Pasiteri ubwiriza yambaye inkweto ndende z’abagore 'High heels' yatangaje impamvu ari zo yahisemo

Nyuma y’uko amafoto ye asakaye ku mbuga nkoranyambaga zitandukanye maze abantu bakibaza impamvu yahisemo kwambara inkweto zambarwa n’igitsina gore ndetse akazambara mu rusengero imbere y’abakirisitu ari kubwiriza, uyu muvugabutumwa yatangaje ko yaretse kwambara inkweto z’abagabo mu rwego rwo kugabanya uburibwe zamuteraga ndetse no kwirinda ubundi burwayi zari kumutera.

Uyu muvugabutumwa wo mu gihugu cya Togo ubwo amafoto ye yajyaga hanze maze abantu batari bacye ku mbuga nkoranyambaga zitandukanye bibazaga impamvu yatumye ahitamo kwambara inkweto zagenewe igitsina gore kandi yari akwiye kwambara iz’abagabo.

Amakuru avuga ko uyu muvugabutumwa ubwe yavuze ko Imana ari yo yamubujije kwambara inkweto z’abagabo ahubwo akajya yambara izagenewe igitsina gore.

Ubwe yavuze ko yahoze yambara inkweto z’abagabo zikamutera uburibwe mu mubiri ndetse n’ubundi burwayi atatangaje, ariko nyuma yo gukora ibyo Imana yari yamubwiye akambara inkweto z’abagore (High heels) ibibazo byose yaterwaga no kwambara iz’abagabo byose byaje gucyemuka.

Mu magambo ye yagize ati: “Ubwo nari gusenga, Imana ubwayo niyo yabimbwiye ndetse ingira inama yo kwambara izi nkweto ubona "Nyuma yo gutangira kuzambara natangiye kujya nzambara umunsi wose, uburibwe bwose nagiraga bwaragiye."

Yakomeje avuga ku makuru y’ibihuha yari amaze iminsi avuga ko uretse kuba yambara izi inkweto ajya anyuzamo akambara n’imyambaro y’abagore. Yagize ati: “Ntago njya nambara imyambaro y’abagore nkuko abantu bamaze iminsi babivuga ku mbuga nkoranyambaga gusa nambara inkweto zose z’abagore, nkuko ubutumwa nakiriye bwavugaga."