Ahabanza Imikino

Sadio Mané yitiriwe Stade

Yanditswe na: Ngabo Mihigo Frank
Taliki:13/02/2022 13:36 0

Sadio Mané, rutahizamu wa Liverpool n'ikipe y'igihugu ya Senegal, yitiriwe Stade mu ntara ya Sedhiou akomokamo, nyuma yo gufasha igihugu cye (Les Lions de la Teranga) kwegukana igikombe cy'Africa cya 2021.

Sadio Mané niwe winjije penaliti ya nyuma ku mukino wa nyuma w'igikombe cy'Africa cyabereye muri Cameroon, nyuma y'uko iminota 120 y'umukino yari yarangiye Senegal na Misiri banganya ubusa ku busa hakaza kwitabazwa Penaliti, Senegal yegukana igikombe cya mbere itsinze Penaliti 4 kuri 2.

Kuba yaratsinze ibitego bitatu akanatanga imipira ibiri yavuyemo ibitego, biri mu byatumye Sadio Mané atorwa nk'umukinnyi mwiza wa AFCON 2021 (Most Valuable Player, MVP).

Kuri ubu, umuyobozi mu gace kitwa Sedhiou ho muri Senegal, Adboulaye Diop, yavuze ko ikibuga cy'umupira cyari gisanzwe cyitwa 'Stade de Sedhiou' kigomba guhindurirwa izina kikitwa 'Stade Sadio Mané'.

Diop aganira n'itangazamakuru yagize ati "Mu kwitirira Sadio Mané iki kibuga Stade de Sédhiou, nashakaga kumushimira ku banyagihugu bose kuko yamenyekanishije Bambali (Agace Sadio avukamo) ku isi yose".

Uretse Kuba Sadio Mané ari umwe mu bakinnyi ba Senegal begukanye igikombe cya mbere mu mateka y'iki gihugu, akanavuga ko ari cyo gikombe agezeho mu buzima bwe, asanzwe ari umukundwa cyane mu baturage ba Senegal ndetse by'umwihariko abatuye i Bambali aho akomoka, aho bamufata nk'intwari yabo ikomeye.

Mu bihe bitandukanye yafashije abatuye i Bambali, aho yatanze amafaranga yo kubaka ibitaro n'amashuri ndetse akanabagoboka cyane mu mizo y'icyorezo cya Coronavirus, ubwo ubukungu bw'isi bwasubiraga hasi umunsi ku munsi.

Sadio Mané w'imyaka 29 y'amavuko, yatangiriye gukina umupira mu ikipe y'abato ya Generation Foot i Dakar mbere yo gukinira Metz yo mu Bufaransa, Red Bull Salzburg yo muri Autriche, Southampton yo mu Bwongereza ndetse na Liverpool akinira kuri ubu.

Sadio yihariye agahigo ko kuba umukinnyi watsinze ibitego bitatu byihuse (Hattrick) mu mateka ya Shampiyona y' u Bwongereza aho yabitsinze mu masegonda 176, mu mukino Southampton yatsinzemo Aston Villa ibitego 6 kuri 1 mu mwaka wa 2015.