BePawa
Kigali

Patrick Nyamitari yakoze igitaramo cyo kwizihiza ‘Asomusiyo’ yaherewemo $50 na Gahongayire, Mani Martin aratungurana-AMAFOTO

Yanditswe na: Janvier Iyamuremye
Taliki:15/08/2022 12:11
0


Umuhanzi umaze igihe kinini mu muziki, Patrick Nyamitari, yakoze igitaramo gikomeye yise ‘Back to live with Patrick Nyamitari’ cyo kwizihiza umunsi w’ijyanwa mu ijuru rya Bikira Mariya uzwi nka Asomusiyo wizihizwa buri tariki 15 Kanama.



Uyu muhanzi yakoze iki gitaramo mu ijoro ryo kuri iki Cyumweru tariki 14 Kanama 2022 mu Kiyovu kuri Great Hotel, ashyigikiwe n’abahanzi barimo itsinda rya Catholic All Stars, Aline Gahongayire, Mani Martin n’itsinda rya Bright Five Singers.

Iki gitaramo Nyamitari yagikoze agamije kwereka abakunzi be ko yagarutse mu muziki nyuma y'aho yari amaze imyaka isaga 5 atavugwa mu ruhando rwa muzika. Cyagaragaje kandi ko agarutse mu muziki mu ngeri zose atari gospel gusa nk’uko benshi ariyo bamumenyeho.

Iki gitaramo kandi yagiteguye mu rwego rwo kwifatanya n'abakristu kwizihiza umunsi wa Asomusiyo, umunsi abakristu Gatorika by’umwihariko bazirikana ijyanwa mu ijuru rya Bikira Mariya, umubyeyi avuga ko akunda cyane kandi yubaha.

Patrick Nyamitari yinjiye ku rubyiniro aririmba indirimbo za Bikira Mariya n’izindi bishimisha benshi zirimo nka Turakwambaza Mariya, Mwamikazi w’isi n’ijuru, Umwiza, Amaso akunda, Demande au soleil, Iwacu, Cherish the Love, Kalema, Mumutashye mumubwire, Nari maziminsi+Ntikame, Igitego, Uri Imana, Mesiya, Wallah, Wihogora ndetse na Uri Imana nzima.

Iki gitaramo kitabiriwe n’abantu benshi barimo ababyeyi ba Patrick Nyamitari, babyara be n’abandi.

Mu gitaramo hagati, Gahongayire yahaye amadorali 50 Nyamitari nyuma yo kubona uburyo yitwaye ku rubyiniro n’akazi yakoze kugira ngo iki gitaramo gishoboke.

Nyamitari yabwiye InyaRwanda ati “Yampaye $50 ngo nzanywe amazi. Yabonye akazi gahambaye twakoze na band ko gutegura, ahita ampa ayo madolari.”

Muri iki gitaramo kandi, Nyamitari afatanyije n’abaririmbyi bateye isengesho ryo gusabira Buravan umaze igihe arwaye.

Uyu muhanzi avuga ko yizera neza ko isengesho rya benshi rihindura byinshi. Ati “Nifuzaga ko abari bahari ku bwinshi twahuza umutima tukamusabira ku Mana gukira kandi vuba."

"Nemera ko imitima ishyize hamwe itakambira Imana bigira imbaraga kurusha umuntu umwe cyangwa umwe umwe.”

Aline Gahongayire muri iki gitaramo yaririmbye indirimbo ze zirimo ‘Ndanyuzwe’ n’izindi. Uyu muhanzi aherutse gutangira urugendo rwo gushyira hanze zimwe mu ndirimbo zigize album ye ya karindwi.

Mu baririmbye muri iki gitaramo, harimo Catholic All Stars, itsinda rimaze kumenyekana bitewe no gusubiramo indirimbo zimwe na zimwe zo muri Kiliziya Gatolika ku buryo.

Iri tsinda ryari rihagarariwe na Rudakubana Intaramirwa Christelle, Uwineza Solange, Epiphanie uwayezu, Iratwibuka Salomé, Henriette, Padiri Rushigajiki jean Pierre (Pierrot ari we nyiri indirimbo ‘Niyeguriye Nyagasani’), Karangwa Fabrice [Perezida wa Bright Five Singers];

Elisé, Niyonkuru Fabrice, Niyitegeka Charles [Perezida wa korali Inyange za Mariya akaba n’umuyobozi muri kompanyi Ishusho), Roberto, Uwanyirigira Monique na Niyonzima Oreste.

Iri tsinda ryaririmbye mu byiciro bibiri, mu gice cya mbere baririmbye indirimbo eshanu zirimo nka Dusingize Imana, Niyeguriye Nyagasani bakoranye na Mani Martin, Dore inyange yera de na Nyagasani Mana yacu.

Mu gice cya kabiri bariirmbye indirimbo ‘Byose bihira abakunda Imana’ baririmbanye n’umuhanzikazi mu ndirimbo zo kuramya no guhimbaza Imana, Aline Gahongayire.

Itsinda Bright Five Singer ryatunguranye muri iki gitaramo, kuko batari ku rutonde rw’abagombaga kuririmba, baririmba indirimbo nka ‘Uhoraho nyirimpuhwe’, ‘Allelluia du messie’ yanyuze benshi n’izindi. 

Kanda hano urebe amafoto menshi y'iki gitaramo



Patrick Nyamitari yakoze igitaramo cyari kigamije kwifatanya n'Abakristu kwizihiza umunsi Mukuru wa Asomusiyo    

Iki gitaramo cyitabirwe n'abantu benshi biganjemo abakristu Gatolika, kandi bose bari bafite ibyishimo byinshi 

Iki gitaramo cyaranzwe n'indirimbo nyinshi Patrick Nyamitari yumvaga akiri umwana, akazaririmba mu buryo bwe 

Nyamitari yaririmbye indirimbo ze zo hambere, iz'abahanzi banyuranye ku Isi n'iziri kuri album ari gutegura    

Abaririmbyi bo muri korali zitandukanye 'Rwanda Catholic All Stars' baririmbye nyinshi mu ndirimbo basubiyemo zamamaye muri Kiliziya Gatolika 

Mani Martin yafatanyije na Catholic all stars kuririmba indirimbo bakoranye bise 'Niyeguriye Nyagasani'    

Mani Martin yari yitabiriye iki gitaramo agiye gushyigikira Patrick Nyamitari

    

Gahongayire yashimye Nyamitari, avuga ko ari umwe mu bahanzi bahanze indirimbo nawe ubwe yigiyeho kuririmba    

Aline avuga ko nyinshi mu ndirimbo za Nyamitari yakuze aziririmba, kandi zamuhaye inganzo yubakiyeho    

Gahongayire avuga ko nta muntu ukwiye gushidikanya ku mpano ya Nyamitari. Ati "Kutamushyigikira ni ishyari." 


Patrick Nyamitari na Mani Martin bahuriye ku rubyiniro nyuma y'igihe 

Yago ni we wakiriye Patrick Nyamitari ku rubyiniro mbere y'uko yanzika mu ndirimbo ze nyinshi zakunzwe          

Catholic all Stars yaririmbye nyinshi mu ndirimbo zirimo nka ‘Niyeguriye nyagasani’, ‘Nyagasani mana yacu’ n’izindi 


Umuhanzikazi Christelle Intaramirwa uherutse gusohora indirimbo 'Acyaha uwo akunda' 

Umuhanzikazo Salome ubarizwa mu itsinda 'Salome&Roberto' rizwi mu ndirimbo zirimo nka 'Rukundo', 'Dufite Imana' n’izindi 

Roberto ubarizwa mu itsinda 'Salome&Roberto' aha yafatanyaga na Catholic all Stars kuririmba


Uwanyirigira Monique wo muri Christus Regnat ni umwe mu babarizwa muri Catholic All Stars







Ababyeyi n'abavandimwe ba Patrick Nyamitari bamushyigikiye muri iki gitaramo 


Igitaramo nk'iki cyo guhimbaza Imana usigarana amashusho cyangwa se ifoto y'urwibutso






AMAFOTO: Ngabo Serge-INYARWANDA.COM






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND