Yakoreye Imana, akebura urubyiruko! Urupfu rwa Pasiteri Théogène rwashenguye aba Minisitiri, ibyamamare…,

Muri iki kiganiro yavugaga ko uwavutse wese azapfa, ahubwo abantu bakwiye gutekereza ku hazaza habo no gukora ibishoboka byose bakazasiga inkuru nziza. Ati “Uwavutse wese arasaza cyangwa agapfa.... Igihe wapfuye ni iyihe nkuru nziza usize."

Pasiteri Théogène yitabye Imana ahagana Saa Kumi z’urukerera rwo kuri uyu wa Gatanu tariki 23 Kamena 2023,aguye mu mpanuka y'imodoka yatewe na 'Bus' yagonganye n’imodoka nto yahitanye abana batatu,yabereye mu birometero 4 uvuye i Kabale.

Bus yavaga i Kigali yerekeza i Kampala n'aho imodoka Pasiteri Théogène Niyonshuti yarimo yavaga i Kampala yerekeza i Kigali.

Televiziyo NTV yo muri Uganda, yatangaje ko umwe mu bari kumwe mu mudoka na Pasiteri Théogène yarokotse iyi mpanuka, ajyanwa ku bitaro bya Kabale Regional Hospital.

Pasiteri Théogène w’imyaka 40 yasize umugore n'abana bane; abakobwa babiri n’abahungu babiri. Gusa, afite n'abandi bana yareraga yakuye mu muhanda, bose hamwe ni umuryango mugari w'abantu 17.

Yari azwi cyane mu Banyarwanda n’abandi bumva Ikinyarwanda, ahanini bitewe n’ibiganiro yagiriraga kuri shene zitandukanye za Youtube. Yagiye atumirwa kubwiriza ahantu hanyuranye, rimwe na rimwe agatumirwa ari kumwe n’umugore we.

Uyu mugabo w'umuvugabutumwa yamamaye ku mazina ya 'Inzahare' cyangwa 'Inzahuke'.  Mu biganiro binyuranye yagiye avugamo ko yari inzahare nyuma aza kuzahuka, mu kumvikanisha urugendo rw'ubuzima bubi yanyuzemo nyuma Imana ikamugirira neza.

Yagejeje imyaka 10 atazi kwiyoza:

Uyu mugabo yigeze kuvuga ko yakuriye mu rugo rwiza, agenda mu mudoka, kandi ko yagejeje imyaka 10 atazi kwiyoza, kuko iwabo hari abakozi bakoraga buri kimwe.

Yavugaga ko no kurya hari abantu babaririmbiraga kugirango barye. Ariko ubwo yari agejeje imyaka 12 (mu 1994), Jenoside yakorewe Abatutsi mu 1994, yasize nta muntu n'umwe afite bafite icyo bapfana.

Nyuma ya Jenoside yisanze mu buzima bwo  ku muhanda. Byari ibihe bigoye kuri we, nyuma y'uko amateka ahindutse akabura abe bose agatangira ubuzima bwo kuba mu muhanda.

Kuva mu 1994 kugeza mu 2003 yabaga mu buzima bw'umwana wo mu muhanda. Aha, yahanywereye ibiyobyabwenge by'amoko atandukanye, ndetse ahigira ingeso zinyuranye.

Mu 2004, yaje kwakira agakiza, ariko benshi mu bo basenganaga baramwishishaga ku buryo abarokore bamwe na bamwe bagendaga bamwibazaho buri munsi.

Muri icyo gihe yari yarakiriye agakiza , yakomezwaga  n'ijambo ry'Imana n'ubwo ubuzima yarimo acamo bwarimo amayobera.

Nyuma, Imana yamukoreye ubukwe, ndetse aza kwizerwa n'itorero ADEPR atangira ayobora icyumba cy'amasengesho, aba umubwirizabutumwa, aba umwarimu kugeza ubwo ahawe inshingano zo kuba Pasiteri.

Mu biganiro binyuranye, yagiye avuga ko yanyuze ahantu habi ariko agera kure heza abicesheje amahame y'ubuzima yimitse. Yavugaga ko 'ubuzima ari ishuri rye'.

Pasiteri Théogène yari Umushumba mu Itorero ADEPR, ubarizwa mu Itorero rya Kamuhoza Paruwase ya Muhima mu Rurembo rwa Kigali.

Iyo usomye mu Ibyahishuwe 14:13 hagira hati “Numva ijwi rivugira mu ijuru rimbwira riti “Andika uti ‘Uhereye none hahirwa abapfa bapfira mu Mwami wacu.’

Umwuka na we aravuga ati “Yee, ngo baruhuke imihati yabo, kuko imirimo yabo ijyanye na bo ibakurikiye.”

Itorero ADEPR ryamusezeyeho… Aba Minisitiri n’abandi bazirikana imirimo

Mu butumwa ADEPR yanyujije ku rukuta rwa Twitter, bihanganishije ‘umuryango wa Pasiteri Théogène Niyonshuti, Abanyetorero ADEPR bose, inshuti n'abavandimwe be’.

Minisitiri w’Ubutegetsi bw’Igihugu, Jean Claude Musabyimana yavuze ko Pasiteri Théogène azakomeza kuzirikanwa ku bw’umusanzu we mu kugarurira icyizere urubyiruko.

Minisitiri Musabyimana ati “Tuzahora twibuka umusanzu wawe mu kugarurira icyizere urubyiruko rufite ibibazo binyuranye. Imana wizeye kandi wakoreye igutuze aheza.”

Minisitiri w’Urubyiruko, Utumatwishima yanditse kuri konti ya Twitter, avuga ko mu nzira y’ubuzima bwa Pasiteri Théogène Niyonshuti yatambukije ‘ubutumwa bwa benshi muri twe, mu buryo twese tutabasha kubikora.’.

Yavuze ko uyu mugabo wari Umukristo wa ADEPR yasomaga ibyanditswe ‘mu buryo bworohera abato kubwumva’.

Yasabye Imana gukomeza umuryango wa Pasiteri Théogène Niyonshuti, abo basenganaga, urubyiruko n’abandi bose ‘ubutumwa bwe bwafashije’.

Kemnique uzwi cyane mu bakoresha urubuga rwa Twitter, yavuze ko ibiganiro bya Pasiteri Théogène ari byo gusa yarebaga, cyane cyane ibyo yabaga yakoreye mu materaniro.

Yavuze ko Pasiteri Théogène yari afite impano yihariye muri buri kimwe, kandi yagerageza gutanga ukuri ku buzima bwe, akanyuza inyigisho ze mu buryo busekeje ariko atanga ingero zifatika.

Kemnique yibajije impamvu Imana ‘ihitamo gutwara umuntu ufite akamaro mu buzima bwacu’.

Yavuze ko ashingiye ku gihe yari amaze ashaka kubwira Pasiteri Théogène ko hari icyo yamumariye ariko ntabivuge, byamuhaye isomo ry’uko ‘niba ukunda umuntu ujye ubimubwira akiriho waba umuzi cyangwa utamuzi. Kemnique yasabye Imana gutuza aheza Pasiteri Théogène.

Umusizi Rumaga yanditse kuri Twitter ye avuga ko ‘Iyo igihe kigeze, n’inshuti ya benshi irataha.’

Yavuze ko nk’urubyiruko ‘ntitwamukurikiraga nk'umubwiriza butumwa gusa, ahubwo benshi twamukurikiraga nk’ubutumwa bugenda.’

Akomeza ati “Twihanganishije umuryango wa Pasiteri Théogène Niyonshuti, mukomere muri ibi bihe bitaboroheye. Impore Mama Pasitoro Uwanyana.”

Masafi Mashaba ukoresha urubuga rwa Twitter yavuze ko Pasiteri Théogène ‘yagiraga umwete wo kwezwa no kubana n’abantu amahoro’.

Akomeza ati “Yari afite ishyaka ku murimo no guhamya Yesu atajegajega. Yangaga umugayo mu bandi kuko yari azi ko agana mw'ijuru. ifoto yurwibutso arayidusigiye.”

Umunyamakuru w’Ikigo cy’Igihugu cy’Itangazamakuru, yanditse kuri Twitter avuga ko ‘nta mbaraga mfite zo kubasangiza amashusho yafashwe Pastor Theogene yivugira ati: "Kandi ni uku umuntu apfa nyine iyo atinze kubona ubutabazi!"

Bibio avuga ko ‘Uwafashe video yamwizezaga ko imodoka y'ubutabazi bagiye kuyizana kugirango ngo ibegureho coaster yari ibari hejuru’.

Ati “Ariko wumvaga ari nko kumurema agatima. Hari ubwo urupfu ruza ururebesha amaso, ukarwakira kuko nta yandi mahitamo.”

Eric Shaba usanzwe ari umushyushyarugamba mu birori n’ibitaramo binyuranye yanditse kuri Twitter, avuga ko Pasiteri Théogène yagaragaje ko ‘ivugabutumwa nyaryo atari iryo mu rusengero ndani.’

Akomeza ati “Ni we wasobanukiwe abababaye abo ari bo, arabasanga, arabakarabya, arabagaburira, abona kubabwira ijambo ry'Imana. Yari atandukanye n'abandi. Igendere wa mugabo we!”

Umuhanzi Alpha Rwirangira ukorera umuziki muri Leta Zunze Ubumwe za Amerika, yanditse kuri Instagram avuga ko Pasiteri Théogène yari Pasiteri yakundaga cyane n’umutima we wose.

Junior Giti uzwi mu basobanura filime yagize ati “Undi mumalaika araruhutse.”    

Pasiteri Théogène yari afite impano yihariye mu ivugabutumwa- Yari azwi cyane muri ADEPR binanyuze mu biganiro binyuranye yagiye agirana n’ibinyamakuru binyuranye

UBWO PASITERI THEOGENE YATANGIRAGA GUKORERA IMANA-ABANTU BAHISE BAMUBONAMO IMPANO

PASITERI THEOEGENE YIGISHIJE IGIHE KININI ACYEBURA URUBYIRUKO
">