Gentil Misigaro yatumiye Patient Bizimana, Elysee Bigira na Keilla Gahimbare mu gitaramo gikomeye agiye gukorera mu Bubiligi

Gentil Misigaro amaze iminsi micye ageze i Burayi aho yaherekejwe n'umugore we Rhoda Mugiraneza uri kumufasha bikomeye muri iyi minsi mu migendekere myiza y'ibikorwa bye by'umuziki. Uyu muramyi afite ibitaramo bizabera mu bihugu bitandukanye by'Uburayi nk'u Budage, u Bwongereza n'u Bubiligi. Nyuma yo gutaramira kuri uyu mugabane, azahita yerekeza muri Amerika mu bitaramo bizabera muri Kentucky ndetse na Phoenix.

Gentil Misigaro n'umugore we mu bihe byiza i Burayi

Mu mpera z'icyumweru gitaha ni ukuvuga tariki 29-31/07/2022, Gentil Misigaro azataramira mu Budage mu mujyi wa Hannover, hanyuma tariki 06/08/2022 azataramire mu Bwongereza mu Mujyi wa Manchester. Igitaramo gisoza urugendo rwe i Burayi kizaba tariki 14/08/2022 kibere i Brussels mu Bubiligi. 

Iki gitaramo cyo mu Bubiligi umuntu yavuga ko gikomeye cyane dore ko azagihuriramo n'abaramyi b'ibyamamare mu muziki wo kuramya Imana ari bo Patient Bizimana umuramyi wubashywe cyane mu Rwanda, Elysee Bigira wari ishyiga ry'inyuma muri Gisubizo Ministries akibarizwa mu Rwanda ndetse n'umunyempano Keilla Gahimbare.

Mu kanya gashize Gentil Misigaro yanyarukiye ku rukuta rwe rwa Instagram ararika abakunzi b'umuziki wo kuramya no guhimbaza Imana kutazacikwa n'iki gitaramo agiye gukorera mu Bubilig. Yanditse ati Brussels ni mwe mutahiwe (yahise ashyiraho utumenyetso rw'umuriro), tuzaba turi kumwe na Patient, Elyse, Keilla ndetse n'abandi bakozi b'Imana batandukanye".

Uyu muramyi ari gukora ibi bitaramo hirya no hino ku Isi mu kumenyekanisha Album ye nshya yitwa "Amashimwe". Ni Album itarasozwa gutunganywa, gusa nyinshi mu ndirimbo ziyigize zamaze kujya hanze. Izaba igizwe n'indirimbo umunani (8). Mu kiganiro aherutse kugirana na The New Times, uyu muhanzi yavuze ko indirimbo zimaze gusohoka kuri iyi Album ari eshanu ari zo: "Ingoma Yawe", "Nzagutegereza", "Antsindira intambara", "Yesu araryoshye" na "Tumbira Yesu".

Gentil Misigaro aherutse kubwira inyaRwanda.com ko nyuma yo gukorera ibitaramo "Amashimwe Tour" muri Canada na Leta Zunze Ubumwe za Amerika, ubu ahatahiwe ni ku mugabane w'Uburayi. Ati "Iyi Album ndi kuyikorera "World Tour" nyi promotinga (nyimenyekanisha). "Amashimwe Concert" imaze kubera muri Main Portland, OHIO Dayton (USA) Calgary, Ottawa (Canada). Ndetse ikaba igiye gukomereza mu Burayi".

Ibi yabitangaje ubwo yatugezagaho indirimbo ye nshya "Nzagutegereza" yanditswe n'umugore we Rhoda. Ni indirimbo ivuga ngo "Nubwo muri iyi si ibibazo ari byinshi, nifuza kubaho mfite amahoro, ariko umwanzi ampora iruhande, akora uko ashoboye kose akantwara umugisha wanjye. Nzahagarara ku munara wanjye, ntegereze icyo wambwiye ngutegereze, nzagutegereza Mana. Namenye ko n'iyo ucecetse bitavuze ko wandetse, ntakizambuza gutabarwa, ntakizakubuza guseruka".

Gentil afite indirimbo nshya yandikanye n'umugore we

Patient azashyigikira Gentil Misigaro mu gitaramo cyo mu Bubiligi

Bigira Elysee azaririmba mu gitaramo cya Gentil Misigaro

Umunyempano Keilla azaririmba mu gitaramo cya Gentil Misigaro

Gentil yatumiye abaramyi barimo Patient na Elysee mu gitaramo cyo mu Bubiligi

Uruhererekane rw'ibitaramo "Amashimwe World Tour" bya Gentil Misigaro

REBA HANO INDIRIMBO NSHYA "NZAGUTEGEREZA" YA GENTIL MISIGARO