Christopher yishimiye kurebana na Ambasaderi w'u Rwanda mu Bufaransa umukino wa PSG na Rennes

Kuwa 19 Werurwe 2023, nibwo Rennes yatsindiye ku kibuga cyayo PSG, ibitego bibiri kuri zeru.

Uyu mukino ukaba wararebwe n’ibyamamare bitandukanye birimo na Kim Kardashian, umwe mu banyamideli bakomeye mu isi.

Si we wenyine ariko kuko n’umuhanzi nyarwanda Christopher umaze iminsi ku mugabane w’u Burayi, yabashije kureba uyu mukino imbonankubone.

Uyu musore ukiri muto mu myaka ariko ufite izina riremeye mu muziki nyarwanda, amaze igihe kirenga imyaka 10 akora umuziki by’umwuga.

Mu kiganiro yagiranye n’InyaRwanda yatangaje ko byari iby’agaciro kureba PSG iri gukina, agira ati: "Byari binejeje cyane n'ubwo ikipe yanjye itabashije ariko nishimiye kuba umwe mu bafana bari bahari.”

Agaruka kandi ku kuba yarishimiye kurebana uyu mukino na Ambasaderi w’u Rwanda mu Bufaransa, François Nkulikiyimana ati: "Guhura na Ambasaderi w’u Rwanda byari icyubahiro.”

Ikipe ya PSG ikaba isanzwe ifitanye imikoranire n’u Rwanda binyuze muri gahunda y’Ubukerarugendo ya "VISIT RWANDA", ari nayo yabashije gufasha mu buryo bworoshye uyu muhanzi kureba uyu mukino.

Ku rundi ruhande ariko Christopher yatangaje ko yiteguye gutanga ibyishimo bikomeye mu gitaramo ategerejwemo, hamwe n’abahanzi bandi b’abanyarwanda barimo Riderman na Bwiza.

Iki gitaramo kizaba kuwa 24 Werurwe 2023, mu mujyi wa Lyon wo mu Bufaransa.Christopher yavuze ko yatewe ishema no guhura na Ambasaderi w'u Rwanda mu Bufaransa Ubwo Christopher yiheraga imbonankubone amacenga ya Lionel Messi na Kylian Mbappe, abakinnyi bakomeye ariko batabashije kuwo munsi gutahana intsinziChristopher mu mpera z'iki cyumweru azakorera igitaramo i Lyon ho mu Bufaransa