Alto yasohoye indirimbo ishobora gukurikira gusezera muri Label

Amezi 10 arashize uyu muhanzi ashyize hanze indirimbo yise ‘Monalisa’ yagizwemo uruhare n’iyi Label. Kuva icyo gihe ntiyongeye kuvugana n’ubuyobozi bw’iyi Label, kandi yakoze uko ashoboye kugirango bavugane ariko ntibyakunda.

Yabwiye InyaRwanda ko ashingiye ku mikoranire ye n’iyi Label bimuha ishusho y’uko isaha n’isaha yashyira akadomo ku masezerano bari basanzwe bafitanye.

Amasezerano y’aba bombi agomba kurangira muri Werurwe 2024. Alto avuga ko nyuma yo kubona ubuyobozi bw’iyi Label butamukivugisha yishatsemo ubushobozi yikoreramo iyi ndirimbo ‘Yego’ ariko kandi agaragaza mu ndirimbo ko bafatanyije nubwo nta ruhare bayigizeho.

Yavuze ati “Kuva twakorana indirimbo ‘Monalisa’ ntitwongeye kuvugana. Nakoresheje uburyo bwose bushoboka ngo menye ibiri kujya mbere ariko ntibyakunze. Rero nk’umuhanzi nanze kwicara, ahubwo nishatsemo ubushobozi mbona gukora iyi ndirimbo."

Muri iyi ndirimbo ye nshya yise ‘Yego’, Alto aririmba yishyize mu mwanya w’umusore wakunze umukobwa kugeza ubwo yirengagiza ibivugwa n’abantu batandukanye, ahubwo akiyemeza kuzabana nawe ubuzima bwe bwose.

Ni umusore uba wumvikanisha ko yakunze umukobwa, kandi ko yiteguye kumuhuza n’imiryango, bakagura umuryango w’abo.

Muri Werurwe 2021, nibwo Alto ndetse na Yampano basinye muri TB Music Entertainment, amasezerano y’imyaka itatu yo kubakorera indirimbo, kuzamamaza, kubashakira akazi mu bitaramo n’ibirori n’ibindi.

Alto yinjiye muri TB Music avuye muri Ladies Empire y’umuraperikazi Oda Paccy. Icyo gihe yavugaga ko yavuyemo kubera ko batubahirije amasezerano.

Ati “Nabonaga amasezerano twari dufitanye na bo atari gukurikizwa. Nasohoye indirimbo ebyiri mu myaka ibiri ntabwo ari buri muhanzi wabyihanganira. Mu mwaka umwe nari nemerewe indirimbo eshanu harimo n’indi ndikumwe n’umuhanzi nifuza."

Ni mu gihe Yampano yavugaga ko yinjiye muri iyi Label basanga hari ibindi bikorwa by’umuziki yari amaze igihe yikorana birimo na Album ye.