Champions League: Real Madrid yamazemo akuka Chelsea

Ni mu mukino wabereye kuri Stamford Bridge sitade ya Chelsea kuri uyu wa Kabiri saa tatu z'ijoro. Umukino ubanza wari wabereye kuri Santiago Bernabeu nabwo Real Madrid yitwara neza itsinda ibitego 2-0.

Abakinnyi 11 ba Chelsea babanje mu kibuga: Kepa; James, Thiago Silva, Fofana, Chalobah, Cucurella; Kovacic, Gallagher, Kanté, Enzo Fernández na Havertz.

Umupira watangijwe na Chelsea ariko wahise urenga ndetse hashira umunota umupira urengurwa ukongera ukarenga.

Umupira wakomeje gukinwa n'abakinnyi ba Real Madrid ariko bakinira mu rubuga rwabo bitonze gacye gacye.

Abakinnyi 11 ba Real Madrid babanje mu kibuga: Courtois; Carvajal, Militao, Alaba, Camavinga; Kroos, Modric, Fede Valverde; Rodrygo, Benzema na Vinicius.

Ku munota wa 8 ni bwo Vinicius yagerageje uburyo bwa mbere ashaka Karim Benzema ariko umupira uhita umurengana ntacyo awumajije. 

Chelsea yinjiye mu mukino mu buryo bugaragara mbere ya Real Madrid ndetse bagahusha n'uburyo bwabazwe, nko ku munota wa 11 hari aho Kante yasigaranye n'izamu gusa ariko atera umupira impande y'izamu gato.

Bumwe mu buryo ikipe ya Chelsea yarase bwabazwe

Bigeze ku munota wa 19 abasore ba Real Madrid binjiye mu rubuga rw'amahina rwa Chelsea aba ariho batangira gukinira ndetse bituma Rodrigo abona umupira arekura ishoti riremereye riragenda rikubita igiti cy'izamu uhita urenga. 

Abasore bakina ku mpande za Chelsea barimo Cucurella na Reece James bagiyeb bahindura imipira myiza imbere y'izamu ariko yahagera igapfa ubusa hakabura utereka mu nshundura. 

Abasore ba Chelsea bageze aho bacira umurongo ntarengwa aba Real Madrid ariko nabo bagacungira ku kwirukankana imipira gusa.

Ku munota wa 42 Luka Modric yahinduye umupira mwiza imbere y'izamu usanga Vinicius ariko ntiyawushyira mu izamu neza bitewe nuko Fofana yari yamubangamiye.

Igice cya mbere kigiye kurangira Courtois wa Real Madrid yakuyemo igitego cyabazwe, ni ku mupira wari uhinduwe na Reece James usanga Cucurella nawe ahita arekura ishoti ariko umuzamu arikuramo. 

Igice cya kabiri cyatangiye Real Madrid ikora impinduka mu kibuga havamo David Alaba hinjiramo Antonio Rudiger ndetse inabona kufura ku ikosa Fofana yarakoreye Vinicius Junior. Kufura yahise iterwa neza Toni Kross maze Chalobah aratabara ashyira umupira muri koroneri.

NG'OLO Kante nyuma yo kurata igitego yibaza ibimubayeho

Umukino mu gice cya kabiri wihutaga ugereranyije no mu gice cya mbere kuko umupira wavaga ku izamu rimwe ujya kurindi. 

Ku munota wa 53 Kante yongeye kurata uburyo bw'igitego ari imbere y'izamu arekura ishoti rikubita kuri Militao rijya muri koroneri.

Ku munota wa 58 Real Madrid yahise ikosora Chelsea, Rodrigo yazamukanye umupira yirukanka maze Chalobah agerageza kuwumwaka biranga, bituma agenda agera mu izamu ahindura kwa Vinicius nawe aramusubiza ahita atsinda igitego cya 1 gutyo.

Chelsea yakoze impinduka mu kibuga ku munota wa 66 havamo Gallagher, Enzo Fernandes na Cucurella hinjiramo Joao Felix, Sterling na Mudryk. 

Chelsea nyuma yo gutsindwa igitego yakomeje kugerageza gushaka uburyo bw'igitego bakinira mu kibuga hagati cyane ariko gutereka mu nshundura birananirana. 

Ku munota wa 80 Vinicius Junior yazamukanye umupira awuhereza Valvelde yandagaza ba myugariro ba Chelsea ahereza umupira mwiza Rodrygo ahita atsinda igitego cya 2 gutyo.

Ikipe ya Real Madrid yahise ikatisha itike ya 1/2 isezerera Chelsea ku kinyuranyo cy'ibitego 4-0. 

Kugeza ubu umwaka w'imikino wa Chelsea usa nk'aho urangiye kuko iki ni cyo gikombe bari basigayemo bahatanira.

Rodrygo watsinze ibitego 2 byose