Ku mugoroba wo kuri uyu wa Kabiri tariki 24 Ukwakira ni bwo Bokota wahoze ari rutahizamu w'ikipe y'igihugu "Amavubi" yagaragaye akoresha imyitozo ikipe Addax Sports Club, nayo amasezerano yo kuyigura akaba yari ageze kure.
Mu buryo bwo kongerera imbaraga 'Staff' y'iyi kipe, Mvukiyehe Juvenal yahisemo gusinyisha Bokota Kamana Labama nk'umwe mu bakinnyi bazi umupira w'amaguru mu Rwanda, ndetse akaba umwe mu bakinnyi bakoze amateka ubwo yageraga muri shampiyona y'u Rwanda.
Bokota Kamana Labama bivugwa ko yavutse mu 1985, yakiniye amakipe arimo Rayon Sports yakiniye bwa mbere ubwo yazaga mu Rwanda, ahava yerekeza muri APR FC, akaba yarakiniye andi makipe arimo Kiyovu Sports, As Muhanga, ndetse na Musanze FC.
Bokota Kamana Labama kandi yakiniye Amavubi kuva mu 2008 ubwo yari amaze kugaragara muri Rayon Sports, ayakinira imikino isaga 33. Bokota Kamana Labama azaba yungirije umutoza Ndemeye Jean Lous bakunze kwita Fils, wari usanzwe atoza Rugende FC akaba yari akiyifitiye amasezerano.
Bokota Kamana ubwo yakiniraga Musanze FC
Bokota Kamana yakiniye n'ikipe ya URA FC yo muri Uganda
Mvukiyehe Juvenal kuri uyu wa Kabiri ni bwo yaguze iyahoze ari Rugende FC, ubu yitwa Addax Sports Club
Ikirangantego cya Addax Sports Club