Umuvandimwe wa Rwasa n’umuhungu we bakiriye igihembo cye! Ibyatunguranye mu bihembo bya RIMA-AMAFOTO

Mu ijoro ryo kuwa 01 Mata 2023 rishyira uwa 02 Mata 2023 nibwo hatanzwe ibihembo mu byiciro bitandukaye, bikubiyemo ibyatanzwe ku rwego mpuzamahanga, mu karere no mu gihugu imbere.

Gusa hirya y’ibyishimo bikomeye buri umwe wagiye wegukana igihembo yagaragazaga, hari ibindi bintu byagiye bisa n’ibitungura abantu kubera uburyo byakozwemo cyangwa n’uko byavuzwemo.

Ibyo tukaba twifuje kubigarukaho duhereye ku gikorwa cyakozwe n’Umuyobozi Nshingwabikorwa wa RIMA, Isimbi Alliance uzwi nka Alliah Cool.

Kuva mu kwinjira kwe yari afite umwihariko yaba mu myambarire n’abari bamushagaye, barimo n’umunyabigango warebereraga umutekano we n’uburyo ku nshuro ya mbere yumvikanye mu ijambo ry’ikaze avuga mu buryo butomoye icyongereza, ibintu nabyo byatunguye abamuzi kuva yinjiye mu ruganda rw’imyidagaduro.

Gusa icyatunguye abantu kurushaho ni ubwo yajyaga gutanga igihembo kuri Best Inspirational International cyegukanwe n’umuherwe kabuhariwe akaba n’umwe mu bamaze igihe kitari gito mu ruganda rwa sinema nyafurika by’umwihariko muri Nigeria.

Uyu mugabo w’imyaka 61, Richard Mofe Damijo wanabaye mu nzego z’ubuyobozi bwa Nigeria kuri ubu ubarirwa mu mutungo wa miliyari 8Frw, ubwo Alliah yajyaga kumuha igihembo yabanje gushyira amavi hasi.

Ibintu bidasanzwe mu muco nyarwanda ariko na none bikunze gukorwa mu bihugu byinshi bya Africa, by’umwihariko muri Nigeria ari naho uyu mugore asigaye abarizwa. Yavuze ko amwubaha cyane kubera ibigwi yubatse, ariko akaba yaremeye kujya muri filimi ye.

Ine Edo, uyu mugore nawe uri mu batunze agatubutse ku myaka ye 40 aho amaze igera kuri 23 akina filimi, ubwo yatambukaga ku itapi itukura yahawe amashyi menshi mu bihe byose yagerwagaho, n’igihe yajyaga kwakira igihembo yegukanye cya Best Actress International.

Ibi ariko bikaba bitari kubw’ibigwi yubatse gusa ahubwo n’uburyo ateyemo nk’igisabo, munda zeru aka ya mvugo nabyo biri mu byatumye benshi mu bari muri Crown Conference batamukuraho ijisho, kandi ubona ko batewe ubwuzu no kumubona.

Imvugo ya Clapton Kibonge irimo gushima no gusa n’ukocora nayo ntizibagirana, ubwo uyu mugabo w’abana 2 yajyaga kwakira igihembo cy’umukinnyi mwiza w’umwaka, icyiciro yaheshejwe na filimi Umuturanyi.

Yumvikanye ashima umuryango we aho yari yanaje aherekejwe n’umugore we n’umwana we mukuru, ibyo ariko byasaga nk’ibisanzwe ariko uburyo yakoreshaga imigani y’imigenurano abwira abanyamahanga bari aho, ni ibintu byatigishije inyubako abantu biyamira cyane.

Hari aho yavuze ko agiye guha ubutumwa mu cyongereza abanyamahanga bahari, birangira agize ati: “Utabusya abwita ubumera.” Ubundi ngo “Ubugabo si ubutumbi.”

Muri ibi bihembo hatanzwe igihembo kihariye ku mukinnyi Nsanzamahoro Denis wamamaye nka Rwasa, washimiwe uruhare rukomeye yagize mu iterambere ry’uruganda rwa sinema nyarwanda.

Iki cyiciro kiswe “Best Legendary”, bikaba byatunguranye ubwo umuvandimwe we yahagurukaga abantu bakongera kumwibuka, kubera ukuntu basa cyane akaba kandi yari aherekejwe n’umwana w’umusore Alliah Cool yise umwuzukuru wa sinema, akanatangaza ko ari umuhungu wa Rwasa.

Hari n’ibindi bitandukanye bidasanzwe byose byagendaga bizamura ibyishimo by’abitabiye mu buryo bw’imbonankubone itangwa ry’ibi bihembo, kandi bizakomeza kugenda binyura abazakomeza kubireba binyuze mu buryo bw’ikoranabuhanga.

Birimo n’ukuntu umwe mu basore bagezweho uzwi nka Mitsutsu yerekanye ko akunda bikomeye Bahavu Usanase Jeannette, mu bari aho bose ari we ahitamo akajya kumuhobera.

Umuherwekazi umaze imyaka igera kuri 23 mu ruganda rwa sinema ni we wabaye umukinnyikazi mpuzamahanga w'umwaka, ashimira uko abanyarwanda bakiramo abantu

Ine Edo kandi uko ateye nk'igisabo byatunguye benshi, bituma yerekezwaho amaso na benshi

Aha Ine Edo yarimo aganira n'umukinnyi mpuzamahanga wa filimi Alliah Cool, uri no mu bayoboye ibihembo RIMA uyu mwaka

Alliah Cool yatunguranye ubwo yajyaga guha igihembo Richard Damijo agapfukama, ibitamenyerewe mu muco nyarwanda

Ubwo umuherwe (ni umwe mu bakinnyi ba filimi bakomeye muri Africa) yinjiraga mu cyumba cy Crown Conference cyarimbishirijwe kwakira ibirori bya RIMA

Clapton Kibonge wavuze ikinyarwanda yise icyongereza k'inshoberamahanga abwira abanyamahanga, yazamuye amarangamutima ya benshi

Icyiciro cy'umukinnyi mwiza w'umwaka yegukenye yagituye abana be n'umugore

Imyitwarire ya Mitsutsu kuri Usanasa Bahavu Jeannette yerekanye ko amukunda by’akataraboneka uburyo yabikozemo binezeza benshi nabyo byari filimi

Umuvandimwe wa Nsanzamaho Denis wamamaye nka Rwasa watabarutse mu wa 2019, n'umuhungu we bari mu batunguranye muri RIMA

AMAFOTO: SANGWA JULIEN-INYARWANDA.COM