M1 yakoranye indirimbo na Jose Chameleone bizihiza isabukuru-AMAFOTO

M1 amaze iminsi mu Mujyi wa Kampala mu gihugu cya Uganda, ari naho yahuriye na Joseph Mayanja [Jose Chamelone] bakora iyi ndirimbo.

Iyi ndirimbo bayikoze kuri uyu wa 30 Mata, ari wo munsi bombi bizihirizaho isabukuru y’amavuko. Chameleone agejeje imyaka 44 y’amavuko.

M1 yabwiye InyaRwanda ko bishimishije kuba yizihiza isabukuru y’amavuko ku munsi umwe na Chameleone. Avuga ko ubu bageze kure umushinga w’iyi ndirimbo.

Ati “Ndi gukorana indirimbo na Jose Chameleone. Ni ukugenda gacye kuko nta ‘Audio’ ntabwo ndikuyibona, ariko twamaze no gufata amashusho yayo.”

Yavuze ko we na Chameleone banditse iyi ndirimbo bitaye cyane ku gukangurira abantu kwishima. Akomeza ati “Ni indirimbo twise ‘Free’ muri macye ivuga ku kwibohora, ukumva umeze neza, ugakora uko icyo ushatse ntakibazo.”

Uyu muhanzi yavuze ko mu minsi ya vuba agaruka muri Kigali, hanyuma agategura uburyo bwo kumenyekanisha iyi ndirimbo.

Ndashaka guhita ngaruka muri Kigali, uba uteganya ko ibintu ukabibona ukabona biratinze ariko ndakomeza kubikurikirana.”

M1 aheruka gushyira hanze indirimbo yise ‘Telefone’, amashusho yayo yatunganyijwe na Jordan Hoechlin wakoranye n’abarimo Chris Brown, Patoranking, Otile Brown, French Montana n’abandi bakomeye.

Iyi ni indirimbo uyu muhanzi ashyize hanze nyuma y’imyaka ibiri yari amaze atumvikana mu muziki.

Yavuze ko impamvu yari yarahisemo kuba acecetse mu muziki ari ibibazo yagiye ahura nabyo, byatumye aba afashe akaruhuko.

Uyu musore yavuze ko ubu yongeye kwisuganya, ariko akaba asaba abashoramari gushora mu muziki kuko ari ikintu cyunguka iyo cyitaweho.

M1 yaherukaga gukora indirimbo mu 2020, ubwo yakoraga iyo yise ‘‘Do it again’’. Ni umuhanzi wibanda ku muziki w’injyana ya Dancehall. 

Yatangiye umuziki mu 2012, akora zimwe mu ndirimbo zitandukanye zirimo izamenyekanye cyane, kuva mu myaka irenga icumi ishize.

Uyu muhanzi yamenyekanye cyane mu ndirimbo zirimo “Ibihu’’, “Perfect’’, “Iyo foto’’, “Uritonda’’, “Brenda’’ ari kumwe na Bruce Melodie, “Juliana’’ yakoranye na Umutare Gaby n’izindi. 

Yanyuze mu maboko y’abakomeye mu gutunganya umuziki mu Rwanda, barimo Pastor P n’abandi.

M1 yatangaje ko ari gukorana na Jose Chameleone indirimbo bise ‘Free’ 

M1 yavuze ko bamaze gufata amashusho y’iyi ndirimbo kandi ishobora gusohoka mu minsi iri imbere

M1 yavuze ko bishimishije kuri we kuba yizihiza isabukuru y’amavuko ku itariki imwe na Chameleone 

KANDA HANO UREBE AMASHUSHO Y'INDIRIMBO 'IBIHU' Y'UMUHANZI M1 YAMENYEKANYE CYANE

">