Igazeti ya Leta ivuga iki ku minsi ibiri y'ibiruhuko yahuriranye ?

Mu butumwa bwatanzwe binyuze kuri Twitter, Minisiteri y’abakozi yagize iti: “Minisiteri y’abakozi ba Leta n’umurimo, iramenyesha abakoresha n’abakozi bose bo mu nzego za Leta n’abo mu nzego z’abikorera ko kuwa kabiri tariki 03 Gicurasi ari umunsi w’akazi”.

Iri tangazo ryagiye hanze nyuma y’aho abantu batandukanye batekerezaga ko  ku munsi wo kuwa mbere no kuwa kabiri ari iminsi y’ikiruhuko.

Umunsi mukuru w’abakozi wizihizwa tariki ya 1 Gicurasi buri mwaka. Iyo umunsi mukuru wahuriranye na weekend, ku munsi w’akazi ukurikiyeho hatangwa ikiruhuko. Kuwa mbere tariki 2 Gicurasi 2022, biteganyijwe ko ari umunsi wo gusoza igisibo ku basiramu bose, aho hatangwa konje.

Nk’uko bigaragara mu igaseti ya Leta N^o11 yo kuwa 13/3/2017 ku rupapuro rwayo rwa 27, havuga ko iyo iminsi ibiri y’ikiruhuko ihuriranye, umunsi ukurikiyeho w’akazi uba ikiruhuko rusange mu rwego rwo gusimbura umwe muri iyo minsi ibiri y’ikiruhuko rusange yahuriranye, nk’uko byibukijwe n’umuturage witwa Uwamungu Jean Baptiste watanze igitekerezo ku butumwa (Twitter) bwatanzwe na Minisiteri y’abakozi ba Leta n’umurimo, asaba gusobanurirwa neza.

Biteganyijwe ko ku munsi wo ku wa mbere ari umunsi w’igisibo ku basiramu bose bo mu Rwanda no ku isi, mu gihe kuwa kabiri ari umunsi w’akazi nk’uko byatangajwe na Minisiteri y’abakozi.

Itangazo rya Minisiteri y'abakozi ba Leta n'Umurimo ryanyujijwe kuri konti ya Twitter.