Si Bruce Melodie ugiye kwerekeza mu Burundi kuko amakuru aravuga ko uyu muhanzi azahagurukana n’abarimo Dj Brianne mu gihe Made Beats ndetse n’umujyanama wa Bruce Melodie bo bamaze kugerayo.
Mu kiganiro gito Dj Brianne yagiranye na inyaRwanda.com yavuze ko uyu mwaka afite ibikorwa byinshi cyane, akaba azagenda abitangaza. Ibyo bikorwa birimo n’igitaramo agiye gukorera mu Burundi.
Dj Brianne agiye kwerekeza muri iki gihugu nyuma y’uko Producer MadeBeatz ndetse na Coach Gael umujyanama wa Bruce Melodie bahasesekaye bakakirwa mu buryo budasanzwe.
Mu mafoto n’amashusho inyaRwanda.com ifite agaragaza abarimo Producer MadeBeats bakirwa ku kibuga cy’indege cya Melchior Ndadaye International Airport mu Bujumbura.
Coach Gael na MadeBeats
Bakigera kuri iki kibuga bagaragaye bahabwa indabo na kompanyi yitwa Ibirezi yo mu Burundi yari yabiteguye neza nk’umuco mwiza wo kwakira umuhanzi.
Mu ijoro ryo kuwa 18 Kanama 2022, nibwo Bruce Melodie yifashishije konti ye ya Instagram, Atangaza ko ku wa 2-3 Nzeri 2022 azakorera ibitaramo bibiri mu Mujyi wa Bujumbura mu Burundi yise "Bruce Melodie Live Concert Burundi-Bujumbura.
Dj Brianne ni inshuti ya Coach Gael
Uyu muhanzi uherutse gusohora indirimbo ‘Akinyuma' yabwiye Abarundi ko 'iki ni igihe cyo kubaha igitaramo gikomeye', asaba buri wese kuzirikana amatariki.
Muri Nyakanga 2021, Bruce Melodie yagombaga kuba yarakoreye ibitaramo nk'ibi mu Burundi bisubikwa ahanini bitewe n'ingamba zo kwirinda Covid-19.
MadeBeats Ubwo yageraga i Burundi
Icyo gihe, Minisitiri wUmutekano mu Burundi, Gervais Ndirakobuca, yavuze ko mu rwego rwo kwirinda Covid-19 nta muhanzi w'umunyarwanda uzemererwa gutaramira muri iki gihugu.
Ibirezi Nibo bakiriye abarimo MadeBeats
Coach Gael ubwo yageraga mu Budundi
Dj brianne ni umwe mu ba Dj bakomeye mu Rwanda