Ahabanza Imikino

Hotel ishobora gutuma Amavubi aguma muri Benin

Yanditswe na: ISHIMWE Olivier Ba
Taliki:22/03/2023 7:53 0

CAF yamaze kumenyesha u Rwanda ko Amavubi azakirira ikipe y'igihugu ya Benin muri Benin aho kuba i Huye, kubera ko i Huye nta Hotel yabasha kwakira iki gihugu.

Mu ijoro ryo kuri uyu wa Kabiri, nibwo ishyirahamwe ry'umupira w'amaguru muri Afurika CAF ryamenyesheje ishyirahamwe ry'umupira w'amaguru mu Rwanda FERWAFA ko Amavubi azakirira umukino wayo na Benin muri Benin, kandi ari naho umukino ubanza uri bubere.

U Rwanda rufitanye imikino ibiri na Benin y'ijonjora, ryo gushaka itike y'igikombe cy'Afurika kizabera muri Cote D'Ivoire umwaka. Iyi mikino harimo umukino ugomba kuba kuri uyu wa Gatatu ukabera muri Benin, ndetse n'umukino wo kwishyura wagombaga kubera i Huye kuri sitade mpuzamahanga y'akarere ka Huye tariki 27 Werurwe, ariko CAF ikaba uyu mukino yawuteye utwatsi.

Sitade ya Huye iherutse kuvugururwa ngo izakire imikino mpuzamahanga, ariko byarakozwe hotel ziribagirwa

CAF yandikiye FERWAFA iyimenyesha ko i Huye bakabaye bakirira Benin, nta hotel ihari yakakira ikipe nka Benin. CAF ubusanzwe isaba ko ahantu ikipe y'igihugu ishobora kwakirira imikino, nibura haba hari amahoteli 3 afite inyeyeri 4, ariko i Huye izo hotel ntabwo zihari.

Kuki CAF yategetse u Rwanda kwakirira muri Benin?

Ubusanzwe ikipe y'igihugu niyo itanga ahantu izakirira imikino yayo hakiri kare, noneho CAF ikahemeza amakipe yose akahamenya kare. Kuri ubu rero mu gihe hasigaye iminsi itanu gusa ngo umukino wo kwishyura ube, CAF yanze ibitinda, ihitiramo Amavubi aho agomba kwakirira kandi hadatinza imyiteguro y'umukino.