Nkunda Chrispin yagaragaje umukunzi we Kessy bitegura kurushinga anahishura byinshi ku rukundo rwabo-AMAFOTO

Chrispin yamamaye mu bitangazamakuru bitandukanye mu Rwanda, mbere y’uko yerekeza kwiga muri Amerika icyiciro cya gatatu cya kaminuza. Mu binyamakuru yakoreye harimo Voice of Africa kimwe na Royal F.M.

Kuwa 14 Gashyantare, nibwo rero hatangiye gucicikana amafoto ari kumwe n’umukunzi we bitegura kurushinga mu bihe bya vuba, nk’uko yabitangaje mu kiganiro yagiranye n’INYARWANDA.

Yatangiye agira ati:”Niga muri Oakwood University iherereye muri Leta ya Alabama muri USA, ari naho nahuriye n’umukobwa witwa Gentille Kessy turakundana. Amafoto rero yatunguye benshi ni ayanjye nawe.”

Agaruka kuburyo yahuye nawe agira ati:”Duhura hari mu mwaka wa 2021, mu kwezi kwa kabiri nibwo twahuye bwa mbere bitangira turi inshuti bisanzwe ariko uko iminsi yagendaga yicuma, tugenda tubona ko hari byinshi duhuje tuza kwisanga no mu rukundo.”
Asobanura ukuntu Kessy umukunzi we yamubereye byose kuva mu ntangiriro, ati:”Yaramfashije mu bintu byinshi yaba mu kumenyereza muri Amerika icyongereza cyari gicye, ubumenyi umuco n’ibindi byinshi.”

Bimwe mu bintu bituma Chrispin yiyumva muri Kessy biruseho ni urukundo uyu mwari yagiye amwereka. Abisobanura agira ati:”Kessy ni umukobwa w’agatangaza, yanyeretse urukundo rutangaje akanyitaho”.
Yongeraho ati:”Ugasanga uko andeba anyitaho, naba nakerewe kujya gufata amafunguro akanyibutsa, natinda kubyuka akampamagara akanyibutsa akambaza wariye? Wanyoye icyayi? Ugasanga anzaniye umupira imbeho itanyica, twaba tugenda akamfata ikiganza.”

Kuri ubu Kessy Gentille afite imyaka 23, mu gihe Chrispin we amaze kugira 27. Mu bihe bya vuba akaba agiye kumwambika impeta ari nako uyu mwaka wa 2022 bitegura kubana akaramata.

Chrispin yize amashuri yisumbuye muri Lycée i Nyanza, asoza kaminuza mu mwaka wa 2019 muri Mount Kenya mbere gato ko yerekeza muri Amerika.

Mu gihe Kessy yagiye muri Leta Zunze Ubumwe za Amerika ajyanye n’ababyeyi muri 2016 icyo gihe yari akiri muto.

Bamenyaniye muri kaminuza ya Oakwood, baritegura kubana akaramata