Ahabanza Imyidagaduro

Yabibukije bya bihe! Riderman yatanze umwitangirizwa mu Biryogo yongera guhamya ko ari umwami imbere y’abashyitsi-AMAFOTO

Yanditswe na: Umukundwa Josue
Taliki:22/06/2022 1:19 0

Kuva mu 2008 ubwo yamurikaga Album ye ya mbere, umuraperi Riderman yujuje Petit Stade. Aha byavugwaga ko ari mu bahanzi bafite abafana benshi mu Rwanda.

Kuri uyu wa Kabiri tariki 21 Kamena 2022 ahazwi nka Car Free Zone mu Biryogo, hari hakubise huzuye bamwe bari kwinywera icyayi na Capati, abandi bahagaze gusa bose bahuje umugambi wo gususurutswa n’uyu muraperi w’icyamamare wari uri gukorera igitaramo cye ‘ku ivuko’.

Mu ruhererekane rw’ibitaramo byiswe Kigali People’s Festival, umuraperi Riderman yazamuye amarangamutima y’abanyabiryogo binyweraga icyayi. Cyari igitaramo kibereye ijisho ndetse cyuzuye n’ibitwenge, bitewe n’uko cyayobowe na Mc Tino, umushyushyarugamba ubimazemo igihe ndetse n’umunyarwenya Joshua.

Joshua wacishagamo agatuma benshi baseka, yagiye ku rubyiniro ari kumwe na Mc Tino maze abanza kwerekana ubuhanga bwe mu gutera urwenya.

Mc Tino ni umwe mu bashyushyarugamba b'abahanga

Muri iki gitaramo abanyempano bashya bahawe umwanya, maze basusurutsa abantu barimo abaririmbye indirimbo Shawe ya Marina, ndetse n’abashyushyarugamba bakizamuka.

Riderman yagiye ku rubyiniro bamwiteguye ndetse abashyitsi batandukanye bamaze kuhagera, maze aririmba indirimbo zitandukanye abantu bagiye bamumenyeraho.

Yinjiye ku rubyiniro ahagana saa tatu n’igice ari kumwe n’umuraperi Karigombe usanzwe umufasha ku rubyiniro, baririmba indirimbo ze hafi ya zose harimo izo yakoranye n’abandi bahanzi n’ize ku giti cye.

Dj Theo ubarizwa mu bisumizi niwe wavanze umuziki

Ahereye ku ndirimbo ‘Umwana w’umuhanda’, ‘Rusake’, ‘Inyuguti ya Ra’ agasoreza kuri ‘Simbuka’ n’izindi zitandukanye; uyu muraperi yeretswe urukundo n’abakunzi be bo mu Biryogo yaririmbaga bagasubiramo indirimbo ze zose.