Ahabanza Imikino

Imbamutima za Ngendahayo Jérémie wegukanye Isiganwa ryo kwibuka atagira ikipe - VIDEO

Yanditswe na: ISHIMWE Olivier Ba
Taliki:1/05/2023 10:52 0

Ngendahayo Jérémie wakinnye ku giti cye ni we wegukanye isiganwa rya Race to Remember, rigamije kwibuka ku nshuro ya 29 Jenoside yakorewe Abatutsi mu 1994, Ingabire Diane aba uwa mbere mu bagore.

Iri siganwa ngarukamwaka ryabaye kuri iki cyumweru tariki 30 Mata, risozwa ku mugoroba. Ni isiganwa ryabaye mu byiciro 4 harimo Abasheshakanguhe, Abana bakiri bato, Ingimbi n'Abangavu, ndetse n'Abakinnyi bakuru. Aba bose bakoze intera ya kirometero 3.9, ariko bakazenguruka inshuro zitandukanye bigendanye n’imyaka.

Duhere mu Ngimbi n'Abangavu, Nizeyimana Fiacre ukinira Nyabihu Cycling Club, niwe wabaye uwa mbere akoresheje isaha imwe iminota 20 n'amasegonda 43, akurikirwa na Ntirenganya Moses, Byusa Pacifique aba uwa gatatu bose banganya ibihe n'uwa mbere.

Nizeyimana Fiacre niwe wabaye uwa mbere mu ngimbi

Mu Bangavu, Iragena Charlotte ukinira Bugesera Cycling Club yabaye uwa mbere akoresheje isaha imwe, iminota 37 n'amasegonda 50, akurikirwa na Byukusenge Marthe na Mutoni Sandrine bose bakinana muri Bugesera Cycling Club.

Ingabire Diane wabaye uwa mbere mu bagore

Nyuma y'aba bakinnyi bakiri bato hahise hakurikiraho, abantu bosea bari bategeje abakinnyi bakuru aho bagombaga kuzengura kirometeri 3 na metero 900, bakazenguruka inshuro 30 zingana na Kirometeri 117. Ku ruhande rw'abakinnyi bakuru harimo ibihembo bigera kuri 5 byatangiwe mu muhanda, bigendanye n'intego zashyizweho.

Ngendahayo Jérémie yaje kugera ku murongo ari uwa mbere, akoresheje isaha imwe iminota 44 n'amasegonda 57, akurikirwa na Muhoza Eric ukinira Bike Ain wabaye uwa kabiri, Tuyizere Etienne ukinira Benediction Club aba uwa gatatu bose banganya ibihe.

Ngendahayo Jérémie yakinnyi nk'umukinnye umwe ku giti cye kuko amaze iminsi nta nkipe afite, gusa akaba anyuzamo agakora imyitozo mu ikipe ya May Star.

Aganira n'itangazamakuru, Ngendahayo yavuzeko iri siganwa yari aryiteguye cyane. Yagize ati "Byanshimishije cyane, naherukaga gutsinda nkiri mu bakinnyi bato, ubu aha niho ha mbere mbaye uwa mbere mu bakuru. Nari niyizeye kuko na Perezida nari naramubwiye ko nzaba uwa mbere. Nari mfite imyitozo ihagihe cyane ndetse n'icyizere cy'uko nzaba uwa mbere".

Kugeza ubu, abanyamuryango barindwi b’Ishyirahamwe ry’Umukino w’Amagare mu Rwanda (FERWACY) barimo Sakumi Anselme wari Visi Perezida waryo, ni bo bamaze kumenyekana ko bishwe muri Jenoside yakorewe Abatutsi mu 1994.