Kitoko yateguje kugaruka mu muziki nyuma y’imyaka ine

Ku wa 28 Mutarama 2022, nibwo uyu munyamuziki wamamaye mu ndirimbo ‘Rurabo’ yahawe Impamyabumenyi y’icyiciro cya gatatu cya Kaminuza (Master’s) mu bijyanye na Politiki yakuye muri London South Bank Universtiy.

Yifashishije imbuga inkoranyambaga ze, yagaragaje ko buri ntambwe igihumbi umwana w’umuntu atera mu buzima bwe bibanzirizwa no gutera intambwe imwe.

Kitoko waherukaga gusohora indirimbo ‘Winema’, yashimye Imana, umuryango we, abanyeshuri biganaga muri Kaminuza, inshuti, abarimu n’abandi batumye urugendo rwe rw’amasomo rushoboka. Ati “Nabigezeho kubera mwe.”

Kitoko yiseguye ku bafana be n’abakunzi b’umuziki kubera ko atari kubasha guhuza urugendo rw’amasomo n’umuziki, byatumye adashyira hanze indirimbo nk’uko byari byiza.

Ariko avuga ko ari kubategurira ibyiza kandi biri mu nziza. Ati “Gutekereza kwanyu n’amasengesho ntabizipfa ubusa. Murakoze bafana banjye.”

Ku mugoroba wo kuri uyu wa Mbere tariki 9 Ukwakira 2023, uyu munyamuziki yagaragaje ko igihe kigeze ngo agaruke mu muziki nyuma yo gushyira ku ruhande ibijyanye n’amasomo.

Yabwiye InyaRwanda ko agiye gushyira hanze indirimbo ihimbaza Imana yise “Uri Imana.” Ati “Ni indirimbo y’ivugabutumwa, igaruka ku guhimbaza Imana.”

Iyi ndirimbo yatunganyijwe mu buryo bw’amajwi na Producer Lick Lick usigaye ushyize imbere gukora ibihangano byubakiye kuri ‘Gospel’.

Kitoko avuga ko mu gihe kidatinze kiri imbere, ari bwo azashyira ku mbuga nkoranyambaga zicuririzwaho umuziki iyi ndirimbo. Ati “Ni mu minsi micye ntabwo izatinda.”

Imyaka ine yari yuzuye uyu muhanzi adashyira hanze indirimbo, kuko yaherukaga gusohora indirimbo ‘Winema’ yabanjirijwe na ‘Rurabo’ imaze imyaka itanu.

Shene ye ya Youtube igaragaza ko amaze imyaka irindwi mu muziki, kuko ari bwo yatangiye gushyiraho ibihangano, ariko uyu munyamuziki arengeje imyaka 15 mu muziki, kuko yatangiye umuziki mu 2008.

Yakunzwe cyane mu ndirimbo nka ‘Pole Pole’. Ni umwe mu baherutse kwitabira ibirori by’isabukuru ya mugenzi we Mujyanama Claude [TMC], icyo gihe yari kumwe n’abarimo Chrstopher Muneza, Shaffy, Princess Priscilla [Scilla], Emmy, Charly&Nina n’abandi.

Kitoko yagaragaje ko agiye kugaruka mu muziki azanye indirimbo ‘Uri Imana’ 

Kitoko yavuze ko iyi ndirimbo ishingiye ku kuramya no guhimbaza Imana 

Kitoko avuga ko imyaka ine yari ishize adakora umuziki bitewe n’amasomo

KANDA HANO UREBE AMASHUSHO Y’INDIRIMBO ‘WINEMA’ YA KITOKO

">