Serge Iyamuremye yasobanuye album ya gatanu y’indirimbo 11 agiye kumurika

Ku mugoroba wo kuri uyu wa Gatanu tariki 28 Mata 2023, nibwo uyu muhanzi wamenyekanye mu ndirimbo zirimo nka ‘Mvura’ yateguje abafana be n’abakunzi b’umuziki muri rusange iyi album y’ivugabutumwa amaze igihe ari kubategurira.

Ni album yihariye kuko yatangiye kuyikoraho ubwo yari mu Rwanda akomereza muri Amerika, yifashisha aba Producer batandukanye mu rwego rwo kuyiha icyanga.

Yabwiye InyaRwanda ko muri rusange indirimbo yakubiyeho zivuga ‘ku buzima bwiza bwa Yesu Kristo’. Ati “Iriho indirimbo 11 ariko ndateganya ko nshobora kongeraho indirimbo imwe zikaba 12. Indirimbo ziriho ziravuga cyane ku butumwa bwiza bwa Yesu Kristo.”

Serge avuga ko yandika indirimbo zigize iyi album yanasubije inyuma amaso ku buzima sosiyete ibamo, bituma yita no gushyiraho indirimbo zihumuriza abantu, ubutumwa bwo gushima n’ibindi yizera neza ko abantu bazayumva bazanyurwa.

Akomeza ati “Ni indirimbo z’ivugabutumwa. Ibyiza Yesu Kristo yakoze ku buzima bwacu ndetse n’ibindi.”

Uyu muhanzi akomeza avuga ko kuri iyi album hariho indirimbo 10 ze wenyine ndetse n’indi ndirimbo imwe yakoranye na Annette Murava [Azwi mu ndirimbo nka 'Niko Nkiri] uherutse kurushinga na Bishop Gafaranga.

Yavuze ko yafashe iki cyemezo cyo kudakorana cyane n’abandi bahanzi, ahanini bitewe n’uko yamaze igihe kinini akorana n’abandi bahanzi. Kuri iyi nshuro, avuga ko yashakaga ko abantu bumva neza ubuhanga bwe n’ubutumwa yabateguriye.

Iyi ndirimbo yakoranye na Annette Murava avuga ko imaze igihe kinini,  Nk’umuramyi, yifuza ko indirimbo ziri kuri album ye ‘zazagarura abantu kuri Kristo cyane cyane urubyiruko, kuko rumaze kubura cyane mu nzu y’Imana’.

Ati “Ni ikintu gihangayikishije Isi muri rusange. Kuko usanga nyine urubyiruko turimo turarubura mu rusengero, ukibaza impamvu ariko harimo ubutumwa bwinshi bagenewe. Indirimbo ikubiyemo ubutumwa bwinshi bw’ibyiringiro kandi buhumuriza abantu, hari abantu baba bacitse intege bibaza ejo bizagenda gute, bizamera gute ariko ni ubutumwa bw’ibyiringiro niko navuga.”

Iyamuremye avuga ko buri ndirimbo iri kuri iyi album yihariye, kandi yayikoze mu njyana itandukanye n’indi ku buryo afite icyizere cy’uko icyiciro cyose cy’ubuzima cy’abantu bazayisangamo.

Uyu munyamuziki asaba buri wese uzumva indirimbo ze akanyurwa kuzazisangiza n’abantu kugirango ubutumwa bw’Imana bugere kure. 

Serge asanzwe afite album zirimo nka “Nta mvura idahita” , “Arampagije”, “Biramvura” ndetse na “Urugendo.” 

Serge Iyamuremye ubarizwa muri Amerika agiye gusohora album yise ‘Saa Cyenda’

Serge yavuze ko indirimbo yakubiye kuri iyi album aziteho kugarura urubyiruko kuri Kristo 

Serge avuga ko yandika indirimbo zigize album ye ya Gatanu yitaye cyane ku butumwa bumazara igihe kirekire

KANDA HANOUREBE AMASHUSHO Y’INDIRIMBO ‘NTAWUNDI NAMBAZA’ YA SERGE IYAMUREMYE

">