Shenseea umuhanzikazi Chriss Eazy aheruka kongorera Miss Darina ko yihebeye ni muntu ki?

Niba ukurikiranira hafi ibibera mu Rwanda mu myidagaduro nta kuntu waba utajya uterara ijisho ku biganiro bitandukanye Kayumba Darina wamamaye mu marushanwa y’ubwiza agenda agirana n’ibyamamare bitandukanye byiganjemo abahanzi.

Mu kiganiro uyu mukobwa aheruka kugira na Chriss Eazy uri mu bagezweho, yamubajije umuhanzikazi uza imbere mu bo yemera ku Isi amusubiza ko ari Shenseea.

Uyu muhanzikazi ushobora kuba waramwumvise kuri Album Donda ya Kanye West, mu ndirimbo zitandukanye yakoranye n’abarimo Tyga, Megan Thee Stallion cyangwa Sean Paul ariko ukaba utamuzi neza.

InyaRwanda tugiye ku kuvira imuzi n’imuzingo ubuzima bw’uyu mukobwa uri mu bakomeje kugira izina rikomeye byumwihariko mu njyana ya Dance Hall.

Yitwa Chinsea Linda Lee yabonye izuba kuwa 01 Ukwakira 1996 yamamaye nka Shnseea ,ni umuhanzikazi wo muri Jamaica ukomeje kwigarurira imitima ya benshi byumwihariko mu njyana ya Dancehall.

Yamamaye cyane ubwo bwa mbere yagaragaraga mu ndirimbo ya Vybz Kartel, Sean Paul na Christina Aguilea yaje guhita ashyira umukono ku masezerano na Interscope Records bidatinze mu 2019 yashyize hanze indirimbo yakoranye na Tyga.

Mu2021 ari mu bahanzi bari kuri Album ya Kanye West yise ‘Donda’ mu ndirimbo Pure Soul ibi byanatumye ahita aba mu bahataniye Album nziza mu bihembo bya Grammy Awards ku nshuro ya 64.

Yaje kandi kwibikaho igihembo muri MOBO Awards cya Best Reggae Act muri 2022, azagushyira hanze indirimbo yise ‘Lick’ yahuriyemo na Megan Thee Stallion iri no kuri Album ya Shenseea yise ‘Alpha’.

Mu busanzwe uyu mukobwa  Shensea yavukiye Jamaica kuri nyina wo muri iki gihugu na se ukomoka muri Korea, nyuma yo gutangira umuziki yaje gushyira umukono ku masezerano n’inzu ireberera umuziki w’abahanzi ya Lemuel Samuel Music Label Rockstar.

Guhera muri 2021 kandi yashyize umukono ku masezerano na Wassim Saiby [Salxo] usanzwe n’ubundi afasha abahanzi bihagazeho nka Doja Cat, indirimbo y’uyu muhanzikazi kandi yitwa ‘Pon Mi’ yaciye ibintu ku mbuga zirimo nka Youtube na Tiktok.

Muri Mata 2023 aheruka kuririmba mu iserukiramuco rya Coachella Valley Music&Arts. Kubera izina amaze kugira mu muziki, yatangiye kugenda ashyira umukono ku masezerano na kompanyi zitandukanye zirimo Telecom, Firm Flow, Boom na Pepsi-Cola JA.

Mu birebana n’ubuzima bwe bwite ku myaka 19 yibarutse umwana w’umuhungu yise Rajeiro hari muri 2015, mu 2020 umwana we yashyize umukono ku masezerano yo kwamamaza ibikorwa Babypop Kids Store.

Muri Kamena 2020 nyina umubyara yitabye Imana.

Chriss Eazy witegura gushyira indirimbo hanze yise Stop no kujya gutaramira muri Zambia yatangaje ko mu bahanzikazi bose bo ku Isi yihebeye Shenseea uri mu bagezweho

Shenseea amaze kubaka izina no gukora ibikorwa bitandukanye bituma ari mu bahanzwe amaso na benshi mu muziki muri iki gihe