Ku mugoroba wo kuya 19 Ukwakira, kuri Stade ya Kigali i Nyamirambo, habereye umukino wa kamarampaka wahuzaga amakipe ya Youvia WFC yo muri Rulindo na AS Kabuye y'i Kigali, hashakwamo ikipe imwe isanga izindi muri shampiyona y'icyiciro cya mbere.
Muri Gashyantare 2022 nibwo shampiyona y'icyiciro cya kabiri mu bagore yashyizweho akadomo, hazamuka amakipe ya IPM WFC na Kayonza WFC yahuriye ku mukino wa nyuma, mu gihe Youvia WFC na AS Kabuye zari zasezerewe muri 1/2.
Amakipe ya Youvia na Kabuye yaje gutumizwa mu ntangiriro z'uku kwezi, abayayobora babwirwa ko hari gahunda yo kongera amakipe akina shampiyona y'icyiciro cya mbere, bityo bagomba gukina muri kamarampaka hakaboneka ikipe yiyongera ku yandi yazamutse.
Ndarama Marc, Perezida akaba n'umutoza mukuru wa Youvia WFC
Nyuma y'aho, aya makipe yombi yiteguye umukino anahurira i Nyamirambo kuya 19 Ukwakira, bakina mu mukino warangiye Youvia WFC itsinze AS Kabuye Penaliti 5 kuri 4, nyuma yo kunganya igitego kimwe kuri kimwe (1-1) mu minota 90 isanzwe y'umukino.
Umukino urangiye, Ndarama Marc uyobora Youvia WFC yavuze ko banezerewe kubwo kugaruka muri Shampiyona y'icyiciro cya mbere, bari bamaze imyaka itanu baharanira kugarukamo.
Ku ruhande rwa Dusabimana Emmanuel (Lucky Fire) uyobora AS Kabuye, yavuze ko ntacyo bimutwaye kuguma muri Shampiyona y'icyiciro cya kabiri kuko ariho hamworohereza kandi afite ubushobozi bwo kuba yahatwara igikombe.
Dusabimana Emmanuel, Perezida akanaba umutoza mukuru wa AS Kabuye
Biteganijwe ko Shampiyona y'umwaka wa 2022-2023 y'icyiciro cya mbere mu bagore izatangira kuwa 29 Ukwakira 2022 ikitabirwa n'amakipe 12, mu gihe Shampiyona y'icyiciro cya kabiri yo iteganijwe gutangira ku ya 8 Ugushyingo 2022.
Youvia na Kabuye bahuriye mu mukino ukomeye
Umutoza Lucky Fire aha amazi rutahizamu Kabera Odille 'Onana' watsinze igitego cyiza
AS Kabuye bishimira igitego
Abakinnyi ba Youvia WFC bahabwa amabwiriza n'abatoza
Youvia WFC bishimira igitego cyo kwishyura cyabonetse ku munota wa 85'
Abakapiteni batombora aho gutereka Penaliti nyuma yo kunganya mu minota 90
Youvia WFC bishimira kugaruka mu cyiciro cya mbere nyuma y'imyaka 5
Tumutoneshe Diane (Hagati) ushinzwe umupira w'abagore muri FERWAFA yarebye uyu mukino
Umuyobozi wa Tekiniki muri FERWAFA, Gerard Busher (iburyo) na we yakurikiranye umukino