Andy Bumuntu agiye guhurira na Boyz II Men mu gitaramo gikosha i Kigali

Andy Bumuntu azaririmba afungura ku mugaragaro iki gitaramo gikosha mu bijyanye n’ibiciro byo kucyinjiramo. Ibiciro byo kwinjira muri iki gitaramo cya Boyz II Men byashyizwe mu byiciro bitatu: Itike yiswe 'Diamond' iragura ibihumbi 100Frw, itike yiswe 'Gold' iragura 75,000Frw n’aho itike yiswe 'Silver' igura 50,000 Frw.

Ni ubwa mbere mu Rwanda hagiye kuba igitaramo gihagaze aya mafaranga mu bijyanye no kwinjira. Kuko ibyinshi byagiye biba bitarenzaga impuzandengo y'ibihumbi 50 Frw. Hari n'ibindi bitaramo byagiye biba ugasanga ameza (Table) y'abantu batandatu yashyizwe ku bihumbi 200Frw [Bivuze ko buri muntu yabaga yishyuye arenga ibihumbi 30 Frw].

Bivuze ko amenshi yishyuwe atarenga nibura ibihumbi 40Frw, ni mu gihe muri Boyz I Men itike ya macye igura ibihumbi 50 Frw.

Andy Bumuntu yatangajwe muri Boyz II Men mu gihe aherutse kugaragaza ko agiye kuririmba mu gitaramo cy’iserukiramuco muri Kenya cyiswe "Afro Fashion Cuisine", kizaba ku wa 20 Ukwakira 2023. Ni igitaramo azahuriramo n’abahandi bahanzi barimo Sho Madjozi.

Ni ubwa mbere uyu muhanzi agiye gutaramira muri kiriya gihugu, kandi agaragaza ko yiteguye kugirana ibihe byiza n'abafana be n'abakunzi b'umuziki muri Kenya.

Andy Bumuntu agiye kuririmba muri kiriya gihugu mu gihe muri Werurwe 2020, inkumi zo muri Kenya zagaragaje ko zakunze ibihangano bye cyane cyane indirimbo ye yise ‘On Fire’. Azwi cyane mu ndirimbo kandi zirimo nka ‘Mine’, ‘Mukadata’, ‘Valentine’ n’izindi.

Mu kiganiro aherutse kugirana na Kiss Fm, Umutare Gaby yatangaje ko buri kimwe umuvandimwe we Andy Bumuntu ageraho mu buzima bwe yagikoreye.

Yavuze ati “Ikintu cyose Andy yaragikoreye. Yatangiye akora Karaoke yiga na Guitar. Yajyaga mu igaraje mu rugo ari kwitoza mu gitondo cya kare. Ibintu byose arimo ni ibintu yakoreye. Natunguwe no kubona abo bantu batumvaga ibyo akora mu minsi ishize yarabashyize mu ndirimbo ye.’’

Boyz II Men igiye gukorera igitaramo i Kigali n'itsinda ryakunzwe karahava kuva mu myaka irenga 40 ishize. Amateka n'ibigwi byabo bihera mu Mujyi wa Philadelphia aho batangiriye bigizwemo uruhare na Nathan Morris ndetse na Marc Nelson batangiye baririmbana biga mu mashuri yisumbuye.

Nyuma bihurije hamwe bashinga itsinda bongeramo Wanya Morris ndetse na Shawn Stockman. Bari kumwe bakoreye ibitaramo mu bihugu binyuranye, kandi bagurishije kopi za Album zirenga Miliyoni 60, bituma baca agahigo ko kuba itsinda rya mbere ku Isi ryabashije kugurisha izi kopi za Album.

Mu 1991 iri tsinda ryasohoye album ya mbere bise "Cooleyhighharmony", ni nyuma yo gushyira umukono ku masezerano n'inzu ya Michael Bivins.

Iyi album yisanzuye ku isoko iragurwa biturutse ku ndirimbo nka ‘End of the Road' yabubakiye izina. Iyi ndirimbo yamaze ibyumweru 13 iyoboye urutonde rwa Billboard Hot 100.

Yakuyeho agahigo kari gafitwe n'indirimbo ya Elvis Presley. Byagezeho hagurishwa kopi Miliyoni 100 z'iyi album, bihesha Boyz II Men kwegukana Grammy Awards nk'itsinda ritanga icyizere mu muziki.

Mu 1994, iri tsinda ryasohoye album bise "II" iriho indirimbo nka "I'II Make Love to you", "On Bended Knee", "Water Runs Dry" n'izindi zatumye iyi album ikundwa cyane kubera ko yubakiye ku njyana ya R&B. 

Muri Leta Zunze Ubumwe za Amerika honyine iyi album yaguzweho kopi Miliyoni 12, bituma iba album ya mbere ku Isi y'ibihe byose yagurishijwe cyane.

Iri tsinda byarenze gukora umuziki, ahubwo banakina muri filime nka "Lethal Weapon 4", "Soul Men" n'izindi. Basanzwe bafite inyubako mu Mujyi wa Las Vegas bagiye bakorera ibitaramo by'amateka, kuko amatike yagiye ashira bakibitangaza.

Mu 2000 iri tsinda ryubatse inzu yakira urubyiruko n'abandi bari mu mibereho mibi, bakafasha kubona icyo kurya, kwiga, ubujyanama n'ibindi bibafasha kugaruka mu buzima.

Bamaze kwegukana Grammy Awards enye ndetse na Hollywood Walk of Fame. Urugendo rw'abo rw'umuziki rwatinyuye benshi mu bahanzi bakora umuziki muri iki gihe.

Kuva mu myaka ya 1990 iri tsinda ryubakiye ku majwi azira amakaraza, kandi bashyize hanze indirimbo z'umudiho wa Rythm and Blues.

Iri tsinda rigizwe na Nathana Bartholomew [Nathan Morris] wavutse ku wa 18 Kamena 1971 mu Mujyi wa Pennsylvania, Michael Sean McCary [Michael Mcary] wavutse ku wa 16 Ukuboza 1971 avukira mu Mujyi wa Pennsylvania;

Shawn Patrick Stockman [Shawn Stockman] wavutse ku wa 26 Nzeri 1972 muri Philadelphia ndetse na Wanyá Jermaine Morris [Wanya Morris] wavukiye muri Pennsylvania ku wa 29 Nyakanga 1973.

Andy Bumuntu yabaye umuhanzi wa mbere watangajwe uzataramana na Boyz II Men ku rubyiniro
 Andy Bumuntu ari mu bazaririmba mu iserukiramuco ‘Afro Fusion Cuisine’ azahuriramo na Sho Madjozi muri Kenya 

Andy agaragaza ko yishimiye kuzahurira an Boyz II Men muri iki gitaramo kihagazeho mu bijyanye n’ibiciro mu kwinjira

Uhereye ibumoso abagize itsinda Boyz II Men: Nathan Morris, Wanya Morris ndetse na Shawn Stockman/Ifoto ya Get Images yo mu 2019

KANDA HANO UREBE AMASHUSHO Y’INDIRIMBO 'IGITEGO' YA ANDY BUMUNTU

">