Manizabayo Eric na Tuyishime Jacqueline ba Benediction, begukanye Kibugabuga race II - AMAFOTO

Iri siganwa ryateguwe ku bufatanye bw’Ishyirahamwe Nyarwanda ry’Umukino wo gusiganwa ku magare n’Akarere ka Bugesera, rigaterwa inkunga na Rwandair, ryitabiriwe n'abakinnyi 89 bo mu makipe 18, aho bari mu byiciro bitatu.

Abo mu cyiciro cy'abagabo bakuze bahagurukiye i Kabuga babanza kuzenguruka uduce tw'akarere ka Kicukiro, mbere yo gufata umuhanda wa Nyanza - Nyamata - Ruhuha - GS Kamabare ahareshya na Kilometero 116.

Muri iki Cyiciro, Manizabayo Eric 'Karadiyo' wa Benediction Ignite ni we wegukanye umwanya wa mbere, aho yakoresheje amasaha abiri n’iminota 50 n’amasegonda 25, ibihe yanganyije na Uhiriwe Byiza Renus waje ku mwanya wa Kabiri.

Byiza Renus na Manizabayo basoreje rimwe

Ni mu gihe Byukusenge Patrick ukinira Benediction Ignite anabereye Kapiteni, we yaje ku mwanya wa Gatatu akoresheje amasaha abiri, Iminota 54 n’amasegonda 10.

Mu byiciro by'abagore bakuze, Ingimbi ndetse n'abangavu, bahagurukiye hamwe i Nyanza ya Kicukiro berekeza ku Ruhuha i Bugesera ahareshya na Kilometero 86, mu rugendo rwiganjemo igice kinini gitambika.

Mu cyiciro cy'abagore (Women Elites), Tuyishime Jacqueline wa Benediction Club yahize bagenzi be, akoresheje Amasaha abiri, Iminota 9 n’amasegonda 15, akurikirwa na Mukashema Josiane na we wa Benediction, aho banganyije ibihe.

Tuyishime 'Jacky' ahembwa

Mu cyiciro cy'ingimbi, Tuyizere Hashim ukinira Les Amis Sportifs yabaye uwa mbere ndetse asiga cyane bagenzi be, aho yakoresheje Amasaha abiri n’iminota 6 n’amasegonda 14, agakurikirwa na Mushimiyimana Jean Bosco bakina mu kipe imwe, we akoresheje amasaha abiri, Iminota 9 n’amasegonda 15.

Hashimu ahembwa

Mu bangavu, Uwera Aline wa Bugesera Cycling Team yahize bagenzi be, asoza urugendo rwa Kilometero 86 mu masaha abiri, Iminota 11 n’amasegonda 54, akurikirwa na Umwamikazi Djazila wa Les Amis Sportifs banganyije ibihe.

Manizabayo wabaye uwa mbere mu bagabo yahembwe ibihumbi 100 Frw, Tuyishime Jacky wa mbere mu bagore ahembwa ibihumbi 80 Frw, mu gihe Tuyizere Hashim wa mbere mu ngimbi na Uwera Aline wa mbere mu bangavu bo bahembwe ibihumbi 70 FRW.

Karadiyo yacyuye 100K

Uretse aba babaye aba mbere, hanahembwe abakinnyi 10 ba mbere mu cyiciro cy'abagabo bakuru (Men Elite) na batanu ba mbere mu bindi byiciro bisigaye.

Aba batsinze mu isiganwa rya Kibugabuga Race ku nshuro ya kabiri, basimbuye abaryegukanye ku nshuro ya mbere ubwo ryabaye kuwa 18 Ukuboza 2021 rikegukanwa na Mugisha Samuel mu bagabo, Mukashema Josiane mu cyiciro cy'abagore ndetse na Iradukunda Valens wa Les Amis Sportif wari waryegukanye mu cyiciro cy'ingimbi.

Abatsinze mu byiciro byose, Uhereye ibumoso; Uwera Aline, Manizabayo Eric, Tuyishime Jacqueline na Tuyizere Hashimu

AMAFOTO: FERWACY