Shalom Choir yujuje BK Arena, abarenga 1000 basubirayo-AMAFOTO

Iki gitaramo cyihariye bagikoze kuri iki Cyumweru tariki 17 Nzeri 2023, bagihuriramo na Israel Mbonyi ndetse n’itsinda ry’abaramyi rya Ntora Worship Team.

Shalom Choir ibaye korali ya mbere ibashije kuzuza BK Arena, nyuma y’umuhanzi Israel Mbonyi wabigezeho mu Ukuboza 2022 mu gitaramo yahakoreye.

Uretse abakristu batabashije kwinjira kubera ko huzuye, hari n’abaririmbyi basanzwe bazwi batabashije kubona uko binjira bitewe n’uko inyubako yuzuye.

Umuyobozi wa mbere Wungirije wa Shalom Choir, Rukundo Jean Luc, ku wa Kane tariki 14 Nzeri 2023, aherutse kubwira itangazamakuru ko bazubahiriza ‘umubare twahawe twemerewe kwakira muri iki gitaramo’. Icyo gihe yasabaga abantu kuzazinduka kugirango batazacikwa n’iki gitaramo.

Iyi korali yakoze iki gitaramo yatangiye umurimo w’Imana mu 1983 itangira ari korali y'abana. Mu 1985 binyuze mu ntambwe Imana yabateresheje bafashe izina rishya bitwa Korali ‘Umunezero’.

Bigeze mu 1993 bakiriye abaririmbyi barimo abashinze ingo bituma bashaka izina bitwa Choir Shalom [Amahoro mu rurimi rw'Igiheburayo].

Ubu iyi korali ibarizwamo abaririmbyi barenga 140 barimo 78% bakuru ndetse n'urubyiruko 22%.

Kuva batangira umuririmo bashyize hanze indirimbo zakunzwe zirimo izo bitabiriye Album esheshatu bamaze gushyira hanze zirimo nka 'Jambo Nyamukuru', 'Ndashima Umwami', 'Mungu wangu' n'izindi.

Perezida wa Shalom Choir, Bwana Ndahimana Gaspard, aherutse kubwira itangazamakuru ko inzira y'urugendo rw'abo mu gukorera Imana itari iharuye kuko 'no mu murimo w'Imana habamo birantega'.

Ati "Habamo ingorane nyinshi. Twagiye duhura na byinshi bishaka kutubuza umurimo ariko hamwe no gusenga Imana hamwe n'abayobozi bacu Imana yashyizemo umwuka wera ngo batubungabunge tukajya dutambuka bya bibazo. Ibibazo byo ntibibura mu murimo w'Imana."

Muri iki gitaramo, Shalom Choir yahisemo kuririmba indirimbo zayo zakunzwe, kandi bitaye cyane no kuririmba mu ndirimbo zabo nshya baherutse gushyira hanze.

Muri iki gitaramo barafatiramo amashusho y'indirimbo z'abo ku buryo bazagenda bazishyira hanze mu bihe bitandukanye.

Shalom Choir ibarizwa mu Itorero rya ADEPR ururembo rwa Kigali rukorera mu turere: Gasabo, Kicukiro na Nyarugenge. Ururembo kandi rufite Paroisse 12 n'imidugudu 101.

Ururembo rwa Kigali runafite korali zisaga 600 zirimo na Shalom Choir ikorera umurimo muri Paroisse ya Nyarugenge.

Mu cyerekezo cya ADEPR harimo guhindura ubuzima bw'abantu mu buryo bwuzuye bifashishije ijambo ry'Imana.

Itorero ADEPR ryubakiye ku ndangagaciro eshanu: Ubukristo, Urukundo, Ubusonga, Kubazwa inshingano, Gukorera mu mucyo, Ubunyangamugayo ndetse no kwitanga.

Abakristu batabashije kugera kare kuri BK Arena basubiyeyo nyuma y'uko umubare wuzuye

Bahagaze hanze ya BK Arena basaba kwinjira ariko bababwira ko umubare wamaze kugera

Abari imbere muri BK Arena bagiranye ibihe byiza n'Imana mu busabane bwagutse

Ni igitaramo kitabiriwe n'ibyiciro bitandukanye by'ubuzima, kuva ku bana kugeza ku bakuru

Chorale Shalom yakoze igitaramo gikomeye, yishimirwa mu bukomeye n'ibihumbi by'abantu

Kanda hano urebe amafoto menshi yaranze iki gitaramo cya Shalom Choir cyabereye muri BK Arena