurishije amatike ahenze y'ibitaramo mu 2023

Umuhanzikazi Adele utarakoze ibitaramo byinshi muri uyu mwaka uri kugana ku musozo, yaciye agahigo ko kuza ku mwanya wa mbere ku rutonde rw'abahanzi bagurishije amatike ahenze y'ibitaramo mu 2023.

Adele niwe waje ku mwanya wa mbere mubahanzi bagurishije amatike ahenze y'ibitaramo mu 2023

Mu bitaramo bicye Adele yakoze byari byihagazeho kuburyo byitabiriwe n'abagwiza faranga bitewe n'uk kubyinjiramo byari bihenze. Nko mu gitaramo yakoreye muri  Caesar's Palace i Las Vegas, itike yo kwinjira ihenze yari $1,011 (Aya mu munyarwanda arenga miliyoni 1 n'ibihumbi 200).

Ibitaramo bya Taylor Swift  mu 2023 nabyo byarakoshaga

Taylor Swift wakoze ibitaramo bizenguruka Isi yise 'Eras Tour' kuva muri Werurwe kugeza muri Kanama, niwe waje ku mwanya wa kabiri. Itike yo kwinjira muri ibi bitaramo bye ihenze yaguraga $958.

Beyonce nawe yaje ku mwanya wa gatatu mu bahanzi 10 bagurishije amatike ahenze y'ibitaramo mu 2023

Beyonce nawe wahiriwe no gukora ibitaramo bizenguruka Isi yise 'Renaissance World Tour', nawe yaje ku mwanya wa 3 mu bahanzi 10 bagurishije amatike ahenze y'ibitaramo mu 2023. Itike ihenze mu bitaramo bya Beyonce yari $702 mu bihugu by'iburayi mu gihe muri Amerika yahageze akayagabanya akayageza kuri $502.

Drake na Usher nabo baje mu bahanzi 5 ba mbere bagurishije amatike ahenze y'ibitaramo mu 2023

Ku mwanya wa kane hari umuraperi w'icyamamare Drake ukomoka muri Canada. Mu 2023 Drake yakozemo ibitaramo bizenguruka imwe mu mijyi yo muri Amerika aho itike ihenze yaguraga $473. Ku mwanya wa gatanu hari umuhanzi akaba n'umubyinnyi kabuhariwe Usher wagurishije itike ihenze mu bitaramo bye yaguraga $406.

The New York Times yatangaje ko Adele, Taylor Swift, Beyonce, Drake na Usher aribo bahanzi batanu bari ku isonga bagurishije amatike ahenze mu 2023. Mu gihe abandi batanu barimo Bruno Mars, Harry Styles, Morgan Wallen, Suga na Garth Brooks, amatike y'ibitaramo byabo yari hagati ya $391 kugeza kuri $288.