Imikino y'umunsi wa 19 yatangiye kuri uyu wa Gatanu, aho Kiyovu Sports yari yakiriye Rwamagana City mu mukino wabaye nta bafana bahari, mu buryo bwo kubahiriza ibihano Kiyovu Sports yahawe na FERWAFA.
Mu irungu rikomeye cyane amakipe yombi
yamanutse mu kibuga ashaka amanota atatu, nyuma yaho Rwamagana City yari
iherutse gutsindwa na Marine FC, Kiyovu Sports imaze kunganya na Rayon Sports.
Ku
munota wa 38 Kiyovu Sports yafunguye amazamu ku gitego cyatsinzwe na Abedi
Bigirimana, gusa Rwamagana City yanga kujya kuruhuka idakozemo, nayo ku munota
wa 45 itsinda igitego amakipe ajya kwitekerezaho ari igitego kimwe kuri kimwe.
Mu
gice cya kabiri, Kiyovu Sports yaje irwana n'igitego kugira ngo nibura irebe ko
yabona amanota 3 yari ikumbuye, ndetse ku munota wa 76, Abedi Bigirimana wari
mwiza muri uyu mukino, atsinda igitego cya kabiri, umukino urangira
Kiyovu Sports yegukanye amanota atatu.
Undi mukino, wabereye mu Karere ka Bugesera, aho Gasogi United yari imaze iminsi ikubita buri umwe, yaje guta amanota 2 imbere ya Rutsiro FC nayo imaze imikino 2 idatsindwa.
Gasogi United niyo yafunguye amazamu ku gitego cyatsinzwe na Max
Well Djoumekou ku munota wa 35, mu gihe ice cya mbere cyenda kurangira mu
minota y'inyongera, Jule Watanga yishyurira Rutsiro FC.
Mu
gice cya kabiri, Niyongira Danny wahoze muri Bugesera FC yaje gutsindira Gasogi
United igitego cya kabiri ku munota wa 64, mu gihe ku munota wa 80 Rutsiro FC
yaje kucyishyura gitsinzwe na Matata Gakuru, umukino urangira uko.
Gasogi
United yagumye ku mwanya wa 2 n'amanota 36, irushwa inota rimwe na APR FC, Kiyovu
Sports ikaba yaje ku mwanya wa 3 n'amanota 35 irusha amanota 2 Rayon Sports na
As Kigali zitarakina umunsi wa 19.
