BePawa
ATHF
Kigali

Hamana, Manchester City ikuye igikombe mu menyo ya rubamba, Totenham ishimangira Champions League

Yanditswe na: Ngabo Mihigo Frank
Taliki:22/05/2022 19:42
2


Kuri uyu wa 22 Gicurasi 2022, Shampiyona y'icyiciro cya mbere mu Bwongereza yashyizweho akadomo. Hakinwe imikino y'umunsi wa nyuma, Manchester City itwara igikombe, hamenyekana uko amakipe azahagararira u Bwongereza mu mikino y' u Burayi ya 2022-2023, Burnley yo ijya mu cyiciro cya kabiri.



Manchester City yabonye ibitego 3 byo mu minota 10 ya nyuma, ikura igikombe mu menyo ya rubamba aho itigeze yoroherwa na Aston Villa itozwa na Steven Gerard wahoze akinira Liverpool.

Imikino yose y'umunsi wa 38 ari nawo wa nyuma, yatangiriye rimwe i Saa 17:00 z'umugoroba, ibiteganywa n'ishyirahamwe ry'umupira w'amaguru hirindwa uburiganya cyangwa gucungana ku jisho ku makipe aba ajya kunganya amanota.

Amakipe yombi yacunganaga n’ubwo yakiniye rimwe. i Anfield, Liverpool yafataga neza amakuru y'umukino wahuzaga Aston Villa na Manchester United ari nako kuri stade ya Etihad, Manchester City yashakaga ibitego inafata amakuru ya Liverpool.

Mu minota 45 ibanza, aya makipe yombi ntiyorohewe, kuko Manchester City yatsinzwe igitego cya mbere cya Matty Cash cyinjiye ku munota wa 37, igice cya mbere kirangira Aston Villa iyoboye.

Ku kindi kibuga, iminota 45 yagoye Liverpool kuko yinjijwe na Wolves igitego cyo ku munota wa 3 cya Pedro Neto, cyishyuwe na Sadio Mane ku munota wa 24, bigatuma amakipe yombi ajya mu kiruhuko anganya.


Sadio Mane

Imibare yakomeje kuba nyinshi ku bibuga byombi, ubwoba bugumya gutaha imitima y'abafana uko iminota yagendaga ijya imbere.

Ku munota wa 69, Manchester City yinjijwe igitego cya kabiri na Aston Villa, aho cyatsinzwe na Philippe Coutinho wari wasabwe n'abafana ba Liverpool yahoze akinira gutsinda Manchester City.


Coutinho ntako atagize

Aha Aston Villa yari imaze kugeza ibitego bibiri, mu gihe Manchester City yari ifite ubusa. Kuri Stade ya Liverpool abafana bari bishimye cyane kuko basabwaga gutsinda bagatwara igikombe, mu gihe Aston Villa yari kuba yabashije gutsinda.

Gusa inzozi za Liverpool zabaye umuyonga mu kanya gato cyane, aho mu minota 9 gusa, Manchester City yatsinze ibitego bitatu, ihita iyobora umukino.

Igitego cya mbere cyinjijwe na Ilkay Gundhogan ku munota wa 76, icya kabiri cyinjizwa na Rodri ku munota wa 78, mbere y'uko Gundhogan atsinda igitego cyatanze igikombe ku munota wa 81.


Gundhogan yavuze ijambo rya nyuma ku gikombe

Ibitego bya Manchester City byaje bikurikiranye n'ibya Liverpool bitabashije kuyiha igikombe, aho Mohammed Salah yinjije igitego cya kabiri ku munota wa 84 mbere y'uko Andrew Robertson atsinda igitego cya Gatatu ku munota wa 89.

Amarira yatembye ku matama y'abafana ba Liverpool bashakaga igikombe cya 20 cya Shampiyona, mu gihe kuri Etihad ho abafana basakaye mu kibuga ubwo Manchester City yari imaze gutsinda Aston Villa.

Shampiyona y'umwaka wa 2021-2022, ishyizweho akadomo Manchester City ihagaze ku mwanya wa mbere n'amanota 93 n'ibitego 73 izigamye, mu gihe Liverpool yasoreje ku mwanya wa kabiri n'amanota 92.

Ikipe ya Totenham yo yabashije gutsinda Norwich City (5-0) itsindira kujya mu mikino ya UEFA Champions League y'umwaka wa 2022-2023, mu gihe Arsenal yatsinze Everton 4-1 yo izakomereza muri UEFA Europa League.

Amakipe atatu yamanutse mu cyiciro cya kabiri ni; Burnley ya 18, Watford ya 19 na Norwich City yasoreje ku mwanya wa 20 ku rutonde rwa Shampiyona.

  • Uko imikino y'umunsi wa 38 yagenze:
  • Arsenal 4-1 Everton
  • Brentford 1-2 Leeds
  • Brighton 3-1 West Ham
  • Burnley 1-2 Newcastle
  • Chelsea 2-1 Watford
  • Crystal Palace 1-0 Manchester Utd 
  • Leicester 4-1 Southampton
  • Liverpool 3-1 Wolves
  • Manchester City 3-2 Aston Villa
  • Norwich 0-5 Tottenham


Guardiola yikojeje mu bicu






TANGA IGITECYEREZO

Izina ryawe
Email yawe
Andika igitecyerezo

IBITECYEREZO

  • vicky vidic1 month ago
    arsenal nyine nahubutaha nsuhuza dasliva bugesera nabanyeshuri twigana kuri sainte trinite de nyanza
  • Mumyampeta ammanwal1 month ago
    Ikipe machester city yabikoze neza ariko rwose ndashima abakinyi baba ba koze ibintu nkabiriya bagafata umwanzuro haricyo bashaka bakakibona city goooooo



Inyarwanda BACKGROUND