Filime ebyiri z’Abanyarwanda zatoranyijwe mu zizerekanwa kuri Al Jazeera

Izi filime zirihariye-Imwe ivuga ku mwihariko w’inyogosho y’amasunzu, indi yitsa ku munyamakuru w’imikino ufite ubumuga bwo kutabona neza, Léonidas Ndayisaba.

Izi filime ebyiri ni zimwe muri filime 14 mbarankuru zatoranyijwe mu bihugu icyenda (9) zigomba guhagararira Afurika mu cyiciro cya kabiri cy’izigomba guca kuri Al Jazeera mu ishami ry'Icyongereza, guhera ku wa 6 Ukuboza 2022.

Filime ebyiri zo mu Rwanda zizatambuka kuri Al Jazeera ni “Legacy” ya Mutiganda wa Nkunga. Yabwiye InyaRwanda ko ivuga ku nyogosho yihariye y’amasunzu n’uburyo ari umurage wihariye w’abanyarwanda.

Ati “Nkaba narayikoze ngira ngo nerekane ko hari byinshi byihariye - nk’iyo nyogosho - abanyarwanda bagiraga nyamara bikaza kugenda bikendera buhoro buhoro bitewe n’imbaraga za gikoroni.”

Mutiganda wa Nkunda asanzwe afite amasunzu ku mutwe we biri mu byamuteye gukora iyi filime. Akomeza ati “Kuva nayashyiraho (amasunzu) nabonye uburyo ki ari inyogosho yamaze kuba inshoberamahanga no ku banyarwanda ubwabo kuko ahantu hose nyura hari abo usanga batazi ibyaribyo;

“Bamwe usanga batokesha satani bantuka ngo nagaruye iby’abakera baterekeraga n’ibindi. Nasanze kandi abanyamahanga benshi batazi ibyaribyo kuko akenshi aho nyura baba batangaye, ngenda mbazwa iyo nyogosho iyo ariyo, kandi yarabayeho ibinyejana n’ibinyejana mbere y’uko Kiliziya ikura kirazira.”

Yungamo ati “Bituma mvuga nti, uyu ni umurage wacu ntukazimire burundu dore ko ari n’inyogosho itagira uko isa kandi yuje ubuhanga buhanitse mu kuyitunganya.”

Hari kandi filime “Feeling the Game” ya Karemangingo Samuel Ishimwe igaruka ku rugendo rw’umunyamakuru Léonidas Ndayisaba ukorera i Kigali, ufite ubumuga bwo kutabona. Witabira imikino ku bibuga by’umupira, agakora ibiganiro kuri Radio n’ibindi bitanga ubutumwa bw’uko “ubumuga ntibusobanuye kudashobora.”

Ndayisaba yakuze akunda umupira w’amaguru biramuhira avamo n’umunyamakuru w’imikino kuri Radio. Yakoreye ibitangazamakuru birimo Flash Fm.

Yigeze kubwira BBC y’abongereza ati “Ati: "N'ubusanzwe nari umukunzi w'umupira w'amaguru kuva nkiri mutoya. Nkura numva radio, numva abogeza umupira nko kuri BBC uwitwa John Nene na Charles Hilary bogezaga ibintu by'imipira cyane, kugeza muri kaminuza mbumva, ndavuga nti 'nanjye nkwiriye gukora umwuga w'itangazamakuru nkagira icyo mvuga'".

Muri uyu mwaka, Al Jazeera yahisemo filime zo muri Mali, Rwanda, Kenya, Afurika y’Epfo, Ghana, Nigeria, Cameroon, Gabon na Mozambique.

Filime zo muri Mali zizerekanwa ni First Dance Steps: Don Sen Folo ya Ousmane Zoromé Samassékou, Medine na The Heritage ya Andrey S. Diarra.

Afurika y’Epfo ifite filime ebyiri; The Last Speaker ya Nadine Angel Cloete na Guerrilla Garden ya Omelga Mthiyane.

Kenya ifite filime nka Ice Lions ya Moses Obuye ndetse na Conservation from Above ya Rahab Wambui.

Mu itangazo rigenewe abanyamakuru, Umuyobozi Ushinzwe ibijyanye na filime Mbarankuru kuri Al Jazeera, Ingrid Falck yavuze ko ‘izi filime zose zatoranyijwe’ zibanda ku mibereho ya muntu’ kandi zigatanga ubutumwa bugirira akamaro isi yose muri rusange. Avuga ko zitunga itorisho mu mibereho ya buri munsi y’uyu mugabane.

Al-Jazeera isanzwe ikorana na studio itunganya filime yo muri Afurika y’Epfo yitwa Big World Cinema mu mushinga wo guteza imbere filime zo muri Afurika.

Izi filime zizatambuka mu buryo bukurikira:

Tariki 6|12|2022: Filime ‘First Dance Steps (Mali) na A Legacy (Rwanda).

Tariki 13|12|2022: The Last Speaker (South Africa) na Studio of Archives (Ghana).

Tariki 20|12|2022: Giant Little Choppers (Mozambique) na Kenya Ice Lions (Kenya).

Tariki 27|12|2022: A Stone Crusher’s Song (Nigeria), Guerrilla Garden (South Africa) na Modern Peanuts of Cameroon (Cameroon).

Tariki 1|01|2023: Medine, The Heritage (Mali) na Making Her Future (Gabon).

Tariki 6|01|2023: Conservation from Above (Kenya), Joy in Traffic (Nigeria) na Feeling the Games (Rwanda).    

Filime ishingiye kuri Léonidas Ndayisaba ufite ubumuga bwo kutabona izatambuka kuri Al Jazeera 

Mutiganda asanzwe afite amasunzu ku mutwe we biri mu byamuteye gukora iyi filime ‘Legacy’ 

Mutiganda avuga ko kuva yashyiraho amasunzu yibazwaho na benshi

Karemangingo Samuel Ishimwe wakoze filime ‘Feeling the Game’

Mu 2017, uyu musore yegukanye igikombe mu iserukiramuco Berlinale ryabereye i Berlin mu Budage abicyesha filime ye ngufi yise ‘Imfura’. Ni we munyarwanda wa mbere wari werekanye filime muri iri serukiramico