Henok yegukanye Tour du Rwanda 2023 yasojwe na Perezida Kagame (Uko isiganwa ryagenze) - AMAFOTO +VIDEO

Kuri iki Cyumweru tariki 26 Gashyantare 2023, nibwo hakinwe agace ka munani ari nako ka nyuma ka Tour du Rwanda ya 2023.

Ni agace kasize amateka yihariye ku rugendo rw’ubuzima rw’umunya-Erithrea Henok, kuko ari we wakegukanye. Aka gace ka nyuma kasozwe na Perezida wa Repubulika y’u Rwanda Paul Kagame.

Iri siganwa ryatangiye hakina abakinnyi 93 ariko ryasojwe n’abakinnyi 65. Henok yavuze ko ahesheje ishema igihugu cye n’umuryango we mugari.

Uyu mugabo atwaye Tour du Rwanda 2023, nyuma y’uko atwaye uduce tubiri tw’iri rushanwa.

Henok, ni umunya-Eritrea wigaragaje cyane kugeza ubwo yegukanye Tour du Rwanda

Henok yanditse amateka akomeye muri Tour du Rwanda ya 2023. Yavuze ko umuryango we wishimye

Perezida Kagame yasoje Tour du Rwanda 2023 yegukanwe na Henok w'imyaka 23 y'amavuko

UKO AGACE KA NYUMA KA TOUR DU RWANDA 2023 KAGENZE MURI RUSANGE:

Saa 12:39': Hari hasigaye ibirometero 3, hakamenyekana uwegukana Tour du Rwanda.

Saa 12:23': Perezida Paul Kagame yageze i Rebero, yitabiriye isozwa ry'agace ka nyuma ka Tour du Rwanda 2023.

Saa 12:15': Agace kari kashyizweho intego y'ahazamuka, Main yakaminutse ari uwa mbere, Mulubrhan aba uwa kabiri, Yemane aba uwa gatatu n'aho Lecerf aba uwa kane.

Saa 12:08': Agace ka kabiri kari kashyizweho intego y'ahatambika, Bennet yabaye uwa mbere, Lecerf aba uwa kabiri, Calzoni aba uwa gatatu.

Saa 12:03': Abakinnyi banze kugenda mu muhanda w'amabuye, baragera mu muhanda w'amabuye bakanyura ku gace gato gafite uburambure bwemye.

Saa 12:00': Abakinnyi bari maze kugenda ibirometero 48.

Saa 11:55': makipe atatu gusa niyo yari agifite abakinnyi buzuye. Ayo makipe akaba ari Green Project, inafite umukinnyi wambaye umwenda w'umuhondo, Eskaltel na Bolton. Buri kipe yitabiriye Tour du Rwanda igomba kuba ifite abakinnyi batanu.

Saa 11:35':  Isiganwa rya Tour du Rwanda 2023, ryabaye isiganwa rya mbere rivuyemo abakinnyi benshi bagera kuri 30 mu gihe umwaka ushize hari havuyemo abakinnyi 25

Saa 11:32': Agace ka gatatu kari kashyizweho intego y'ahazamuka, Pritzen yakaminutse ari uwa mbere, Arefayne aba uwa kabiri, Bonnet aba uwa kane, De la parte aba uwa kane.

Saa 11:28': Abakinnyi bamaze kugenda Kirometero 26.

Saa 11:25': Abakinnyi bari bamaze kugenda Kirometero 18.

-Ubwo banyuraga ahahoze gereza ya (1930):

Stewart (Bolton) yari yamaze kuyobora isiganwa wenyine. Inyuma ye ho 15'', hari itsinda ry’abakinnyi 13 barimo; Henok Mulueberhane, Bonnet ukinira TotalEnergies, Grellier nawe ukinira TotalEnergies, Calzoni wa Q36.5, Tolio ukinira Green Project, Lecerf ukinira Soudal-QuickStep, Vernon ukinira Soudal-QuickStep;

De la Parte ukinira TotalEnergies, Blackmore ukinira GBR, Fouche ukinira Bolton, Kusztor ukinira Novo Nordisk, Ormiston ukinira ikipe ya Afrika Y'Epfo na Berasategi ukinira Euskaltel.

Abafana ku muhanda bari bose yaba abava gusenga n'abari kujyayo icyo bari kubona ni igare

Saa 11:12': Abakinnyi 15 barimo Henok Mulubrhan wambaye umwenda w'umuhondo nibo bari bayoboye isiganwa.

Saa 11:09': Agace ka mbere kashyizweho intego y'ahazamuka ahagana kuri SP Nyamirambo, Bonnet yabaye uwa mbere, Calzoni aba uwa kabiri, De la parte aba uwa gatatu.

Saa 11:05': Abakinnyi bane nibo bayoboye isiganwa barimo Lecerf Grellier na Bonnet bakinira Soudal-QuickStep na Stewart ukinira Bolton.

Mugisha Moise niwe wegukanye agace ka nyuma ka Tour Rwanda ya 2022 nabwo kasorejwe ku i Rebero, gusa kuri iyi nshuro ntabwo yari ahari kuko yavuyemo mu irushanwa berekeza i Gicumbi

Saa 10:56': Agasozi ka mbere kashyizweho intego, kari i Rebero, Jeanniere yakaminutse ari uwa mbere, Pritzen aba uwa kabiri, Nsengimana aba uwa gatatu Arefayne aba uwa kane.

Saa 10:53': Abakinnyi bari bamaze kugenda Kirometero 6.

Saa 09:39': Abakinnyi bari batangiye kubarirwa ibihe.

Abasiganwa, baragenda Kirometero 75 bazenguruke mu bice bitandukanye bya Kigali, bagaruke ku i Rebero ari naho basoreza.

Saa 10:35': Abakinnyi 63 nibo batangiye agace ka nyuma ka Tour du Rwanda. Tubibutse ko abakinnyi 93 aribo bari batangiye Tour du Rwanda bagenda bavamo buhoro buhoro, bivuze ko abakinnyi 30 aribo bamaze kuva mu isiganwa.

Saa 10:30': Isiganwa ryari ritangiye

Isiganwa riratangiye abakinnyi barabanza kugenda Kirometero 5 na metero 200, babone gutangira kubarirwa.

Saa 10:08': Biteganyijwe ko isiganwa rya Tour du Rwanda agace ka nyuma gatangira ku isaha ya saa 10:30, bagakora umuzenguruko wa Kirometero 75.

Saa 10:04': Amakipe ari kwerekanwa

Henok Mulubrhan uyoboye abandi ku rutonde rusange, ubwo yiteguraga guhatana

Amakipe agera kuri 19 yitabiriye Tour du Rwanda 2023 ari kwerekana abakinnyi

Ikipe y'igihugu y'u Rwanda isigaranye abakinnyi batatu gusa aribo; Masengesho, Nsengimana Jean Bosco na Niyonkuru Samuel.

Saa 09:50': Haraburaga iminota 50 isiganwa rigatangira.

Kuva Tour du Rwanda yaba mpuzamahanga, abanyarwanda batatu gusa nibo bamaze kwegukana agace ka nyuma ka Tour du Rwanda.

Agace ka nyuma ka Tour du Rwanda n'abakegukanye

2009: Lahsaini Mouhssine ukomoka muri Maroc yegukanye agace ka nyuma kavaga Nyagatare Kigali.

2010: Debesay Frekalsi ukomoka muri Eritrea yegukanye agace ka nyuma ka Kigali - Kigali

2011: Biziyaremye Joseph yabaye umunyarwanda wa mbere wegukanye agace ka nyuma ka Tour du Rwanda ubwo bavaga i Kibuye berekeza i Kigali.

2012: Langlois Bruno ukomoka muri Canada yegukanye agace ka nyuma ka Kigali- Kigali.

2013: Lagab Azzedine ukomoka muri Algeria yegukanye agace ka nyuma ka Kigali- Kigali.

2014: Mraouni Salah Eddine ukomoka muri Moroc yegukanye agace ka nyuma ka Kigali - Kigali.

2015: Eyob Metkel ukomoka muri Eritrea yegukanye agace ka nyuma ka Kigali-Kigali.

2016: Tesfom Okbamariam ukomoka muri Eritrea, yegukanye agace ka nyuma ka Kigali - Kigali.

2017: Ndayisenga Valens yabaye umunyarwanda wa kabiri wegukanye agace ka nyuma ka Tour du Rwanda.

2018: Lagab Azzedine wo muri Algeria yegukanye agace ka nyuma ka Tour du Rwanda, aba umukinnyi wa mbere ubikoze kabiri.

2019: Rodrigo Contreras ukomoka muri Colombia yegukanye agace ka nyuma ka Tour du Kigali - Kigali.

2020: José Manuel Diaz ukomoka muri Espagne yegukanye agace ka nyuma ka Tour du Rwanda Kigali - Kigali.

2021: Cristian Rodriguez nawe ukomoka muri Espagne yegukanye agace ka nyuma ka Tour du Rwanda Kigali - Kigali.

2022: Mugisha Moise yabaye umunyarwanda wa gatatu wegukanye agace ka nyuma ka Tour du Rwanda, gusa kuri ubu ntafite ubushobozi bwo gufata agahigo ka Lagab Azzedine kuko yavuye mu irushanwa ritarangiye.

Kuva tariki 19 Gashyantare abasore baturutse mu bice bitandukanye by'Isi bari mu Rwanda, aho bahataniraga kwegukana Tour du Rwanda iri gukinwa ku nshuro ya 15 kuva ibaye mpuzamahanga. Kuri uyu munsi abasiganwa barakina agace ka nyuma, ari nako gace gato muri Tour du Rwanda y'uyu mwaka.

Abasiganwa bagenze  Kirometero 75 na metero 300. Abakinnyi bahagurikiye kuri CANAL OLYMPIA ku i Rebero,  batangira kubarirwa bageze Camp Zaïre.

Abakinnyi baranyura, Kanogo - Rugunga - SEGEM - Gikondo kwa Mironko - Merez 1 - Merez 2 - Umuhanda w'amabuye -Rond point Rebero - Miduha - LP - Kuri Tapis - Kwa Gisimba - Nyakabanda - Kwa Mutwe - Mosqué Majengo - ONATRACOM - Gitega - Gereza - Yamaha - Kinamba - Poids Lourds - Kanogo bahazenguke inshuro 3.

Rugunga - SEGEM - Gikondo kwa Mironko - Merez 1 - Merez 2 - Umuhanda w'amabuye - Rond point Rebero basoreze n'ubundi kuri Canal Olympia i Rebero.

Iri siganwa ryatangiye tariki 19 Gashyantare aho abasiganwa bavuye Kigali berekeza i Rwamagana, ku ntera ya Kirometero 115.6. Vernon Ethan niwe wabaye uwa mbere akoresheje amasaha 2, iminota 45 n'amasegonda 52.

Bukeye bwaho abasiganwa bahagurutse i Kigali berekeza mu karere ka Gisagara, ku ntera ya Kirometero 132 na metero 900.Aka gace nabwo kegukanwe na Ethan Vernon akoresheje amasaha 3 iminota 22 n'amasegonda 30,akaba nabwo yaracitse abari bamukurikiye benda gusoza.

Ethan ukomoka mu Bwongereza, niwe wegukanye agace ka mbere n'aka kabiri ka Tour du Rwanda 2023, aba n'umwongereza wa mbere ubikoze

Ku munsi wa gatatu, abakinnyi bakoze intera ndende muri Tour du Rwanda y'uyu mwaka, kuko bagenze Kirometero 199 na metero 500, bava Huye berekeza Musanze. Icyo gihe, Henok Mulubrhan ukinira Green Project wari wabaye uwa kabiri bajya Gisagara, yaje kuba uwa mbere akoresheje amasaha 5 iminota 13 n'amasegonda 37.

Tariki 22 Gashyantare, abakinnyi bahagurutse i Musanze berekeza i Karongi ku ntera ya Kirometero 138 na metero 500, Thomas Bonnet ukinira TotalEnergies agera i Karongi ari uwa mbere akoresheje amasaha 3, iminota 19 n'amasegonda 23.

Henok, yari umwe mu bakinnyi bakunzwe muri iri siganwa

Agace ka gatanu kahagurutse Rusizi kerekeza Rubavu, aho abakinnyi bakoze intera ya Kirometero 195 na metero 500, Ormiston Callum ukinira ikipe y'igihugu ya Afurika y'Epfo niwe wageze i Gisenyi ari uwa mbere, aho yakoresheje amasaha 4, iminota 59 n'amasegonda 51.

Agace ka gatandatu kakinwe tariki 24 Gashyantare 2023, aho abakinnyi bahagurutse Rubavu berekeza i Gicumbi, ku ntera ya Kirometero 157. Icyo gihe, Badilatti Matteo ukinira ikipe ya Q36 Pro Cycling team niwe wegukanye aka gace, akoresheje amasaha 4 iminota 11.

Thomas Bonnet niwe wegukanye agace ka kane kavaga i Musanze kerekeza i Karongi

Isiganwa ryahise rigaruka i Kigali, aho kuri uyu wa gatandatu abakinnyi bahagurukiye i Nyamata berekeza i Kigali ku ntera ya Kirometero 115. Tarozzi Manuele niwe wabaye uwa mbere wakoresheje amasaha 2, iminota 58 n'amasegonda 53.

Henok Mulubrhan niwe wakoresheje ibihe bike ari nawe wari uyoboye isiganwa, akaba amaze gukoresha amasaha 26, iminota 53 n'amasegonda 9 anganya na Calzoni Walter, mu gihe Muhoza Eric ukinira Bike Aid ariwe munyarwanda uza hafi kuko arushanwa n'umukinnyi wa mbere amasegonda 8.

Callum Ormiston ukomoka muri Afurika y'Epfo, niwe wegukanye agace ka 5 kavaga Rusizi kerekeza i Gisenyi

Umusuwisi Badilatti Matteo niwe wegukanye agace ka gatandatu kavaga i Rubavu kerekeza i Gicumbi

Manuele Tarozzi ukomoka mu Butariyani, niwe wegukanye agace ka karindwi abenshi bavuga ko ariko gace kari kagoye muri iri siganwa uyu mwaka

Muhoza Eric, umukinyi w'umunyarwanda wigaragaje cyane muri Tour du Rwanda ya 2023

Mugisha Moise wari amizero y'abanyarwanda yaje kuva mu isiganwa ubwo hakinwaga agace ka gatandatu

Sosiyete ya MANGO 4G yagendanye na Tour du Rwanda 2023 kuva yatangira

REBA HANO UREBE UKO HENOK YEGUKANYE TOUR DU RWANDA YA 2023

">

AMAFOTO: Tour du Rwanda-