EPL: Arsenal yakuye mu nzira Leicester City, ikomeza gutereta umwanya wa mbere

Ni mu mukino wabereye kuri sitade ya Leicester City King Power stadium kuri uyu wa Gatandatu tariki 25 Gashyantare 2023, saa kumi nimwe muri shampiyona y'u Bwongereza.

Abakinnyi ba Leicester 11 babanje mu kibuga: Ward; Castagne, Souttar, Faes, Kristiansen; Dewsbury-Hall, Ndidi; Tete, Praet, Barnes na Iheanacho.

Ikipe ya Arsenal yatangiye umukino ikina yihuta cyane kandi inahererekanya neza. Ku munota wa 3 gusa Xhaka yarabonye uburyo bw'igitego ariko arekuye ishoti rikubita kuri myugariro wa Leicister City rijya muri koroneri.

Abakinnyi 11 ba Arsenal babanje mu kibuga: Ramsdale; White, Saliba, Gabriel, Zinchenko; Odegaard, Jorginho, Xhaka; Saka, Martinelli na Trossard.

Abakinnyi ba Leicester City bagezeho bose basubira gukinira inyuma bitewe nukuntu Arsenal yariri kwiharira umupira cyane bakinira mu kibuga hagati. 

Mu minota 17 Arsenal yakije umuriro imbere y'izamu rya Leicester City ndetse Bukayo Saka aboba uburyo bwo gutsinda ibitego 2 ariko ntiyabyaza amahirwe umusaruro. 

Zinchenko wari wambaye igitambaro cya Kapiteni kubera kuzirikana ko umwaka ushize igihugu cye cya Ukraine gishojweho intambara n'u Burusiya

Arsenal yaje kubona igitego ku munota wa 27 gitsinzwe na Leandro Trossard ku mupira yari ahawe na Xhaka ariko umusifuzi aracyanga kubera ko Ben White yari yafashe akaboko ka Ward ufatira Leicester City. 

Mu minota 38 ba rutahizamu ba Leicister City barimo Tete na Iheanacho bagerageje gutungurana birukankana imipira ariko igitego kirabura burundu bituma igice cya mbere kirangira ari 0-0.

Igice cya kabiri cyatangiye Arsenal ibona igitego cya mbere gitsinzwe na Gabriel Martinelli ahawe umupira mwiza na Leandro Trossard awucishije mu maguru ya Castagne. 

Nyuma yo gutsinda igitego gukina neza byiyongereye cyane bituma bongera no kubona igitego cya 2 ku munota wa 55 gitsinzwe na Bukayo Saka ariko Martinelli wari amuhaye umupira yari yaraririye bituma umusifuzi acyanga.

Igitego Martinelli yatsinze 

Ku munota wa 62 Leicester City yakoze impinduka mu kibuga havamo Kelechi Iheanacho na Tete hinjiramo Jamie Vardy na Youri Tielemans bituma batangira gusatira ku buryo bworoshye.

Ku munota wa 72 Dewsbury-Hall yagerageje kurekura ishoti ariko rinyura impande y'izamu gato. Iminota 90 yarangiye hongerwaho iminota 5 y'inyongera ariko yabereye umutwaro Arsenal kuko yatatswe cyane, umukino warangiye Arsenal itsinze igitego 1-0.

Kugeza ubu Arsenal ikomeje kuba ku mwanya wa 1 n'amanota 57 naho Leicester City yo iri ku mwanya wa 14 n'amanota 24.

Leandro Trossard watanze umupira uvamo igitego