Carlos Alos Ferrer wasezeye ku Amavubi yabonye akazi gashya

Abinyujije ku mbuga nkoranyambaga ze, Carlos Alos Ferrer mu gitondo cyo kuri uyu wa Kabiri taliki 08 Kamena ni bwo yanditse ubutumwa burebure asezera ku ikipe y'Igihugu y'u Rwanda, Amavubi, yari yaragezemo muri Mata 2022. 

Yanditse ati "Ndifuriza FERWAFA n'Amavubi ibyiza gusa mu gihe kizaza, abayobozi bashya, abakinnyi ndetse n'abafana. Mwarakoze cyane kumpa amahirwe yo gukorera mu gihugu kiza nk'iki, kandi ndizera ko ubuyobozi bushya bwa FERWAFA bufatanyije na Minisiteri ya siporo bazagera kuri byinshi vuba aha.

"Iki ni cyo gihe ngo batangire intego nshya kandi nanjye ni cyo gihe ngo ntangire gahunda nshya. Ndi umufana w'Amavubi kuva ubu kugera ubuziraherezo."

Nyuma y'amasaha macye Carlos Alos Ferrer atangaje ibi, hahise hajya amakuru hanze avuga ko  yabonye akazi gashya ko kuba umutoza mukuru w'ikipe y'igihugu ya Belarus mu gihe kingana n'umwaka 1 bigendanye n'amasezerano yasinye.

Ikipe y'igihugu ya Belarus yari imaze igihe kingana n'imyaka 2 idafite umutoza mukuru. Carlos Alos Ferrer agiye gusimbura kuri uyu mwanya Mikhail Markhel wari warayitoje kuva muri 2019 kugeza muri 2021.

Carlos Alos Ferrer wasezeye ku ikipe y'Igihugu y'u Rwanda, Amavubi, yagiye gutoza ikipe y'igihugu ya Belarus