RFL
Kigali

Abapilote babiri barasinziriye indege irenga aho yari kugwa

Yanditswe na: Kwizera jean de Dieu
Taliki:20/08/2022 14:26
0


Abapilote babiri b’indege basinziriye iri ku butumburuke bwa 11km barenga yari kugwa mbere yo gukanguka bakayigarura ikagwa neza, nk’uko ikinyamakuru ku by’indege kibivuga.



Abashinzwe ingendo z’indege bagerageje kubavugisha nyuma y’uko barenze aho bagombaga gutangira kururutsa indege mu kirere cya Addis Ababa mu murwa mukuru wa Ethiopia. Amaherezo aba bapilote baje gukanguka bagarura indege bayimanura neza, nk’uko Aviation Hearld ibivuga. Abo bakozi ba Ethiopian Airlines bahise bashyirwa mu kiruhuko mu gihe hari gukorwa iperereza, nk’uko bivugwa n’igitangazamakuru cya Leta Fana.

Iyo ndege yari yahagurutse ku kibuga cy’indege cya Khartoum muri Sudan kuwa mbere. Iyo Boeing 737, itwara abagenzi 154, ubusanzwe ifata munsi y’amasaha abiri kuri uru rugendo rw’ibihugu bituranyi. Abavuze kuri uku gusinzira kw’abapilote bamwe bifatanya nabo ko akazi kabo kagoye, abandi bagatangazwa n’uburyo basinziriye mu kazi nk’ako.

Ku rubuga Aviation Herald, umwe mu basubije kuri iyi nkuru yagize ati: “Hano ntabwo naveba abapilote ba Ethiopian – ibi ni ibintu bishobora kuba ku bapilote bose ku isi, ndetse bishobora kuba byarabayeho…Ikibazo kiri kuri kompanyi n’abagenzuzi.”

Undi avuga ko hari ikintu kimwe gusa gishoboka: “Kubirukana. Umusozo w’inkuru. Akadomo.”Abandi babibonamo ibisekeje, umwe kuri Twitter ati: “Gusinzira mu kazi ku rundi rwego!” Umwe mu nzobere mu by’ingendo z’indege yanditse kuri Twitter avuga ko ibi “biteye impungenge cyane”. Iyi nzobere yitwa Alex Macheras ati: “Umunaniro w’abapilote si ikintu gishya, kandi ukomeje kuba kimwe mu bibazo by’ingendo – mpuzamahanga - zo mu kirere."


Inkomoko: BBC






TANGA IGITECYEREZO

Izina ryawe
Email yawe
Andika igitecyerezo




Inyarwanda BACKGROUND