Baduhengetseho ikibuga - Bruno Fernandes na Pepe batashye bavuma FIFA n'umusifuzi wo muri Argentine

Umugoroba wo kuwa 10 Ukuboza 2022, washaririye abanya-Portugal bose nyuma yo gusezererwa mu gikombe cy'isi na Marooc, yabatsindiye igitego kimwe ku busa (1-0) mu mukino wa ¼ cy'irangiza.

Portugal yihariye umupira ku rugero rwa 73%, itera Koruneri 9 kuri 3 Marooc ndetse itera amashoti 6 akomeye agana ku izamu, byumvikanisha mu gukina bisanzwe, Seleçao ya Portugal ntako itari yagize, ariko igitego cyo cyarabuze.

Igitego rukumbi cyabonetse muri uyu mukino watumye Marooc iba igihugu cya mbere cyo muri Africa kigeze muri ½ mu mateka y'igikombe cy'isi, ni icyatsinzwe na rutahizamu Yousef  En-Nesyri wateye umupira n'umutwe ku munota wa 42.

Abanya-Marooc bishimiye kwandika amateka

Nyuma y'umukino, Bruno Fernandes na myugariro Pepe de Lima banengeye mu itangazamakuru abateganije umusifuzi wo muri Argentine nayo ikiri mu irushanwa, bavuga ko yabasifuriye umukino nabi ku buryo batekereza ko igikombe cyateguriwe Argentine.

Pepe yagize ati "Ntabwo twakabaye dusifurirwa n'umunya-Argentine nyuma y'ibyabaye ejo hashize, nyuma y'uko Messi n'abandi banya-Argentine bose banenze imisifurire (ku mukino bahuyemo n'u Buholandi)."

"Ubu mu gice cya kabiri twakinnye iki? Umunyezamu (wa Marooc) yaryamye mu kibuga ariko batwongeje iminota 8 gusa. Twe twakoze byose, ariko se iminota umunani koko? Ntabwo twakinnye n’ubwo ari twe twenyine twagumanye umupira. Turababaye, twakagombye gukomeza mu gikombe cy'isi ariko ntitwabigezeho."

Umujinya wari mwinshi, Pepe yivovotera Facundo Tello

Bruno Fernandes we yagize ati "Sinzi niba Argentine bagiye kuyiha igikombe. Nta bindi nitayeho, ndavuga gusa ibyo ntekereza. Ntibyari bikwiriye ko tuyoborerwa umukino n'umunya-Argentine kandi nayo ikiri mu irushanwa. Mu bigaragara baduhengetseho ikibuga."

Umusifuzi Facundo Tello w'imyaka 40 y'amavuko wayoboye umukino Marooc yandikiyemo amateka, yitotombewe n'abanya-Portugal bagenda bavuma FIFA, mu gihe nyamara abo ku zindi mpande bavuga ko Tello na bagenzi be bayoboye umukino neza abo muri Portugal bakinanirwa.

Abanya-Portugal batashye batabyumva

Imikino y'igikombe cy'isi izakomeza kuwa Kabiri no kuwa Gatatu w'iki cyumweru, aho Argentine yasezereye u Buholandi izahangana na Croatia yakuyemo Brazil, naho Marooc yasezereye Portugal yo igahangana n'u Bufaransa bwaraye bwirukanye u Bwongereza mu irushanwa.