JP Bimeni uri mu bakomeye i Burayi yaje gutaramira i Kigali ahishura gukorana n’abarimo Gaël Faye

Uyu muhanzi wamamaye mu muziki wo mu bwoko bwa ‘Classic Soul’ yageze ku kibuga cy’indege Mpuzamahanga cya Kigali ku gicamunsi cyo kuri uyu wa Kane tariki 9 Ugushyingo 2023.

Aherutse gukorera igitaramo gikomeye mu Burundi cyari cyateguwe na Dj Paulin, ari nawe wateguye igitaramo uyu muhanzi azakorera kuri Century Park i Nyarutarama ku wa Gatandatu tariki 11 Ugushyingo 2023.

Yabwiye InyaRwanda ati “Mfite umuryango hano, mfite inshuti, rero ni ibintu binshimishije kuba ngarutse mu rugo, nakundaga kuhaza mu bikorwa binyuranye. Mu gitaramo nzakora nizeye ko kizaba cyuzuyemo amarangamutima, kuko abantu benshi duherukana cyane, imiryango duherukana cyera. Kubabona nzishima."

JP Bimeni yavukiye i Burundi mu 1976. Nyuma, kubera intambara yabaye muri iki gihugu mu 1993 yaje guhungira muri Kenya akomereza mu Bwongereza ari naho abarizwa muri iki gihe.

Avuga ko ubuzima bwo guhunga bwamwigishije gushikama ku Mana, kuko yabayeho ubuzima bwiza n’ububi, ariko yakomeje gushikama ku Mana yamenye.

Agira inama n’abandi bari mu buzima nk’ubwe gukomera. Yavuze ati “Ni ukwemera Imana, kutanyeganyega mu kwemeza. Mu buzima urazamuka cyangwa ukamunaka, ibintu birahinduka, ntugire umutima uhangayitse, ahubwo wumve ko Imana ikora, ukomeze gusenga, ugire inshuti, urangwe n’urukundo byose ubicamo.”

Bimeni avuga ko hari imyaka yabayemo ku buryo yumvaga ubuzima bugiye kwanga, ariko ko yakomeje umutsi bitewe n’uko hari ibindi bihe yanyuzemo bikomeye.

Uyu mugabo avuga ko iyo ari kunyura mu bihe ‘bikomeye’ yisunga gitari, agacuranga indirimbo zinyuranye. Ati “Kenshi usanga umuziki umvuye ntagiye gutesha umwanya umuntu, ndabishima ko Imana yanshyize umuziki mu buzima bwanjye.”

Bimeni avuga ko n’ubwo ariwe wamenyekanye mu muryango we mu bakora umuziki, afite abavandimwe n’abandi bakora umuziki ariko impano z’abo zitamenyekanye nk’uko impano ye yamenyekanye. Ati “Hari ibyo byinshi dukora bihurira n’urukundo rw’umuziki.”

Asobanura ko gukunda umuziki byatumye ‘nyura mu buzima bukomeye’. Ati “Ni ukwisuzuma ukumva ko ibikomere byashize. Gitari n’umuziki ni umuti ukomeye, kandi uwufate neza, uwufashe neza urakuvura, uwufashe nabi urakwica.”

Bimeni avuga ko igitaramo cye kizarangwa n’urukundo hagati y’Abanyarwanda n’Abarundi, kandi kizahuza abavandimwe benshi bafite ‘indoto nyinshi muri aka kare tuvukamo’.

Uyu muhanzi yavuze ko mu rugendo rwe i Kigali anateganya kugirana ibiganiro n’abahanzi barimo Gael Faye, Michael Makembe na Samy bakaba bakorana indirimbo.

Yavuze ati “Ni icyifuzo gikuru kandi birimo! Ndi mu biganiro n’abahanzi barimo Gael Faye numvise ko ari hano, Samy na Makembe bari hano. No kwicarana gusa, tugatera inkuru, tugateka, tureba ibyo twakora n’ibizakurikiraho, tumenyanye, tuganire, kuko ibiganiro bibyara ibintu byinshi cyane.”

Uyu muhanzi asobanura ko mu 2018 yashyize hanze album yise ‘Free Me’ iriho indirimbo zatumye amenyekana cyane mu bihugu bitandukanye mu Burayi.

Ni mu gihe mu 2022 yasohoye Album yise ‘Give me Hope’ yitsa cyane ku ndirimbo zubakiye ku cyizere bitewe n’ibihe yanyuzemo mu buzima bwe. 

Bimenyi [Uwa gatatu uvuye ibumoso] ari kumwe n'abamufashije gukorera igitaramo i Kigali

JP Bimeni yaje gukorera igitaramo i Kigali nyuma ya Album ze zakunzwe mu buryo bukomeye

Bimeni [Uri iburyo] yamenyekanye ku mazina ya Mudibu mu muziki, kandi mu 2021 yakoreye ibitaramo bikomeye mu Burundi

Muri Gashyantare 2022 nibwo Label ya ‘Lovemonk’ JP abarizwamo yasohoye album yise ‘Give Me Hope’

Album ye yise ‘Free Me’ yegukanye ibikombe birimo BBC 6 Music nka Album y’umwaka

Dj Paulin wamamaye mu gutegura ibitaramo i Burundi ari kumwe na JP Bimeni yatumiye

Kwinjira muri iki gitaramo cya JP Bimeni ni ukwishyura 50 Frw 

KANDA HANO UREBE AMASHUSHO Y'INDIRIMBO 'FOUR WALLS'

">

KANDA HANO UREBE AMASHUSHO Y'INDIRIMBO 'GIVE ME HOPE'

">

KANDA HANO UREBE INDIRIMBO 'THE BLACK BELTS' YA J.P BIMENI

">